ບົດລາຍງານລະບຸວ່າ: ອົງການສະຫະປະຊາຊາດ (UN) ແລະ ຄູ່ຮ່ວມງານດ້ານມະນຸດສະທໍາ ໄດ້ແຈກຢາຍການຊ່ວຍເຫຼືອດ້ານອາຫານຫຼາຍກວ່າ 10,000 ໂຕນ ຜ່ານດ່ານຊາຍແດນ Kerem, Shalom ແລະ Sikim ໃນອາທິດຜ່ານມາ. ໃນຂະນະດຽວກັນ, UN ກຳລັງສະໜັບສະໜູນການຜະລິດເຂົ້າຈີ່ປະມານ 170,000 ກ້ອນຕໍ່ມື້, ແຕ່ລະກ້ອນມີນ້ຳໜັກ 2 ກິໂລກຣາມ, ເພື່ອແກ້ໄຂບັນຫາຄວາມບໍ່ໝັ້ນຄົງດ້ານອາຫານຕື່ມອີກ.
ນອກຈາກນັ້ນ, ອັດຕາສ່ວນການຄຸ້ມຄອງແມ່ນຢູ່ລະຫວ່າງ 50-75% ຂອງຄວາມຕ້ອງການແຄລໍຣີຂັ້ນຕ່ຳນັບຕັ້ງແຕ່ການຢຸດຍິງມີຜົນບັງຄັບໃຊ້ໃນວັນທີ 10 ຕຸລາ 2025.
OCHA ໄດ້ແຈກຢາຍການຊ່ວຍເຫຼືອດ້ານອາຫານໂດຍບໍ່ເສຍຄ່າໃຫ້ແກ່ຄ້າຍຜູ້ອົບພະຍົບຫຼາຍກວ່າ 400 ແຫ່ງ ແລະ ຮ້ານຄ້າທີ່ຢູ່ພາຍໃຕ້ໂຄງການອຸດໜູນອີກປະມານ 150 ແຫ່ງ, ພ້ອມທັງເປີດເຮືອນຄົວ ສຳລັບປຸງແຕ່ງອາຫານຢ່າງຕໍ່ເນື່ອງ ຊຶ່ງປັດຈຸບັນກຳລັງແຈກຢາຍອາຫານຫຼາຍກວ່າ 1.5 ລ້ານຈານຕໍ່ມື້.
ນອກຈາກນັ້ນ, UN ແລະ ຄູ່ຮ່ວມງານຂອງຕົນໄດ້ສົ່ງເຄື່ອງບັນເທົາທຸກຫຼາຍກວ່າ 80,000 pallets ໄປຍັງເຂດກາຊາ ລະຫວ່າງວັນທີ 11 ພະຈິກ ຫາ ວັນທີ 10 ທັນວາ 2025 ຊຶ່ງຊ່ວຍເພີ່ມການຊ່ວຍເຫຼືອດ້ານອາຫານຢ່າງຫຼວງຫຼາຍ ແລະ ແກ້ໄຂບັນຫາການຂາດສານອາຫານ ໂດຍການໃຫ້ອາຫານເສີມແກ່ແມ່ຍິງຖືພາ ແລະ ແມ່ຍິງທີ່ກຳລັງໃຫ້ນົມລູກ, ພ້ອມທັງເດັກນ້ອຍທີ່ມີອາຍຸຕ່ຳກວ່າຫ້າປີຫຼາຍກວ່າ 320,000 ຄົນ.
ໃນຂະນະດຽວກັນ, ໄດ້ຂະຫຍາຍການສະໜັບສະໜູນດ້ານສາທາລະນະສຸກ. ໂດຍອົງການດັ່ງກ່າວໄດ້ຊ່ວຍສ້າງຕຽງນອນຄົນເຈັບໜັກ ແລະ ຕຽງສຸກເສີນ 120 ຕຽງ, ສະໜອງເຄື່ອງໃຊ້ຢາສະລົບ 30 ເຄື່ອງ, ເຄື່ອງກວດສັນຍານຊີບແບບພົກພາຫຼາຍສິບເຄື່ອງ ແລະ ເຄື່ອງໃຊ້ທາງການແພດທີ່ຈຳເປັນໃຫ້ແກ່ສະຖານທີ່ບໍລິການສຸຂະພາບຫຼາຍແຫ່ງ.
ອົງການດັ່ງກ່າວໄດ້ແຈກຢາຍເສື້ອກັນໜາວໃຫ້ແກ່ເດັກນ້ອຍທີ່ມີອາຍຸຕ່ຳກວ່າ 11 ປີຫຼາຍກວ່າ 237,000 ຄົນ ແລະ ໄດ້ໃຫ້ການຊ່ວຍເຫຼືອທາງດ້ານການເງິນ ປະມານ 24 ລ້ານໂດລາ ໃຫ້ແກ່ຄົວເຮືອນເພີ່ມເຕີມເກືອບ 62,000 ຄົວເຮືອນ.
ປັດຈຸບັນອົງການດັ່ງກ່າວກຳລັງປຶກສາຫາລືກ່ຽວກັບອຸປະສັກຕ່າງໆຕໍ່ການຈັດສົ່ງວັດສະດຸສຳລັບຄ້າຍຜູ້ອົບພະຍົບ, ອຸປະກອນດ້ານນ້ຳ ແລະ ສຸຂາພິບານ, ປັດໄຈການຜະລິດກະສິກຳ, ວັດສະດຸກໍ່ສ້າງ ແລະ ອຸປະກອນການສຶກສາ ເພື່ອຊອກຫາວິທີສົ່ງສິ່ງຂອງເຫຼົ່ານີ້ໄປຍັງເຂດກາຊາໄວເທົ່າທີ່ຈະໄວໄດ້.
ຄໍາເຫັນ