ມີທ່ານ ມະໂນທອງ ວົງໄຊ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ທັງເປັນປະທານ ສພກລ ພ້ອມດ້ວຍຄະນະຄູຝຶກນັກກິລາ, ຕາງໜ້າຜູ້ສະໜັບສະໜູນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ຄໍາພະໄພວັນ ວົງໄຊ ຮອງປະທານ-ເລຂາທິການ ສພກລ ກ່າວວ່າ: ໃນປີ 2024 ສພກລ ສົ່ງຄະນະນໍາຄູຝຶກ ແລະ ນັກກິລາເຂົ້າຮ່ວມແຂ່ງຂັນເວທີສາກົນ ປະກອບມີ: ເຂົ້າຮ່ວມແຂ່ງຂັນເພາະກາຍຊີງແຊັມອາຊຽນຄັ້ງທີ 18 ທີ່ ສປປ ລາວ ສາມາດຍາດໄດ້ 5 ຫຼຽນຄໍາ 4 ຫຼຽນເງິນ ແລະ 15 ຫຼຽນທອງ, ເຂົ້າຮ່ວມແຂ່ງຂັນຊີງແຊັມອາຊີ ຄັ້ງທີ 56 ທີ່ປະເທດອິນໂດເນເຊຍ ຍາດໄດ້ 1 ຫຼຽນເງິນ ແລະ ເຂົ້າຮ່ວມແຂ່ງຂັນຊີງແຊັມໂລກຄັ້ງທີ 15 ທີ່ປະເທດເມົາດິບ ຍາດໄດ້ 2 ຫຼຽນຄໍາ 2 ຫຼຽນເງິນ ແລະ 1 ຫຼຽນທອງ ຜົນງານຄະນະບໍລິຫານງານສະຫະພັນ ແລະ ນັກກິລາເພາະກາຍທີມຊາດລາວ ໄດ້ຮັບການຍ້ອງຍໍຈາກລັດຖະບານ ແລະ ໄດ້ຮັບເງິນອຸດໜູນຈາກຜົນງານຫຼຽນລາງວັນ ລວມເປັນເງິນ 388 ລ້ານກວ່າກີບ.
ຈາກຜົນງານດັ່ງກ່າວ, ລັດຖະບານໄດ້ມອບຫຼຽນໄຊແຮງງານຊັ້ນ I ມີຈໍານວນ 6 ທ່ານຄື: ທ່ານ ຄໍາພະໄພວັນ ວົງໄຊ, ທ່ານ ກົງປະເສີດ ແພງແສນ, ທ່ານນາງ ຢາດຝົນ ກົມມະດໍາ, ທ່ານ ທະວີສັກ ຊື່ນນະພາ, ທ່ານນາງ ຈິນຕະນາ ຄໍາບຸນເຮືອງ ແລະ ທ້າວ ຄໍາຫຼ້າ ສາມະວົງ, ສ່ວນຫຼຽນໄຊແຮງງານຊັ້ນ II ລວມມີ 4 ທ່ານ ປະກອບມີທ່ານ ມະໂນທອງ ວົງໄຊ, ທ່ານ ເພັດສະລັດ ສະຫວັນ, ທ່ານ ນັນທະລັກ ສຸນາເຄນ ແລະ ທ່ານ ອິນກອນ ສີວິໄລ. ຂະນະທີ່ຫຼຽນໄຊແຮງງານຊັ້ນ III ລວມມີ 6 ທ່ານ, ປະກອບມີທ່ານ ດາວທະວີ ເທບສຸວັນ, ທ່ານ ສັນຕິສຸກ ດວງແກ້ວມະນີ, ທ່ານ ສຸທິດາວີ ວົງສຸທິ, ທ່ານນາງ ກຽງຄໍາ ໝື່ນດວງ, ທ່ານ ຄໍາລີງ ຈະເລີນ, ທ່ານ ແກ້ວຕາ ພະພິລົມລາສັກ. ນອກນັ້ນ, ຍັງມີຫຼຽນກາແຮງງານຈໍານວນ 12 ໜ່ວຍ, ໃບຍ້ອງຍໍຂັ້ນລັດຖະບານ10 ໃບ, ໃບຍ້ອງຍໍຂັ້ນກະຊວງ 12 ໃບມອບໃຫ້ຄະນະບໍລິຫານງານສະຫະພັນ, ຄະນະຄູຝຶກ ແລະ ນັກກິລາ ຕະຫຼອດຮອດບັນດາຜູ້ໃຫ້ການສະໜູນກິລາດັ່ງກ່າວອີກດ້ວຍ.
ຂ່າວ: ສີພອນ
ຄໍາເຫັນ