ອົງການກວດສອບແຫ່ງລັດປະກາດການແຕ່ງຕັ້ງ

ໃນພິທີ, ທ່ານ ນັນທະພົນ ລີວັດທະນາ ຮອງຫົວໜ້າກົມຄຸ້ມຄອງພະນັກງານ ຕາງໜ້າຄະນະຈັດຕັ້ງສູນກາງພັກ ຜ່ານລັດຖະດໍາລັດ ວ່າດ້ວຍການແຕ່ງຕັ້ງຮອງປະທານອົງການກວດສອບແຫ່ງລັດ ສະບັບເລກທີ 115/ປປທ, ລົງວັນທີ 1 ກໍລະກົດ 2026, ປະທານປະເທດ ແຫ່ງ ສປປ ລາວ ອອກລັດຖະດໍາລັດແຕ່ງຕັ້ງ ທ່ານ ນາງ ຕຸລາວັນ ພິມມະສອນ ກໍາມະການຄະນະບໍລິຫານງານພັກ ຫົວໜ້າຫ້ອງການ ອົງການກວດສອບແຫ່ງລັດ ຂຶ້ນເປັນຮອງປະທານອົງການກວດສອບແຫ່ງລັດ. ພ້ອມດຽວກັນນັ້ນ ທ່ານ ນາງ ສີຕານ ໄຊຍະວົງເພັດ ຫົວໜ້າກົມຈັດຕັ້ງ ອົງການກວດສອບແຫ່ງລັດ ກໍໄດ້ຜ່ານຂໍ້ຕົກລົງຂອງປະທານອົງການກວດສອບແຫ່ງລັດ ວ່າດ້ວຍການສັບຊ້ອນ ທ່ານ ນາງ ວານິດາ ສຸດທານິລະໄຊ ຮອງປະທານອົງການກວດສອບປະຈໍາພາກກາງ 1 ມາຮັບໜ້າທີ່ໃໝ່ ເປັນຫົວໜ້າຫ້ອງການ ແລະ ແຕ່ງຕັ້ງທ່ານ ນາງ ຈັນໄພວັນ ຂຸນສັກດາ ຫົວໜ້າພະແນກການເງິນ ຫ້ອງການຂຶ້ນເປັນ ຮອງຫົວໜ້າຫ້ອງການ ອົງການກວດສອບແຫ່ງລັດ. ໂດຍເປັນກຽດມອບລັດຖະດໍາລັດຂອງປະທານປະເທດ ແຫ່ງ ສປປ ລາວ ແລະ ຂໍ້ຕົກລົງ ໂດຍທ່ານ ວຽງທະວີສອນ ເທບພະຈັນ ໃຫ້ແກ່ທ່ານທີ່ຖືກແຕ່ງຕັ້ງ.

ໃນຕອນທ້າຍ, ພິທີກໍໄດ້ຮັບຟັງການໂອ້ລົມຂອງທ່ານປະທານກອງປະຊຸມ ຊຶ່ງໄດ້ຊີ້ນໍາໃຫ້ບັນດາທ່ານທີ່ໄດ້ຮັບການແຕ່ງຕັ້ງ ແລະ ສັບຊ້ອນ ພ້ອມດ້ວຍພະນັກງານຫຼັກແຫຼ່ງທຸກສະຫາຍເອົາໃຈໃສ່ຢ່າງຕັ້ງໜ້າໃນຫຼາຍບັນຫາ ເປັນຕົ້ນ: (1) ໃຫ້ຄະນະນໍາແຕ່ລະຂັ້ນເອົາໃຈໃສ່ເຜີຍແຜ່ເຊື່ອມຊຶມບັນດາ ແນວທາງ, ນະໂຍບາຍຂອງພັກ-ລັດ, ມະຕິ, ຄຳສັ່ງຂອງພັກ ໃຫ້ສະມາຊິກພັກ, ພະນັກງານ-ລັດຖະກອນ ຢ່າງເລິກເຊິງເຖິງຖອງ; ສຶກສາອົບຮົມແນວຄິດ-ການເມືອງ ໃຫ້ພະນັກງານຂອງອົງການກວດສອບແຫ່ງລັດ ໃຫ້ມີແນວຄິດອຸ່ນອ່ຽນທຸ່ນທ່ຽງ, ເຄົາລົບກົດໝາຍ, ລະບຽບການ ແລະ ປະຕິບັດໄດ້ກົດຈັນຍາບັນຂອງນັກກວດສອບຢ່າງເຂັ້ມງວດ; (2) ປັບປຸງຂອດປະສານງານພາຍໃນໃຫ້ມີຄວາມກົມກຽວກັນ, ແບ່ງຄວາມຮັບຜິດຊອບກັນຢ່າງຈະແຈ້ງ ແລະ ຕິດຕາມກວດກາການຈັດຕັ້ງປະຕິບັດວຽກງານຢ່າງຕໍ່ເນື່ອງ; ປັບປຸງຍົກລະດັບດ້ານວຽກງານວິຊາສະເພາະກວດສອບໃຫ້ມີຄວາມເຂັ້ມແຂງ, ຫັນເປັນນັກກວດສອບມືອາຊີບເທື່ອລະກ້າວ; (3) ຍົກສູງຄວາມເປັນເຈົ້າການໃນການເປັນເສນາທິການໃຫ້ແກ່ຄະນະນຳອົງການກວດສອບແຫ່ງລັດ ບໍ່ວ່າຈະເປັນວຽກງານປິ່ນອ້ອມ ຫຼື ວຽກງານວິຊາສະເພາະ ກໍຕ້ອງໃຫ້ບັນລຸຕາມແຜນການທີ່ກໍານົດໄວ້ ແລະ (4) ໃຫ້ສືບຕໍ່ຮັກສາມູນເຊື້ອແບບແຜນວິທີເຮັດວຽກ ແລະ ຮັດແໜ້ນຄວາມສາມັກຄີພາຍໃນເປັນປຶກແຜ່ນແໜ້ນໜາ, ເພື່ອບັນລຸຜົນສຳເລັດການປະຕິບັດໜ້າທີ່ວຽກງານຂອງຕົນ.

(ຂ່າວ: ອົງການກວດສອບແຫ່ງລັດ)