ປະທານປະເທດ ເນັ້ນຫຼາຍບັນຫາໃຫ້ແນວລາວສ້າງຊາດສືບຕໍ່ເອົາໃຈໃສ່

ສະຫາຍ ທອງລຸນ ສີສຸລິດ ເນັ້ນໜັກວ່າ: ແນວລາວສ້າງຊາດຕ້ອງໄດ້ໃຫ້ຄວາມສໍາຄັນຕໍ່ການສືບຕໍ່ຕັ້ງໜ້າເສີມຂະຫຍາຍທີ່ຕັ້ງ, ບົດບາດຂອງແນວລາວສ້າງຊາດໃນການເຕົ້າໂຮມມະຫາສາມັກຄີເປັນປຶກແຜນຂອງຊາດ, ເຊີດຊູສະຕິເປັນເຈົ້າ, ເອກະພາບເປັນອັນໜຶ່ງອັນດຽວ, ຍົກສູງຈິດໃຈເອ ກະລາດເປັນເຈົ້າຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເພີ່ມທະວີຄວາມຮັບຜິດ ຊອບຂອງຄົນລາວຕໍ່ຊາຕາກຳຂອງປະເທດຊາດ, ບໍ່ໃຫ້ອິດທິກຳລັງໃດໆມາມ້າງເພ ແລະ ທໍາລາຍໄດ້. ຕ້ານບັນດາປັດໄຈໜໍ່ແໜງ, ການສວຍໃຊ້ສາສະໜາ, ບັນຫາສິດທິມະນຸດ, ບັນຫາປະຊາທິປະໄຕແບບຈອມປອມເຂົ້າມາມ້າງເພປະເທດຊາດ ເພື່ອຫັນເອົາແນວຄິດຂອງຄົນລາວເຜົ່າຕ່າງໆໄປສູ່ຄວາມແຕກແຍກ, ແບ່ງຊັ້ນວັນນະ, ແບ່ງແຍກຄວາມສາມັກຄີ. ຕັ້ງໜ້າເຂົ້າຮ່ວມໃນຂະບວນການສະກັດກັ້ນບັນດາປະກົດການຫຍໍ້ທໍ້ເຊັ່ນ: ບັນຫາຢາເສບຕິດ, ໄພສັງຄົມ, ການສວຍໃຊ້ຖານະຕຳແໜ່ງ ເພື່ອຫາຜົນປະໂຫຍດສ່ວນຕົວໃນຖັນແຖວພະນັກງານ, ການສໍ້ລາດບັງຫຼວງ, ການຟຸ່ມເຟືອຍ ແລະ ອື່ນໆ; ແນວລາວສ້າງຊາດ ແລະ ບັນດາອົງການຈັດຕັ້ງການເມືອງ-ສັງຄົມຕ້ອງຍົກສູງຄວາມຮັບຜິດຊອບ ໃນການເສີມຂະຫຍາຍບົດບາດ ຕິດຕາມ, ກວດກາສຽງສະທ້ອນສັງຄົມ ໃນການຜັນຂະຫຍາຍ ແລະ ຈັດຕັ້ງປະຕິບັດແນວທາງ, ນະໂຍບາຍ, ລັດຖະທຳມະນູນ, ກົດໝາຍ ແລະ ລະບຽບການຕ່າງໆ ຂອງລັດ; ເສີມຂະຫຍາຍປະຊາທິປະໄຕໃນສັງຄົມຢ່າງມີຈຸດສຸມ, ສ້າງກົນໄກ ແລະ ລະບຽບການສົ່ງເສີມ ແລະ ຮັບປະກັນໃຫ້ມະຫາຊົນ ໄດ້ເຂົ້າຮ່ວມກວດກາການເຄື່ອນໄຫວຂອງພັກ, ຂອງອົງການລັດ, ຕິດຕາມ, ກວດກາຜູ້ປະຕິບັດໜ້າທີ່ ແລະ ແຈ້ງຂ່າວໃຫ້ການຈັດຕັ້ງຢ່າງທັນການ ດ້ວຍຄວາມເປັນຈິງ ແລະ ສະ ເໜີ ທາງອອກດ້ວຍຄວາມສ້າງສັນບົນຖື້ນຖານຫຼັກການ "ໃຫ້ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຂົ້າຮ່ວມ, ປະຊາຊົນກວດກາ ແລະ ປະຊາຊົນໄດ້ຮັບຜົນປະໂຫຍດ"; ແນວລາວສ້າງຊາດ ຕ້ອງປ່ຽນແປງຢ່າງແຂງແຮງວິທີການຂົນຂວາຍມະຫາຊົນ, ຕ້ອງໃກ້ຊິດກັບມະຫາຊົນດ້ວຍຫຼາຍຮູບແບບ, ຫຼາຍຮູບການ, ຫຼີກລ່ຽງການຫັນເປັນແບບບໍລິຫານອ້ອຍຕ້ອຍ; ຕ້ອງສືບຕໍ່ຢຶດໝັ້ນແບບແຜນທີ່ຖືເອົາການຂົນຂວາຍຊັກຊວນ, ການປຶກສາຫາລື, ປະສານສົມທົບ, ຄວາມເປັນເອກະພາບ ແລະ ຮ່ວມສໍາພັນເປັນພື້ນຖານໃນການເຄື່ອນໄຫວຂອງຕົນ; ປັບປຸງແບບແຜນ, ວິທີ, ເນື້ອໃນ ແລະ ຮູບການເຄື່ອນໄຫວໃຫ້ສອດຄ່ອງ, ອຸດົມຮັ່ງມີ, ຫຼາຍຮູບຫຼາຍສີ, ເໝາະສົມກັບເງື່ອນໄຂໃນໄລຍະໃໝ່ ແລະ ແທດເໝາະກັບແຕ່ລະເປົ້າໝາຍ. ຕ້ອງຫັນການເຄື່ອນໄຫວລົງຮາກຖານ, ເຈືອຈານເຂົ້າກັບມະຫາຊົນ ແລະ ຂະບວນການວຽກງານຕົວຈິງ, ໃກ້ຊິດຕິດພັນກັບປະຊາຊົນ, ກັບຮາກຖານແນວລາວສ້າງຊາດ ຢູ່ຂັ້ນທ້ອງຖິ່ນ (ບ້ານ, ຕາແສງ, ເມືອງ ຕ້ອງໄດ້ມີໜ້າທີ່ເຕົ້າໂຮມຄວາມສາມັກຄີ. ເວລາດຽວກັນນັ້ນ, ຕ້ອງເປັນຜູ້ໄກ່ເກ່ຍຄວາມຂັດແຍ້ງທີ່ເກີດຂຶ້ນໃນທ້ອງຖິ່ນໃນຊຸມຊົນຢ່າງມີຄວາມນິ້ມນວນ, ເປັນທໍາ ແລະ ສັກສິດ; ຕັ້ງໜ້າປຸກລະດົມປະຊາຊົນລາວບັນດາເຜົ່າສ້າງວິຖີຊີວິດແບບໃໝ່, ແບບແຜນການດໍາລົງຊີວິດ, ຮູ້ທຳມາຫາກິນແບບໃໝ່ທີ່ກ້າວໜ້າ, ຮູ້ນໍາໃຊ້ທ່າແຮງຂອງແຕ່ລະທ້ອງຖິ່ນ, ຂອງແຕ່ລະຄອບຄົວ ເພື່ອເຮັດໃຫ້ແນວທາງ, ນະໂຍບາຍການສ້າງເສດຖະກິດເອກະລາດເປັນເຈົ້າຕົນເອງໃຫ້ເກີດຂຶ້ນ; ຕັ້ງໜ້າ ແລະ ເປັນເຈົ້າການເຂົ້າຮ່ວມວາລະແຫ່ງຊາດວ່າດ້ວຍການພັດທະນາຊົນນະບົດ, ແກ້ໄຂຄວາມທຸກຍາກຂອງປະຊາຊົນ. ສືບຕໍ່ຈັດຕັ້ງປະຕິບັດໂຄງການ “ສ້າງກອງທຶນບ້ານສາມັກຄີ ແລະ ພັດທະນາ” ດ້ວຍຮູບແບບການຮ່ວມມືລະຫວ່າງແນວລາວສ້າງຊາດ, ນັກທຸລະກິດ ແລະ ປະຊາຊົນສ້າງໄດ້ຮູບແບບການທໍາມາຫາກິນທີ່ກ້າວໜ້າ, ມີລັກສະນະຂະຫຍາຍຕົວ, ຕໍ່ຍອດ, ຄົ້ນຄວ້າວິທີນໍາພາປະຊາຊົນ ຮູ້ດໍາເນີນການຜະລິດເປັນສິນຄ້າ, ສ້າງກອງທຶນພັດທະນາຕາມທ້ອງຖິ່ນ, ສ້າງເປັນໜ່ວຍຜະລິດລວມໝູ່ ເພື່ອສົ່ງເສີມການຜະລິດ ແລະ ການຈໍາໜ່າຍ ເພື່ອກ້າວຂຶ້ນເປັນສະຫະກອນເທື່ອລະກ້າວ. ເພີ່ມທະວີຄວາມສາມັກຄີສາກົນ ແລະ ເປີດກ້ວາງສາຍພົວພັນການທູດປະຊາຊົນຕາມແນວທາງການຕ່າງປະເທດຂອງພັກ-ລັດເຮົາ, ຮັດແໜ້ນສາຍພົວພັນມິດຕະພາບ ແລະ ການຮ່ວມມືກັບອົງການແນວໂຮມ ແລະ ອົງການຈັດຕັ້ງປະຊາຊົນຂອງປະເທດເພື່ອນມິດທີ່ມີມູນເຊື້ອ, ປະເທດເພື່ອນບ້ານໃກ້ຄຽງ, ອົງການຈັດຕັ້ງສາກົນ ເພື່ອຍາດແຍ່ງການສະໜັບສະໝູນຊ່ວຍເຫຼືອປະກອບສ່ວນເຂົ້າໃນໂຄງການພັດທະນາເສດຖະກິດ-ສັງຄົມ ຢູ່ປະເທດເຮົາ.

ສະຫາຍ ທອງລຸນ ສີສຸລິດ ກ່າວຕື່ມວ່າ: ສໍາລັບແນວລາວສ້າງຊາດຂັ້ນທ້ອງຖິ່ນ ຕ້ອງໄດ້ເພີ່ມທະວີສາຍພົວພັນມິດຕະພາບ, ຄວາມສາມັກຄີກັບປະຊາຊົນປະເທດເພື່ອນບ້ານແນໃສ່ຂົນຂວາຍປະຊາ ຊົນປະຕິບັດແນວທາງ, ນະໂຍບາຍໃນການປົກປັກຮັກສາຊາຍແດນ, ເຂດນໍ້າແດນດິນຂອງຕົນ, ສ້າງຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມືຮັບຜົນປະໂຫຍດກັບປະຊາຊົນປະເທດທີ່ມີຊາຍແດນຕິດຈອດກັນ ເພື່ອປະກອບສ່ວນເຂົ້າໃນການເສີມສ້າງສະພາບແວດລ້ອມແຫ່ງສັນຕິພາບ, ສະຖຽນລະພາບ, ການຮ່ວມມື ເພື່ອການພັດທະນາ; ສົ່ງເສີມການໄປມາຫາສູ່ ລະຫວ່າງປະຊາຊົນໃຫ້ຖືກຕ້ອງຕາມລະບຽບ ເພື່ອແລກປ່ຽນວັດທະນະທໍາ, ດຶງດູດການລົງທຶນ, ການຄ້າ ແລະ ການທ່ອງ ທ່ຽວ ໃຫ້ນັບມື້ນັບຫຼາຍຂຶ້ນ; ສືບຕໍ່ເຕົ້າໂຮມຂົນຂວາຍ ແລະ ສ້າງເງື່ອນໄຂໃຫ້ຄົນລາວຢູ່ຕ່າງປະເທດ ທີ່ມີຈິດໃຈຮັກເຊື້ອແພງຊາດອວ່າຍໜ້າມາຫາປະເທດຊາດ ເພື່ອປະກອບສ່ວນເຂົ້າໃນພັດທະນາປະເທດຊາດ. ພ້ອມນັ້ນ, ກໍເອົາໃຈໃສ່ປຸກລະດົມຊາວຕ່າງດ້າວ, ຊາວຕ່າງປະເທດທີ່ດຳລົງຊີວິດ, ທຳມາຫາກິນ ແລະ ປະຕິບັດໜ້າທີ່ ຢູ່ ສປປ ລາວ ໃຫ້ຮັບຮູ້-ເຂົ້າໃຈ ແລະ ເຄົາລົບລະບຽບກົດໝາຍ, ວັດທະນະທຳຮີດຄອງປະເພນີອັນດີງາມຂອງລາວ ແລະ ມີຄວາມສາມັກຄີກັບປະຊາຊົນລາວບັນດາເຜົ່າ, ທັງປະ ກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາ ສປປ ລາວ.