 |
ສະຫາຍ ພັອ ສີສົມພູ ແກ້ວບຸນລ້ອມ ໄດ້ກ່າວເປີດກອງປະຊຸມຢ່າງເປັນທາງການພ້ອມທັງຜ່ານຮ່າງລາຍງານການເມືອງທັງ 2 ພາກ. ຊຶ່ງໃນບົດລາຍງານເມືອງໄດ້ຕີລາຄາການນໍາພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກ ກໍຄືການຕີລາຄາສະພາບການຮອບດ້ານຕະຫຼອດໄລຍະ 5 ປີຜ່ານມາ (2020-2024). ໃນນັ້ນ, ໄດ້ຍົກໃຫ້ເຫັນດ້ານດີ,ດ້ານອ່ອນ,ຂໍ້ຄົງຄ້າງ,ບົດຮຽນທີ່ຖອດຖອນໄດ້ ແລະ ທິດທາງ,ໜ້າທີ່ຂອງອົງຄະນະພັກ ກອງບັນຊາການທະຫານແຂວງໃນ 5 ປີອຕໍ່ໜ້າ (2025-2029).
ໃນກອງປະຊຸມ, ຍັງໄດ້ຮັບຟັງການປະກອບຄໍາເຫັນຂອງຜູ້ແທນທີ່ຕາງໜ້າໃຫ້ແກ່ຄະນະພັກຮາກຖານຫ້ອງເສນາທິການ,ຄະນະພັກຮາກຖານຫ້ອງການເມືອງ ແລະ ຄະນະພັກຮາກຖານຫ້ອງພະລາທິການໃສ່ຮ່າງລາຍງານການເມືອງທັງ2 ພາກ. ສະຫາຍ ພັອ ບຸນເລີດ ບຸບຜາວັນ ຮອງເລຂາຄະນະພັກຫົວໜ້າການທະຫານ ກອງບັນຊາການທະຫານແຂວງໄດ້ຜ່ານບົດສໍາຫຼວດການນໍາພາ-ຊີ້ນໍາ ຂອງຄະນະພັກຊຸດປະຈຸບັນ. ຈາກນັ້ນ, ຄະນະພັກຊຸດເກົ່າກໍ່ໄດ້ກ່າວລາໜ້າທີ່,ພ້ອມທັງຜ່ານມາດຖານ-ເງື່ອນໄຂຂອງຜູ້ສະໝັກຮັບເລືອກຕັ້ງເປັນຄະນະພັກຊຸດໃໝ່ ຊຶ່ງມີຜູ້ສະໝັກທັງໝົດ 14ສະຫາຍ,ເລືອກຕັ້ງເອົາ 11 ສະຫາຍ. ພ້ອມກັນນັ້ນຍັງໄດ້ເລືອກຕັ້ງເອົາຜູ້ແທນສົມບູນຈໍານວນ 25 ສະຫາຍ ແລະ ສໍາຮອງຈໍານວນ 3 ສະຫາຍໄປຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງຄໍາມ່ວນຄັ້ງທີ XI.
 |
ກອງປະຊຸມຄັ້ງປະຖົມມະລຶກໄດ້ເປັນເອກະສັນຢ່າງສົມບູນເລືອກເອົາສະຫາຍ ພັອ ສີສົມພູ ແກ້ວບຸນລ້ອມເປັນເລຂາຄະນະພັກ, ສະຫາຍ ພັອ ບຸນເລີດ ບຸບຜາວັນເປັນຮອງເລຂາ, ເລືອກເອົາສະຫາຍ ພັອ ພັນມະຫາ ຈຸມມະນີເປັນປະທານກວດກາຄະນະພັກ, ສະຫາຍ ພັທ ຄູນຄໍາ ແສງສະຫວັນ ແລະ ສະຫາຍ ພັທ ຄໍາມອນ ແດງເມືອງພອນເປັນຮອງປະທານກວດກາຄະນະພັກ.
(ຂ່າວ-ພາບ: ແດງສະຫວັດ ແສນພານິດ)
ຄໍາເຫັນ