ປະທານ ອພສ ແຂວງຫຼວງພະບາງ ເຄື່ອນໄຫວຢ້ຽມຢາມເມືອງວຽງຄຳ

ໂອກາດນີ້, ທ່ານ ຄຳສິງ ສຸດທິດາ ປະທານຄະນະກຳມະການປົກຄອງເມືອງ ໄດ້ກ່າວຕ້ອນຮັບ ແລະລາຍງານສະພາບການພັດທະນາເສດຖະກິດ-ສັງຄົມຂອງເມືອງ ໂດຍຫຍໍ້ວ່າ: ຜ່ານມາ, ຄະນະນຳເມືອງໄດ້ເອົາໃຈໃສ່ສຶກສາອົບຮົມທຸກພາກສ່ວນໃຫ້ເປັນເຈົ້າການເຂົ້າຮ່ວມ ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ສ້າງພື້ນຖານດ້ານເສດຖະກິດ ການຜະລິດ ແລະ ການຫຼຸດຜ່ອນຄວາມທຸກຍາກໃຫ້ນັບມື້ດີຂຶ້ນ, ໄດ້ສົ່ງເສີມປະຊາຊົນ-ນັກທຸລະກິດ ປູກພຶດກະສິກຳ ແລະ ອຸດສະຫາກຳເປັນສິນຄ້າ ເຊັ່ນ: ໝາກເດືອຍ, ສາລີ, ຢ່າງພາລາ ແລະ ກາເຟ, ວຽກງານການສຶກສາ ແລະ ສາທາລະນະສຸກ ໄດ້ຈັດຕັ້ງປະຕິບັດບັນດາຄາດໝາຍຈຸດສຸມບັນລຸຕາມແຜນ, ສຳລັບການເຄື່ອນໄຫວວຽກງານສາສະໜາ ທົ່ວເມືອງມີວັດທັງໝົດ 7 ແຫ່ງ, ໃນນັ້ນມີພະສົງປະຈຳ 2 ວັດ, ມີພະສົງສາມະເນນທັງໝົດ 9 ອົງ, ມີພະ 3 ອົງ.

ຜ່ານມາໄດ້ມີການເຄື່ອນໄຫວສອດຄ່ອງກັບລະບຽບ-ກົດໝາຍ ແລະ ທຳມະນູນສົງຢ່າງຕັ້ງໜ້າ, ສາມາດປຸກລະດົມຊາວພຸດທະສາສະນິກະຊົນ ປະກອບສ່ວນເຮັດບຸນ-ກິນທານໄດ້ເປັນປົກກະຕິ. ຈາກນັ້ນ. ພະອາຈານໃຫຍ່ ອ່ອນແກ້ວ ກິຕຕິພັທໂທ ໄດ້ກ່າວວ່າ: ໃນນາມທີ່ເປັນກໍາມະການສູນກາງແນວລາວສ້າງຊາດ ຊຶ່ງມີພາລະບົດບາດ, ໜ້າທີ່ເຕົ້າໂຮມຄວາມສາມັກຄີພຸດທະສາສະນິກະຊົນບັນດາເຜົ່າ ແລະ ສົ່ງເສີມຮີດຄອງປະເພນີອັນດີງາມທີ່ຊາວລາວເຄີຍປະຕິບັດກັນມາແຕ່ດົນນານ. ຮຽກຮ້ອງໃຫ້ທົ່ວສັງຄົມ ພ້ອມກັນທົບທວນວຽກງານພຸດທະສາສະໜາຂອງເມືອງຢ່າງເປັນປົກກະຕິ ເພື່ອຮັກສາ ແລະ ທະນຸບຳລຸງໃຫ້ມີຄວາມຈະເລີນຮຸ່ງເຮືອງຕະຫຼອດໄປ, ພ້ອມທັງເນັ້ນໜັກໃຫ້ຄະນະ ອພສ ເມືອງ ເພີ່ມທະວີຄວາມສາມັກຄີພາຍໃນເມືອງ, ຮັກສາຮີດຄອງປະເພນີອັນດີງາມໃຫ້ຍືນຍົງຕະຫຼອດໄປ, ຊຸກຍູ້ການສຶກສາອົບຮົມພະສົງ-ສາມະເນນໃຫ້ເຄື່ອນໄຫວຖືກຕ້ອງຕາມລະບຽບ, ສຸມໃສ່ການຮ່ວມມືປະສານສົມທົບກັບພາກ ສ່ວນທີ່ກ່ຽວຂ້ອງ ເພື່ອເຮັດໃຫ້ວຽກງານ ອພສ ໄດ້ເຄື່ອນໄຫວຕາມພາລະບົດບາດ, ພ້ອມນັ້ນຕ້ອງເປັນເຈົ້າການປົກປັກຮັກສາສັບສິນຂອງພະພຸດທະສາສະໜາໃຫ້ເປັນຢ່າງດີ. ໂອກາດນີ້, ຄະນະບໍລິຫານງານ ອພສ ແຂວງໄດ້ມອບເງິນຈຳນວນໜຶ່ງໃຫ້ຄະນະບໍລິຫານງານ ອພສ ເມືອງວຽງຄຳ ແລະ ຫ້ອງການແນວລາວສ້າງຊາດເມືອງ ເພື່ອນຳໃຊ້ເຂົ້າໃນວຽກງານບໍລິຫານ.

ຂໍ້ມູນ-ພາບ: ອພສ ແຂວງຫຼວງພະບາງ