ອົງການຈັດຕັ້ງບ້ານມີຄວາມສໍາຄັນໃນການໂຄສະນາໃຫ້ຮູ້ປະຊາຊົນຮູ້ຈັກການຮັກສາສຸຂະພາບ

ສະມາຊິກສະພາແຫ່ງຊາດຈາກເຂດເລືອກຕັ້ງຕ່າງໆ (ສສຊ) ສືບຕໍ່ປະກອບຄໍາເຫັນຕໍ່ກົດໝາຍການຮັກສາສຸຂະພາບຂັ້ນຕົ້ນ ຊຶ່ງເປັນກົດໝາຍສ້າງຂຶ້ນໃໝ່ເພື່ອເປັນບ່ອນອີງໃນການປະຕິບັດວຽກງານຮັກສາສຸຂະພາບຂັ້ນຕົ້ນໃຫ້ມີຄຸນນະພາບຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃນວັນທີ 16 ພະຈິກ 2023,ພາຍໃຕ້ການເປັນປະທານຂອງ ທ່ານ ຄຳໃບ ດຳລັດ  ຮອງປະທານສະພາແຫ່ງຊາດ.
ທ່ານ ນາງ ທອງໃບ  ໄຊຍະສານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14 ແຂວງສາລະວັນ ໄດ້ປະກອບຄໍາເຫັນຕໍ່ຮ່າງກົດໝາຍການຮັກສາສຸຂະພາບຂັ້ນຕົ້ນ ເພື່ອເປັນການແລກປ່ຽນ ຊຶ່ງກົດໝາຍສະບັບດັ່ງກ່າວກໍເປັນກົດໝາຍສ້າງໃໝ່ ຊຶ່ງເປັນວຽກອັນໜຶ່ງທີ່ຕ້ອງສຸມໃສ່ການພັດທະນາຮັກສາສຸຂະພາບ ກົດໝາຍສະບັບນີ້ໃນມາດຕາທີ 20 ມາດຕະຖານບ້ານສາທາລະນະສຸກແບບຢ່າງ ໃນນັ້ນໄດ້ກໍານົດ 10 ມາດຕະຖານ ຊຶ່ງປະກອບມີ ຄະນະກໍາມະການຮັກສາສຸຂະພາບຂັ້ນບ້ານ; ມີຂະບວນການໂຄສະນາສຸຂະສຶກສາຮອບດ້ານ; ປະຕິບັດຕາມຫຼັກການອະນາໄມ; ການຊົມໃຊ້ ແລະ ດື່ມນໍ້າສະອາດ; ການກັນດ້ວຍວິທີຕ່າງໆ ເພື່ອບໍ່ໃຫ້ຍຸງ ແລະ ແມງໄມ້ກັດ, ຕອດ;ການຊຸກຍູ້ແມ່ຍິງໄວຈະເລີນພັນໄປຮັບວັກຊິນ, ກິນຢາທາດເຫຼັກ ແລະ ມີການວາງແຜນຄອບຄົວ; ນອກຈາກນີ້ ໄດ້ມີຄໍາເຫັນ ສະເໜີໂດຍສະເພາະທຸກໆຄົວເຮືອນຢູ່ໃນບ້ານນັ້ນໆທີ່ມີວິດຖ່າຍແມ່ນເນັ້ນໃຫ້ມີຄວາມສະອາດແລະ ໃຫ້ມີສະພາບແວດລ້ອມທີ່ດີພາຍໃນບ້ານ ຫຼືວ່ານອກບ້ານປອດໂປ່ງ ສະອາດດີ ເພາະວ່າຜ່ານມາບ້ານແບບຢ່າງດ້ານສາທາລະນະສຸກ ຕາມການລົງໄປຢ້ຽມຢາມພົບປະຕາມເຂດຊົນນະບົດ ຍັງເຫັນວ່າບໍ່ທັນເຮັດໄດ້ດີເທົ່າທີ່ຄວນ ໂດຍສະເພາະສະພາບແວດລ້ອມພາຍໃນບ້ານ.
 ເພື່ອຢາກໃຫ້ມີສະພາບແວດລ້ອມທີ່ສະອາດງາມຕາຂຶ້ນ. ໃນມາດຕາ 62 ຄະນະກໍາມະການຮັກສາສຸຂະພາບຂັ້ນບ້ານ ໃນນັ້ນຢາກໃຫ້ກໍານົດໃສ່ເລີຍ ເປັນຕົ້ນວ່າຄະນະກໍາມະການຂັ້ນສູນກາງ, ຂັ້ນເມືອງ ແລະ ຂັ້ນແຂວງ ໂດຍສະເພາະຢູ່ໃນຂັ້ນບ້ານໃຫ້ເລືອກເອົາຮອງນາຍບ້ານເປັນປະທານ ຜູ້ຊີ້ນໍາວັດທະນະທໍາ-ສັງຄົມ  ຈາກນັ້ນຈຶ່ງມີການຈັດຕັ້ງມະຫາຊົນຕ່າງໆ  ລວມທັງແພດ, ອາສາສະໝັັກສາທາລະນະສຸກບ້ານ(ອສບ) ເພາະວ່າໃນອົງການຈັດຕັ້ງຂອງບ້ານແມ່ນມີຄວາມສໍາຄັນຫຼາຍ ໃນການໂຄສະນາເຜີຍແຜ່ປຸກລະດົມຂົນຂວາຍ ປະຊາຊົນໃຫ້ຮູ້ຈັກການຮັກສາສຸຂະພາບ ໂດຍການເລີ່ມຈາກຕົນເອງ ກ່ອນຈະໄປຫາແພດໝໍຢູ່ຕາມສຸກສາລາ ຫຼືວ່າໂຮງໝໍ.
ຂ່າວ: ຍຸພິນທອງ