 |
ທ່ານ ພັຕ ພິມມະສອນ ສາຍສຸວັນ ຄະນະພັກ ຄະນະບັນຊາ ກອງບັນຊາການທະຫານເມືອງ ຫົວໜ້າພະແນກເສນາ ໄດ້ຜ່ານຂໍ້ຕົກລົງຂອງປະທານສອງກໍາລັງປະກອບອາວຸດ, ຜ່ານແຜນການເຄື່ອນໄຫວການຮຽນ-ການສອນໃຫ້ນັກຮຽນຊັ້ນ ມ7 ໃນທົ່ວເມືອງທ່າແຕງ ສົກຮຽນ 2025-2026 ວ່າ: ນັກຮຽນຊັ້ນ ມ7 ທີ່ເຂົ້າຮ່ວມອົບຮົມ-ຫັດແອບຄັ້ງນີ້ມີ 217 ຄົນ ຍິງ 92 ຄົນ ຊຶ່ງຈະໄດ້ຜ່ານການອົບຮົມ-ຫັດແອບວຽກງານສຶກສາ ປກຊ-ປກສ ທົ່ວປວງຊົນໃນສະພາບການໃໝ່, ຮຽນຮູ້ກ່ຽວກັບຍຸດທະສາດ ແລະ ແນວທາງ ປກຊ-ປກສ ຂອງພັກແຕ່ລະໄລຍະ ໂດຍນັກຮຽນຈະໄດ້ຮຽນຮູ້ພາກທິດສະດີ ແລະ ພາກການທະຫານ. ໃນນີ້, ຈະສຸມໃສ່ເອກະສານຄວາມໝາຍສໍາຄັນ ວ່າດ້ວຍວຽກງານສຶກສາ ປກຊ-ປກສ, ຄໍາປະຕິຍານ ແລະ ກົດລະບຽບຕໍ່ປະຊາຊົນ, ມູນເຊື້ອກອງ ທັບປະຊາຊົນລາວ, ກົດໝາຍ ວ່າດ້ວຍພັນທະປ້ອງກັນຊາດ, ຄວາມຮູ້ພື້ນຖານກ່ຽວກັບເຫຼົ່າຮົບໃນກອງທັບປະຊາຊົນລາວ. ສ່ວນພາກການທະຫານ ຈະສຸມໃສ່ວິຊາສິລະປະຍຸດ, ຍຸດທະວິທີ ແລະ ວິຊາລະບຽບຮູບແຖວ ໂດຍຈະໃຊ້ເວລາ 5 ວັນ, ນັບແຕ່ວັນທີ 22 ເຖິງ 26 ມິຖຸນາ 2026.
 |
ໂອກາດນີ້, ທ່ານ ພັທ ຄໍາສະໄຫວ ບຸດດາຜົນ ໄດ້ເນັ້ນໃຫ້ນັກຮຽນ ຈົ່ງພ້ອມກັນຕັ້ງໃຈຮໍ່າຮຽນດ້ວຍຄວາມມານະອົດທົນໃຫ້ຖືກຕ້ອງຕາມຫຼັກການຮຽນ-ການສອນ ແລະ ພ້ອມກັນປະຕິບັດກົດລະບຽບຢ່າງເຂັ້ມງວດ.
ຂ່າວ-ພາບ: ພອນ ບຸນອຸທິດ
ຄໍາເຫັນ