ອົງການໄອຍະການປະຊາຊົນແຂວງ ແລະ ຄ້າຍຄຸມຂັງ-ດັດສ້າງ ທົບທວນຄືນການຮ່ວມມື

     ທ່ານ ໄຊຊະນະ ໄຊຍະວົງ ຮັກສາການຫົວໜ້າຂະແໜງຕິດຕາມກວດກາຄ້າຍຄຸມຂັງ-ດັດສ້າງ ລາຍງານວ່າ: ເພື່ອເຮັດໃຫ້ກົນໄກການປະສານງານ ລະຫວ່າງ ອົງການໄອຍະການປະຊາຊົນແຂວງ ແລະ ຄ້າຍຄຸມຂັງ-ດັດສ້າງ ປະຕິບັດໜ້າທີ່ວຽກງານໃຫ້ມີຄວາມວ່ອງໄວ ແລະ ທັນກັບສະພາບການປັດຈຸບັນ; ທັງສອງພາກສ່ວນ ໄດ້ສ້າງບົດບັນທຶກຮ່ວມມື ກົນໄກປະສານງານຂຶ້ນ ນັບແຕ່ວັນທີ 20 ພຶດສະພາ 2025 ເປັນຕົ້ນມາ ໂດຍໄດ້ກຳນົດຈຸດປະສົງ, ພາລະບົດບາດ, ສິດ ແລະ ໜ້າທີ່, ຄະນະປະສານງານຂອງສອງພາກສ່ວນ ແລະ ວຽກງານທີ່ເຮັດຮ່ວມກັນມີ 11 ວຽກ ຄື: ການປະຕິບັດພາລະບົດບາດຂອງສອງພາກສ່ວນ, ລະບຽບກ່ຽວກັບການປ່ອຍຕົວ ການຍົກຍ້າຍ, ການເຈັບປ່ວຍ ແລະ ການອອກປິ່ນປົວ, ການເສຍຊີວິດ, ການຖືພາມານ ແລະ ການອອກເກີດລູກ (ກໍລະນີພິເສດ), ການຢ້ຽມຢາມ, ການເກັບກຳ ແລະ ລາຍງານສະຖິຕິເຂົ້າ-ອອກຂອງນັກໂທດ, ຜູ້ຖືກຫາ, ຜູ້ຖືກກັກຕົວ ແລະ ຜູ້ຖືກດັດສ້າງ; ການໂຄສະນາ ແລະ ສຶກສາອົບຮົມ; ວຽກງານອະໄພຍະໂທດ ແລະ ວຽກງານການປ່ອຍຕົວນັກໂທດກ່ອນກຳນົດ ໂດຍມີເງື່ອນໄຂ; ການຍື່ນຄໍາຮ້ອງ ຫຼື ຄໍາສະເໜີອອກປິ່ນປົວ, ປ່ອຍຕົວກ່ອນກໍານົດ ໂດຍມີເງື່ອນໄຂ ແລະ ອື່ນໆ.

     ທ່ານ ໄຊຊະນະ ໄຊຍະວົງ ໃຫ້ຮູ້ຕື່ມວ່າ: ຜ່ານການຈັດຕັ້ງປະຕິບັດບົດບັນທຶກຮ່ວມ ກົນໄກປະສານງານ ໄລຍະຜ່ານມາ ເຫັນວ່າ: ມີຜົນສຳເລັດເປັນສ່ວນໃຫຍ່ ໂດຍສະເພາະ ໄດ້ສຳເລັດການເປີດກອງປະຊຸມປຶກສາຫາລືຮ່ວມກັບຄ້າຍຄຸມຂັງ-ດັດສ້າງ 11 ຄັ້ງ, ໄດ້ແກ້ໄຂບັນຫາການອອກປິ່ນປົວຂອງຜູ້ຖືກຫາຈໍານວນ 6 ຄົນ, ໄດ້ນະໂຍບາຍປ່ອຍຕົວນັກໂທດກ່ອນກຳນົດໂດຍມີເງື່ອນໄຂ 11 ຄົນ, ໄດ້ຄົ້ນຄວ້າພິຈາລະນາການໃຫ້ອະໄພຍະໂທດ ປະຈຳປີ 2026 ແລະ ໄດ້ແກ້ໄຂບັນຫາການກັກຂັງເກີນກຳນົດໄດ້ຈຳນວນໜຶ່ງ. ຈາກນັ້ນ, ໄດ້ຮ່ວມກັນມີຄໍາຄິດຄໍາເຫັນ ເພື່ອຫາລືແກ້ໄຂບັນຫາທີ່ຍັງຄົງຄ້າງ ແລະ ບາງວຽກທີ່ປະຕິບັດ ຍັງບໍ່ທັນຄ່ອງໂຕ ເພື່ອເປັນເອກະພາບກັນ ໃນການຈັດຕັ້ງປະຕິບັດອີກໃນຕໍ່ໜ້າໃຫ້ໄດ້ດີຂຶ້ນກວ່າເກົ່າ. ຂ່າວ: ເຊກອງ