ຍທຂ ປາຖະກະຖາ ແລະ ເຊື່ອມຊຶມເອກະສານວັນສຳຄັນຂອງພັກ-ຂອງຊາດ

 ໃນພິທີ, ຄະນະພັກ-ຄະນະພະແນກ ໄດ້ຜັດປ່ຽນກັນເຜີຍແຜ່ ແລະ ເຊື່ອມຊຶມເອກະສານສຳຄັນຫຼາຍສະບັບຄື: ມະຕິກອງປະຊຸມໃຫຍ່ ຄັ້ງທີ XII ຂອງພັກ ປະຊາຊົນປະຕິວັດລາວ, ມະຕິກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງເຊກອງ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030), ເອກະສານການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XII ຂອງພັກ ສຳລັບພະນັກງານຫຼັກແຫຼ່ງ ແລະ ບົດລາຍງານການເມືອງ ຂອງຄະນະບໍລິຫານງານພັກແຂວງເຊກອງ ສະໄໝທີ X ຕໍ່ກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງ. 

 ພ້ອມນັ້ນ, ຍັງໄດ້ຫວນຄືນມູນເຊື້ອວັນສ້າງຕັ້ງກະຊວງ ຍທຂ ຄົບຮອບ 75 ປີ(13/7/1951-13/7/2026), ວັນກຳມະກອນສາກົນ ຄົບຮອບ 140 ປີ (1/5/1886-1/5/2026), ວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນແຂວງຊຽງຂວາງ ຄົບຮອບ 67 ປີ(18/5/1959-18/5/2026) ແລະ ວັນເກີດ ຂອງປະທານ ສຸພານຸວົງ ວິລະບຸລຸດຜູ້ຍິ່ງໃຫຍ່ຂອງຊາດລາວ ຄົບຮອບ 117 ປີ (3/7/1909-13/7/2026) ເພື່ອຍົກສູງຄວາມຮັບຮູ້ທາງການເມືອງ, ຄວາມຮັບຜິດຊອບຕໍ່ໜ້າທີ່ວຽກງານຂອງພະນັກງານ-ລັດຖະກອນໃນຂະແໜງ ຍທຂ ເພື່ອປະກອບສ່ວນເຂົ້າໃນການພັດທະນາຂະແໜງການໃຫ້ມີຄວາມກ້າວໜ້າຍິ່ງຂຶ້ນ.

 ໂອກາດນີ້, ທ່ານ ແກ້ວປະເສີດ ແກ້ວມະນີວົງ ໄດ້ເນັ້ນໜັກໃຫ້ພະນັກງານ-ລັດຖະກອນທຸກຄົນ ຈົ່ງພ້ອມກັນຍຶດໝັ້ນແນວທາງ ແລະ ມະຕິຂອງພັກ, ນຳເອົາເນື້ອໃນທີ່ໄດ້ເຊື່ອມຊຶມ ໄປໝູນໃຊ້ເຂົ້າໃນການປະຕິບັດໜ້າທີ່ຕົວຈິງ ໂດຍສະເພາະ ແຜນພັດທະນາເສດຖະກິດ-ສັງຄົມ ຕິດພັນກັບພາລະກິດການພັດທະນາຂະແໜງການ ຍທຂ ໃຫ້ບັນລຸຜົນຕາມເປົ້າໝາຍທີ່ກຳນົດໄວ້. ຂ່າວ: ພຸດທະສອນ