ອົງການຈັດຕັ້ງສັງຄົມລາວ ຈັດງານວາງສະແດງຜົນງານ ແລະ ຜະລິດຕະພັນຂອງຕົນ

ງານວາງສະແດງຜົນງານ ແລະ ຜະລິດຕະພັນຂອງອົງການຈັດຕັ້ງສັງຄົມລາວ ຈັດຂຶ້ນໃນລະຫວ່າງວັນທີ 1-2 ມີນາຜ່ານມາ ທີ່ຫໍຈາລຶກມູນເຊື້ອ 21 ມີນາ ເມືອງທ່າແຂກ ແຂວງຄໍາມ່ວນ ໂດຍມີທ່ານ ນາງ ອາລີ ບົວຈູມ ຫົວໜ້າພະແນກພາຍໃນ ແຂວງຄຳມ່ວນ, ທ່ານ ບາບາຣາ ມາຍເກ ຫົວໜ້າໂຄງການແຜນງານ ເຊກາຈີໄອແຊັດ ຕົວແທນຜູ້ອຸປະຖໍາທຶນ, ທ່ານ ນາງ ຈັນສີ ພິມພະຈັນ ຫົວໜ້າຄະນະປະສານງານ ອົງການຈັດຕັ້ງສັງຄົມລາວ, ທ່ານ ສາລີ ທອງສະຫວັນ ຜູ້ອຳນວຍການສະມາຄົມ ພັດທະນາການທ່ອງທ່ຽວ ແບບອະນຸລັກ ຖໍ້າກອງລໍ, ຕາງໜ້າບັນດາພະແນກການຂັ້ນແຂວງ, ການນຳຂັ້ນເມືອງ  ແລະ ແຂກຖືກເຊີນ ເຂົ້າຮ່ວມ.
    ທ່ານ ນາງ ບາບາຣາ ມາຍເກ ກ່າວວ່າ: ການສົ່ງເສີມວຽກງານອົງການຈັດຕັ້ງສັງຄົມລາວ ເປັນວຽກທີ່ ມີຄວາມສຳຄັນ ໃນວຽກງານການທູດ ແລະ ການຮ່ວມມືຂອງບັນດາປະເທດ ສະມາຊິກສະຫະພາບເອີຣົບ.  ໃນຫຼາຍປີທີ່ຜ່ານມາ ອົງການຈັດຕັ້ງສັງຄົມລາວ ແລະ ແຜນງານເຊກາ ໄດ້ມີການພັດທະນາຮ່ວມມືຢ່າງສະໜິດ ແໜ້ນ, ຜູ້ໃຫ້ທຶນສະຫະພາບເອີຣົບ ກໍຄືແຜນງານເຊກາ ມີຄວາມພາກພູມໃຈ ທີ່ໄດ້ເປັນຜູ້ສະໜັບສະໜູນຫຼັກໃຫເແກ່ ງານວາງສະແດງຜົນງານ ແລະ ຜະລິດຕະພັນຂອງອົງການຈັດຕັ້ງສັງຄົມລາວຢູ່ສູນກາງ ແລະ ແຂວງຫຼວງພະບາງ ທີ່ຜ່ານມາ ແລະ ໃນມື້ນີ້ ການສະໜັບສະໜູນກໍໄດ້ຂະຫຍາຍມາທີ່ແຂວງຄຳມ່ວນ. ຊຶ່ງງານດັ່ງກ່າວແມ່ນຈະເຮັດ ໃຫ້ບັນດາອົງການຈັດຕັ້ງສັງຄົມ ໄດ້ມີໂອກາດວາງສະແດງຜົນສຳເລັດ. ຜົນງານເຫຼົ່ານີ້ ຈະເປັນການປະກອບ ສ່ວນອັນສຳຄັນ ແລະ ສ້າງຜົນປະໂຫຍດຢ່າງຫຼວງຫຼາຍໃຫ້ແກ່ສັງຄົມລາວ ລວມທັງແມ່ຍິງ, ຊົນເຜົ່າ, ກຸ່ມຄົນ ຫຼາຍຫຼາກ ແລະ ຄົນພິການ.
    ງານວາງສະແດງຜົນງານຄັ້ງນີ້, ບໍ່ພຽງແຕ່ເປັນການສະແດງໃຫ້ເຫັນຜົນງານ, ຜົນສຳເລັດ, ຜົນຜະລິດ ທີ່ກາຍເປັນຜະລິດຕະພັນ ແລະ ສິນຄ້າຂອງບັນດາສະມາຄົມ ແລະ ກຸມຫັດຖະກຳເທົ່ານັ້ນ ແຕ່ຍັງເປັນຂີດໝາຍ ອັນສຳຄັນເພື່ອເປັນການໂຄສະນາ ແລະ ເຜີຍແຜ່ກ່ຽວກັບບົດບາດ, ຄວາມໝາຍ, ຄວາມສຳຄັນໃນການປະ ກອບສ່ວນຂອງອົງການຈັດຕັ້ງສັງຄົມລາວ ເຂົ້າໃນການພັດທະນາປະເທດຊາດ ແລະ ຍັງເປັນເວທີແລກປ່ຽນບົດຮຽນ ແລະ ຄວາມຮູ້ຫຼາກຫຼາຍຫົວຂໍ້ ເປັນຕົ້ນ: ວັດທະນະທຳ, ການທ່ອງທ່ຽວ, ຄວາມສະເໝີພາບຂອງແມ່ຍິງ, ຊົນເຜົ່າ, ສິ່ງແວດລ້ອມ ແລະ ສຸຂະພາບ. ທັງເປັນການສ້າງໂອກາດໃຫ້ອົງການຈັດຕັ້ງສັງຄົມລາວ ພາກກາງ ແລະ ພາກໃຕ້ ວາງສະແດງຜົນງານ ແລະ ສິນຄ້າ ເພື່ອຊຸກຍູ້, ສົ່ງເສີມ, ຮັກສາສີໄມ້ລາຍມື ທີ່ເປັນວັດທະນະທຳຂອງຄົນລາວ ທັງເປັນການປະກອບສ່ວນຊຸກຍູ້ວຽກງານການທ່ອງທ່ຽວພາຍໃນໃຫ້ມີຄວາມຄຶກຄື້ນ.
    ພາຍໃນງານດັ່ງກ່າວ ຍັງມີກິດຈະກໍາທີ່ຫຼາກຫຼາຍເປັນຕົ້ນ: ການສົນທະນາແລກປ່ຽນຄວາມຮູ້ທາງດ້ານ ວັດທະນະທຳ ແລະ ການທ່ອງທ່ຽວ, ການໃຫ້ຄວາມຮູ້ກ່ຽວກັບໄພພິບັດ, ສຸຂະພາບຈະເລີນພັນ, ສິ່ງແວດລ້ອມ, ການເຄື່ອນຍ້າຍແຮງງານແບບຖືກກົດໝາຍ, ການຫຼິ້ນເກມ, ຖາມ-ຕອບ ແຈກຂອງລາງວັນ, ຮັບຊົມການສະແດງ ສິລະປະ-ວັນນະຄະດີ ແລະ ອື່ນໆ.
(ຂ່າວ-ພາບ: ກອງຄຳ)