 |
ງານດັ່ງກ່າວຈັດໂດຍKOTRA Vientiane, ໂດຍໄດ້ຮັບການສະໜັບສະໜູນຈາກສະຖານທູດສາທາລະນະລັດເກົາຫຼີ ປະຈຳ ສປປ ລາວ, ຮ່ວມມືກັບກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ແລະ ສະຖາບັນການເຕີບໂຕສີຂຽວສາກົນ (GGGI) ປະຈຳ ສປປ ລາວ. ງານດັ່ງກ່າວປະກອບມີ ກອງປະຊຸມດ້ານນະໂຍບາຍ, ການນຳສະເໜີເຕັກໂນໂລຊີຂອງ ສ ເກົາຫຼີ, ພິທີລົງນາມ MOU, ການລົງຢ້ຽມຢາມສະຖານທີ່ໂຄງການ ແລະ ການຈັບຄູ່ທຸລະກິດແບບ 1:1.
ທ່ານ ມາໄລທອງ ກົມມະສິດລັດຖະມົນຕີກະຊວງອຸດສາຫະກຳ ແລະ ການຄ້າ(ອຄ) ໄດ້ສະແດງຄວາມຍິນດີຕໍ່ການສືບຕໍ່ການຮ່ວມມືກັບ ສເກົາຫຼີ ໃນການສົ່ງເສີມການເຕີບໂຕສີຂຽວ ແລະ ການລົງທຶນແບບຍືນຍົງ.ພ້ອມທັງເນັ້ນໜັກເຖິງຄວາມສຳຄັນຂອງການຮ່ວມມືທີ່ປະສົມປະສານເຕັກໂນໂລຊີ ແລະ ການລົງທຶນຈາກສາກົນ ເຂົ້າກັບໂອກາດພາຍໃນປະເທດ ເພື່ອສະໜັບສະໜູນການຫັນປ່ຽນຂອງ ສປປ ລາວ ໄປສູ່ເສດຖະກິດກາກບອນຕ່ຳ. ການເຂົ້າຮ່ວມຂອງທ່ານລັດຖະມົນຕີກະຊວງ ອຄ ໄດ້ຢືນຢັນຄືນເຖິງການສະໜັບສະໜູນຂອງລັດຖະບານລາວ ຕໍ່ການມີສ່ວນຮ່ວມຂອງພາກເອກະຊົນທີ່ເຂັ້ມແຂງຂຶ້ນ ແລະ ການຮ່ວມມືແບບພາກປະຕິບັດຕົວຈິງເພື່ອມຸ່ງສູ່ການປ່ອຍອາຍພິດເຮືອນແກ້ວເປັນສູນ (Net-Zero).
ທ່ານ Koo Bon Kyung, ປະທານ KOTRA ປະຈຳພາກພື້ນອາຊີຕາເວັນອອກສ່ຽງໃຕ້ ແລະ ໂອເຊອານີ, ໄດ້ຍົກໃຫ້ເຫັນເຖິງທ່າແຮງຂອງ ສປປ ລາວ ໃນການກາຍເປັນຄູ່ຮ່ວມມືທີ່ສຳຄັນສຳລັບບັນດາບໍລິສັດ ສ ເກົາຫຼີທີ່ດຳເນີນໂຄງການຫຼຸດຜ່ອນການປ່ອຍອາຍພິດ ແລະ ການລົງທຶນສີຂຽວໃນຕ່າງປະເທດ. ທ່ານໄດ້ຢືນຢັນຄືນເຖິງຄວາມມຸ່ງໝັ້ນຂອງ KOTRA ໃນການເຊື່ອມໂຍງແລະສ້າງໂອກາດໃຫ້ ແກ່ບັນດາບໍລິສັດ ສ ເກົາຫຼີ ປະກອບສວ່ນ ແລະ ສະໜັບສະໜູນເປົ້າໝາຍ NDC ຂອງທັງສອງປະເທດ.
ກອງປະຊຸມດ້ານນະໂຍບາຍໄດ້ໃຫ້ຂໍ້ມູນແກ່ບັນດາບໍລິສັດ ສ ເກົາຫຼີ ກ່ຽວກັບນະໂຍບາຍດ້ານພະລັງງານ ແລະ ສິ່ງແວດລ້ອມຂອງ ສປປ ລາວ, ບຸລິມະສິດຂອງໂຄງການ ແລະ ໂອກາດການລົງທຶນເຊິ່ງກົມນະໂຍບາຍ, ແຜນການ ແລະ ການປະເມີນຜົນ ຂອງກະຊວງອຸດສາຫະກຳ ແລະ ການຄ້າ ໄດ້ນຳສະເໜີການພັດທະນາຍຸດທະສາດພະລັງງານແຫ່ງຊາດຂອງ ສປປ ລາວ, ໃນຂະນະທີ່ກົມສິ່ງແວດລ້ອມ ຂອງກະຊວງກະສິກຳ ແລະ ສິ່ງແວດລ້ອມ ໄດ້ລາຍງານຄວາມຄືບໜ້າກ່ຽວກັບຄູ່ມືການອະນຸມັດ ແລະ ຄຸ້ມຄອງໂຄງການກາກບອນ. GGGI ປະຈຳ ສປປ ລາວ ໄດ້ແບ່ງປັນໂອກາດດ້ານການລົງທຶນສີຂຽວ ແລະ ການຫຼຸດຜ່ອນການປ່ອຍອາຍພິດແລະ ກົມປ່າໄມ້ ສ ເກົາຫຼີ ໄດ້ນຳສະເໜີປະສົບການຂອງ ສເກົາຫຼີ ໃນການຫຼຸດຜ່ອນກາກບອນໂດຍອີງໃສ່ຂະແໜງປ່າໄມ້.
ໜຶ່ງໃນຜົນສຳເລັດທີ່ສຳຄັນຂອງມື້ທຳອິດ ແມ່ນພິທີລົງນາມຕໍ່ອາຍຸ MOU ລະຫວ່າງກຸ່ມຮ່ວມມື CS Tech ແລະ Dascoກັບ ບໍລິສັດ ຜະລິດ-ໄຟຟ້າລາວ ມະຫາຊົນ (EDL-Gen). ຂໍ້ຕົກລົງດັ່ງກ່າວຂະຫຍາຍການຮວ່ມມືດ້ານພະລັງງານແສງຕາເວັນ ແລະ ໂຄງການຫຼຸດຜ່ອນກາກບອນ, ໂດຍສະເພາະໂຄງການໄຟຟ້າແສງຕາເວັນເທີງໜ້ານ້ຳ ຫ້ວຍລຳພັນຕອນລຸ່ມ, ພ້ອມທັງສຶກສາໂອກາດໃນການສ້າງກາກບອນເຄຣດິດ ແລະ ການໂອນຜົນການຫຼຸດຜ່ອນລະຫວ່າງປະເທດ ພາຍໃຕ້ມາດຕາ 6.2 ຂອງສັນຍາປາຣີ.
ບໍລິສັດ ສ ເກົາຫຼີ ແລະ ກຸ່ມຮ່ວມມື ຈຳນວນ 17 ແຫ່ງ ໄດ້ນຳສະເໜີເຕັກໂນໂລຊີ, ຮູບແບບທຸລະກິດ ແລະ ໂຄງການທີ່ມີທ່າແຮງ ໃນຂົງເຂດພະລັງງານແສງຕາເວັນ, ລະບົບກັກເກັບພະລັງງານແບັດເຕີຣີ (BESS), ໄຟຟ້ານ້ຳຕົກຂະໜາດນ້ອຍ, ການພັດທະນາພະລັງງານທົດແທນ, ການພັດທະນາກາກບອນເຄຣດິດ, ການຕິດຕາມກາກບອນ ແລະ MRV, ການຜະລິດພະລັງງານຈາກຂີ້ເຫຍື້ອ, ປະສິດທິພາບດ້ານພະລັງງານ, ການຂົນສົ່ງດ້ວຍໄຟຟ້າ ແລະ ໂຊລູຊັນດິຈິຕອນ.
ການຈັບຄູ່ທຸລະກິດແບບ 1:1ໄດ້ເຊື່ອມໂຍງ 17 ບໍລິສັດຈາກ ສ ເກົາຫຼີ ກັບບັນດາອົງການພາກລັດຂອງລາວ, ຜູ້ພັດທະນາໂຄງການ ແລະ ຄູ່ຮ່ວມງານຈາກພາກເອກະຊົນ.
ງານດັ່ງກ່າວຍັງໄດ້ສະແດງໃຫ້ເຫັນໂອກາດໃນການຂະຫຍາຍ ແລະ ການພັດທະນາພະລັງງານສະອາດໃນຫຼາກຫຼາຍຮູບແບບຂອງ ສປປ ລາວ ຜ່ານພະລັງງານແສງຕາເວັນ, ພະລັງງານລົມ, ໄຟຟ້ານ້ຳຕົກຂະໜາດນ້ອຍ, ການກັກເກັບພະລັງງານ, ການຂົນສົ່ງດ້ວຍໄຟຟ້າ ແລະ ໂຄງການຫຼຸດຜ່ອນກາກບອນ.
ງານ “The 2nd Korea–Laos Net-Zero Partnership 2026”ໄດ້ເປັນອີກໜຶ່ງບາດກ້າວໃນການຫັນເອົາຄວາມມຸ່ງໝັ້ນຮ່ວມກັນດ້ານສະພາບອາກາດຂອງ ສເກົາຫຼີ ແລະ ສປປ ລາວ ໃຫ້ເປັນໂຄງການທີ່ປະຕິບັດໄດ້ຈິງ, ໂອກາດການລົງທຶນ ແລະ ການຮ່ວມມືທາງທຸລະກິດໄລຍະຍາວ, ພ້ອມທັງສືບຕໍ່ເສີມສ້າງການຮ່ວມມືທັງສອງຝ່າຍ ເພື່ອມຸ່ງສູ່ເສດຖະກິດທີ່ຍືນຍົງ ແລະ ມີການປ່ອຍກາກບອນຕ່ຳ.
ຄໍາເຫັນ