ອົງການກວດກາແຫ່ງລັດຈະສືບຕໍ່ກວດກາຄືນຫຼາຍໂຄງການ

ທ່ານ ຄໍາພັນ ພົມມະທັດ ກ່າວວ່າ: ແຜນເຄື່ອນໄຫວປີ 2026ອົງການກວດກາແຫ່ງລັດ ຈະສືບຕໍ່ຮ່າງບົດແນະນໍາວ່າດ້ວຍການຈັດຕັ້ງປະຕິບັດກົດລະບຽບຂອງພັກ ສະໄໝທີ XII; ຮ່າງບົດວິພາກການ ສ້າງຕັ້ງສະຖາບັນຄົ້ນຄວ້າວຽກງານກວດກາ; ຮ່າງຂໍ້ກໍານົດວ່າດ້ວຍການກວດກາຂ້າມຂັ້ນ; ຮ່າງລັດຖະບັນຍັດວ່າດ້ວຍການແຈ້ງຊັບສິນ; ຮ່າງລະບຽບວ່າດ້ວຍການເປີດເຜີຍຜົນຂອງການກວດກາ ແລະ ການແກ້ໄຂຜົນຂອງການກວດກາ; ປັບປຸງບົດສອນຕາມໂຄງການຫຼັກສູດຝຶກອົບຮົມວຽກງານກວດກາໄລຍະ 3 ເດືອນ ແລະ ອື່ນໆ; ສືບຕໍ່ຄົ້ນຄວ້າຄໍາຮ້ອງ-ຄໍາສະເໜີ ຈໍານວນ 56 ສະບັບ ໃຫ້ສໍາເລັດພ້ອມທັງເອົາໃຈໃສ່ຄົ້ນຄວ້າຄໍາຮ້ອງ-ຄໍາສະເໜີຂອງສະມາຊິກພັກ-ພະນັກງານ ລວມທັງປະຊາຊົນ ເພື່ອໃຫ້ພາກສ່ວນກ່ຽວຂ້ອງນໍາໄປແກ້ໄຂໂດຍໄວ; ໂຄສະນາເຜີຍແຜ່ເອກະສານການແຈ້ງຊັບສິນ, ເອກະສານຕ້ານການສໍ້ລາດບັງຫຼວງ, ຂຶ້ນຫ້ອງບັນຍາຍ ແລະ ຈັດກິດຈະກຳຕ່າງໆ.

ສືບຕໍ່ດໍາເນີນການສືບສວນ-ສອບສວນ 4 ເປົ້າໝາຍ ໃຫ້ໄດ້ສະຫຼຸບສົ່ງໄອຍະການ; ສືບຕໍ່ດໍາເນີນການກວດກາ 6 ວຽກ ໃຫ້ສໍາເລັດຄື: 1). ສືບຕໍ່ກວດກາໂຄງການລົງທຶນຂອງລັດ ຢູ່ນະຄອນຫຼວງວຽງຈັນ ຈໍານວນ 58 ໂຄງການ (ສໍາລັບໂຄງການທີ່ບໍ່ທັນໄດ້ກວດກາ ຈໍານວນ 106 ໂຄງການ ແມ່ນຈະບໍ່ສືບຕໍ່ ກວດກາ);2). ສືບຕໍ່ກວດກາເຂດເສດຖະກິດພິເສດທີ່ຍັງບໍ່ສໍາເລັດ 5 ເຂດ; 3). ສືບຕໍ່ກວດກາການນຳເຂົ້າພາຫະນະຊົ່ວຄາວ, ຍົກເວັ້ນພາສີ-ອາກອນ ແລະ ການເສຍພາສີອາກອນ 1% ຕາມນະໂຍບາຍສົ່ງເສີມການລົງທຶນ; 4). ສືບຕໍ່ກວດກາຖານລາຍຮັບຫົວໜ່ວຍທຸລະກິດທັງພາຍໃນ ແລະ ຕ່າງປະເທດ ແລະ ຖານລາຍຮັບຫົວໜ່ວຍວິຊາການຂອງອົງການບໍລິຫານລັດ; 5). ສືບຕໍ່ກວດກາການອອກໃບຕາດິນ ແລະ ການເສຍພາສີທີ່ດິນ; 6). ກວດກາກອງສະໜາມບິນລາວ ແລະ ກອງຈາລະຈອນທາງອາກາດລາວ. ພ້ອມກັນນັ້ນ, ກໍສືບຕໍ່ດໍາເນີນກວດກາຄື: 1). ສືບຕໍ່ກວດກາການຄຸ້ມຄອງ ແລະ ນໍາໃຊ້ເງິນກູ້ຢືມຂອງລັດຖະບານມາຈັດຕັ້ງປະຕິບັດໂຄງການ ໃນຮູບແບບ EPC ໃນຂອບເຂດທົ່ວປະເທດລວມທັງບ້ວງເພື່ອປັບປຸງກໍ່ສ້າງລະບົບນໍ້າປະປາ ດົງໝາກຄາຍ 2; 2). ສືບຕໍ່ກວດກາການນໍາເຂົ້າ ແລະ ຄຸ້ມຄອງສານເຄມີ; 3). ສືບຕໍ່ກວດກາການຄຸ້ມຄອງຊັບສິນຂອງລັດ, ການເຊົ່າສໍາປະທານຊັບສິນ ແລະ ທີ່ດິນຂອງລັດ; 4). ສືບຕໍ່ຕິດຕາມ, ຊຸກຍູ້ການຈ່າຍເງິນຊົດເຊີຍໃຫ້ປະຊາຊົນທີ່ຖືກຜົນກະທົບຈາກໂຄງການກໍ່ສ້າງທາງລົດໄຟ ລາວ-ຈີນ ແລະ ວຽກອື່ນໆ ຕາມພາລະບົດບາດ ແລະ ຕາມການມອບໝາຍ ແລະ ວຽກງານອື່ນໆ.

ພ້ອມນັ້ນ,ຕິດຕາມ, ຊຸກຍູ້ການແກ້ໄຂຜົນຂອງການກວດກາ ບັນດາເປົ້າໝາຍທີ່ຍັງຈັດຕັ້ງແກ້ໄຂບໍ່ທັນສໍາເລັດ ເປັນຕົ້ນ1). ການຫັກລົບມູນຄ່າໂຄງການທີ່ບໍ່ຖືກຕ້ອງຕາມລະບຽບການຕ່າງໆ; 2). ການປ່ອຍເງິນກູ້ຂອງລັດຖະບານ ຜ່ານ 2 ທະນາຄານ; 3). ໂຄງການນອກແຜນ ທີ່ສະພາແຫ່ງຊາດເຫັນດີຮັບຮອງສະເໜີຄົ້ນຄວ້າພິຈາລະນາເຂົ້າແຜນ ແລະ ອື່ນໆ ດັ່ງທີ່ໄດ້ລາຍງານມາຂ້າງເທິງນັ້ນ;ລາຍງານ ຫາລັດຖະບານ ເພື່ອຊີ້ນໍາ ບັນດາກະຊວງ-ອົງການ, ອົງການປົກຄອງທ້ອງຖິ່ນແກ້ໄຂໃຫ້ຂາດໂຕ. ສໍາລັບ9 ເປົ້າໝາຍ ທີ່ການແກ້ໄຂບໍ່ມີຄວາມຄືບໜ້າ ແລະ ແກ່ຍາວເວລາ 1). ການແກ້ໄຂ 4 ກົມ ຂອງກະຊວງການເງິນ; 2). ການຂາຍໄມ້ບໍ່ຜ່ານການປະມູນ ແລະ ຂາຍຫຼຸດລາຄາກາງ ຂອງກະຊວງອຸດສາຫະກຳ ແລະ ການຄ້າ ຈໍານວນ 9 ພາກສ່ວນ; 3). ໜີ້ຕ້ອງຮັບ ປີ 2018 ຂອງ 8 ກະຊວງ; 4). ໂຄງການທີ່ມີມູນຄ່າສູງກວ່າ 20%; 5). ໂຄງການກໍ່ສ້າງທາງ 7 ເສັ້ນ ເທດສະບານເມືອງທ່າແຂກ; 6). ການເກັບກູ້ຄືນໜີ້ສິນນໍາບໍລິສັດຈໍານວນໜຶ່ງ ທີ່ພາກລັດເອງກໍເປັນໜີ້ກັບບັນດາບໍລິສັດດັ່ງກ່າວ; ປັບປຸງແບບແຜນ, ວິທີເຮັດວຽກໃຫ້ດີຂຶ້ນອີກ ໂດຍນໍາໃຊ້ເຕັກໂນໂລຊີ, ອຸປະກອນເຄື່ອງມືທີ່ທັນສະໄໝເຂົ້າຊ່ວຍໃນວຽກງານກວດກາຫຼາຍຂຶ້ນ.

(ຂ່າວ: ວັນເພັງ, ພາບ: ອ່າຍຄໍາ)