 |
ສະຫາຍ ພູທະນູເພັດ ໄຊສົມບັດ ໄດ້ກ່າວວ່າ: ກອງປະຊຸມຄົບຄະນະບໍລິຫານງານພັກແຂວງ ຄັ້ງນີ້, ມີຄວາມໝາຍຄວາມສໍາຄັນ ເປັນຢ່າງຍິ່ງ ເພາະເປັນຂີດໝາຍແຫ່ງການປະເມີນ, ທົບທວນ ແລະ ຕີລາຄາຄືນ ຜົນແຫ່ງການນໍາພາ-ຊີ້ນໍາຮອບດ້ານ ຂອງຄະນະບໍລິຫານງານພັກແຂວງ ໃນໄລຍະ 6 ເດືອນຕົ້ນປີ 2026 ແລະ ຈະໄດ້ກຳນົດທິດທາງແຜນການ, ມາດຕະການຢ່າງຈະແຈ້ງ ເພື່ອສຸມໃສ່ຈັດຕັ້ງປະຕິບັດໃນ 6 ເດືອນທ້າຍປີ 2026 ໃຫ້ບັນລຸຕາມຄາດໝາຍທີ່ວາງໄວ້, ເຊິ່ງໃນໄລຍະ 6 ເດືອນຜ່ານມາ, ແຂວງວຽງຈັນ ໄດ້ມີການພັດທະນາ ທ່າມກາງສະພາບການສາກົນ ແລະ ພາກພື້ນ ທີ່ມີການຜັນແປຢ່າງສັບສົນ, ໄວວາ, ສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ, ອັດຕາເງິນເຟີ້, ລາຄາສິນຄ້າ, ນໍ້າມັນເຊື້ອໄຟ ແລະ ຄ່າຄອງຊີບທີ່ເໜັງຕິງສູງ ແຕ່ບົນພື້ນຖານຄວາມເປັນເຈົ້າການ, ຄວາມສາມັກຄີເປັນເອກະພາບ ແລະ ຄວາມຮັບຜິດຊອບການເມືອງຂອງບັນດາສະຫາຍ ຈຶ່ງເຮັດໃຫ້ສາມາດຍາດໄດ້ຜົນສໍາເລັດໃນຫຼາຍດ້ານທີ່ໜ້າຊົມເຊີຍ; ແຕ່ເຖິງຢ່າງໃດກໍຕາມ ກໍຍັງມີບາງຂໍ້ຄົງຄ້າງ, ສິ່ງທ້າທາຍ ແລະ ຈຸດອ່ອນ ທີ່ຈະສືບຕໍ່ແກ້ໄຂໃນຕໍ່ໜ້າ.
ໃນກອງປະຊຸມຄັ້ງນີ້, ຈະໄດ້ຮັບຟັງ, ຄົ້ນຄວ້າ ແລະ ປະກອບຄໍາເຫັນໃສ່ບັນດາບົດລາຍງານ ແລະ ຫົວຂໍ້ຈຸດສຸມທີ່ສໍາຄັນ ເປັນຕົ້ນ ບົດລາຍງານການນໍາພາ-ຊີ້ນໍາຮອບດ້ານ ຂອງຄະນະບໍລິຫານງານພັກແຂວງ, ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ, ແຜນງົບປະມານແຫ່ງລັດ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2026 ແລະ ຫົວຂໍ້ອື່ນໆ ອີກຈໍານວນໜຶ່ງ.
ສະຫາຍເລຂາຄະນະບໍລິຫານງານພັກແຂວງ ໄດ້ຮຽກຮ້ອງມາຍັງບັນດາສະຫາຍຜູ້ແທນກອງປະຊຸມ ຈົ່ງເຊີດຊູຄວາມຮັບຜິດຊອບສູງ ໃນການຄົ້ນຄວ້າ ຄິດຫງໍາ, ແລກປ່ຽນຄໍາຄິດຄໍາເຫັນຢ່າງເລິກເຊິ່ງ ເພື່ອເຮັດໃຫ້ກອງປະຊຸມໃນຄັ້ງນີ້ ມີເນື້ອໃນທີ່ຄົບຖ້ວນສົມບູນ, ສ້າງຄວາມເປັນເອກະພາບ ແລະ ນຳໄປຈັດຕັ້ງປະຕິບັດ ໃຫ້ເກີດໝາກຜົນຕົວຈິງໃນຕໍ່ໜ້າ.
ຂ່າວ: ແຂວງວຽງຈັນ
ຄໍາເຫັນ