 |
ກອງປະຊຸມໃນຄັ້ງນີ້ ຈະໄດ້ຮັບຟັງການລາຍງານ, ຄົ້ນຄວ້າ, ປຶກສາຫາລື ແລະ ໃຫ້ທິດຊີ້ນຳຕໍ່ບັນຫາເນື້ອໃນສໍາຄັນ ດັ່ງນີ້:
1. ຜົນການນໍາພາ-ຊີ້ນໍາ ຂອງກົມການເມືອງ ແລະ ຄະນະເລຂາທິການສູນກາງພັກ ປະຈໍາ 6 ເດືອນຕົ້ນປີ 2026 ແລະ ທິດທາງແຜນການ 6 ເດືອນທ້າຍປີ 2026;
2. ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ 6 ເດືອນຕົ້ນປີ 2026 ແລະ ທິດທາງແຜນການ 6 ເດືອນທ້າຍປີ 2026;
3. ຮ່າງບົດສະຫຼຸບຕີລາຄາວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ວຽກງານສາມສ້າງ ຂອງຄະນະບໍລິຫານງານສູນກາງພັກ ໃນນັ້ນຈະຍົກລະດັບການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນເປັນວາລະແຫ່ງຊາດ.
4. ຮ່າງມະຕິວ່າດ້ວຍການຕ້ານ, ສະກັດກັ້ນ, ປ້ອງກັນ ແລະ ແກ້ໄຂພະຍາດອາຍາສິດ, ການສໍ້ລາດບັງຫຼວງ, ປະກົດການຫຍໍ້ທໍ້ ແລະ ການຟຸມເຟືອຍໃນກົງຈັກການຈັດຕັ້ງ ແລະ ໃນສັງຄົມ;
ນອກຈາກນັ້ນ, ກອງປະຊຸມຍັງຈະໄດ້ຮັບຟັງການເຜີຍແຜ່ເອກະສານສຳຄັນຂອງສູນກາງພັກ ຈຳນວນໜຶ່ງເປັນຕົ້ນ: ຄໍາສັ່ງ ຂອງຄະນະເລຂາທິການສູນກາງພັກ ສະບັບເລກທີ 11/ຄລສພ, ລົງວັນທີ 7 ພຶດສະພາ 2026 ວ່າດ້ວຍການເພີ່ມທະວີການຊີ້ນໍາ ຂອງຄະນະພັກ ຕໍ່ວຽກງານແຮ່ທາດ, ການຄຸ້ມຄອງ ແລະ ການແກ້ໄຂບັນຫາຫຍໍ້ທໍ້ດ້ານຊັບພະຍາກອນທຳມະຊາດ.
ໃນໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ມີຄຳເຫັນວ່າ: ເມື່ອທົບທວນຄືນທັດສະນະ, ແນວທາງ, ແຜນນະໂຍບາຍຂອງພັກເຮົາໃນຫຼາຍສິບປີຜ່ານມາ, ພວກເຮົາເຫັນໄດ້ຢ່າງຊັດເຈນວ່າການນໍາພາພັດທະນາປະເທດຊາດໃຫ້ຫຼຸດພົ້ນຈາກສະຖານະພາບດ້ອຍພັດທະນາ, ຍົກລະດັບຄຸນນະ ພາບຊີວິດຂອງປະຊາຊົນໃຫ້ສູງຂຶ້ນ ແລະ ບືນຕົວກ້າວຂຶ້ນເປັນປະເທດກໍາລັງພັດທະນາແມ່ນພາລະກໍາປະຫວັດສາດແຫ່ງການນໍາພາຂອງພັກຍຸກໃໝ່.
ພັກເຮົາເວລາໃດກໍຢືນຢັນຢ່າງໜັກແໜ້ນວ່າການພັດທະນາແມ່ນຄວາມຈຳເປັນແຖວໜ້າ ຫຼືຄວາມຈຳເປັນອັນດັບໜຶ່ງ ແລະ ເປັນໜ້າທີ່ປະຫວັດສາດໃນຍຸກໃໝ່ຂອງພັກ, ທັງເປັນຄວາມຮຽກຮ້ອງຕ້ອງການອັນຮີບດ່ວນຂອງປະຊາຊົນເຮົາ. ການນໍາພາພັດທະນາຂອງພັກເຮົາຕ້ອງບັນລຸເຖິງການແກ້ໄຂບັນຫາພື້ນຖານກວມລວມນັ້ນຄືການແກ້ໄຂຄວາມທຸກຍາກຂອງປະຊາຊົນ ແລະ ຄວາມດ້ອຍພັດທະນາຂອງປະເທດຊາດໃຫ້ໄດ້; ຍູ້ກຳລັງການຜະລິດໃຫ້ຂະຫຍາຍຕົວເພື່ອມີພື້ນຖານວັດຖຸເຕັກນິກທີ່ທັນສະ ໄໝຂຶ້ນເລື້ອຍໆ ເພື່ອຮັບປະກັນໃຫ້ຈັງຫວະການເຕີບໂຕຂອງເສດຖະກິດແຫ່ງຊາດດຳເນີນໄປຢ່າງຕໍ່ເນື່ອງ, ເຮັດໃຫ້ປະເທດຊາດນັບມື້ນັບຈະເລີນກ້າວໜ້າ, ປະຊາຊົນມີຄຸນະພາບຊີວິດດີຂຶ້ນ, ສັງຄົມມີຄວາມຍຸຕິທຳຫຼາຍຂຶ້ນ ແລະ ມີຄວາມສະຫງົບປອດໄພ.
ພັກເຮົາໄດ້ກໍານົດທິດນໍາສໍາຄັນໃນການພັດທະນາຄື: “ຕ້ອງຮັບປະກັນຄວາມຍືນຍົງ, ນໍາໃຊ້ທ່າແຮງດ້ານຊັບພະຍາກອນທີ່ມີໃຫ້ສົມສ່ວນ, ຄຸ້ມຄ່າ, ມີປະສິດທິຜົນ, ທັງຮັບປະກັນບໍ່ໃຫ້ບົກແຫ້ງ. ການພັດທະນາເສດຖະກິດຕ້ອງໄປຄຽງຄູ່ກັບການພັດທະນາຄົນ, ສ້າງຄົນໃຫ້ມີທັງຄວາມຮູ້ຄວາມສາ ມາດ, ມີຄວາມໜັກແໜ້ນທາງດ້ານທາດແທ້ການເມືອງ, ມີຄຸນສົມບັດສິນທໍາ, ມີຄວາມກະຕືລືລົ້ນ ແລະ ມີຄວາມບຸກບືນສູ້ຊົນສູງໃນການພັດທະນາ; ອັນສໍາຄັນຕ້ອງໃຫ້ຄົນໃນຊາດໄດ້ຮັບຜົນປະໂຫຍດຢ່າງສົມເຫດສົມຜົນຈາກການພັດທະນາເພື່ອໃຫ້ຄົນກາຍເປັນກໍາລັງແຮງທີ່ແທ້ຈິງຂອງການພັດທະນາ”. ເພື່ອບັນລຸທິດນໍານັ້ນຕ້ອງກໍ່ສ້າງຮາກຖານການເມືອງ, ສ້າງຄວາມເຂັ້ມແຂງແຕ່ຮາກຖານຂຶ້ນມາ, ເອົາປະ ຊາຊົນເປັນກົກ, ເອົາຊົນນະບົດເປັນເປົ້າໝາຍການພັດທະນາຢ່າງມີແຜນການ ແລະ ມີຈຸດສຸມທີ່ຈະແຈ້ງ. ຖ້າຄວາມທຸກຍາກຂອງປະຊາຊົນບໍ່ໄດ້ຮັບການແກ້ໄຂຢ່າງເປັນຮູບປະທຳ, ພັກເຮົາຕ້ອງມີຄວາມຮັບຜິດຊອບ.
 |
ພ້ອມກັນນັ້ນເລຂາທິການໃຫຍ່, ຍັງໄດ້ເນັ້ນໜັກໃຫ້ບັນດາສະຫາຍສູນກາງ ຕ້ອງໄດ້ເພີ່ມທະວີຄວາມຮັບຜິດຊອບການເມືອງ ສຸມສະຕິປັນຍາ ຄົ້ນຄວ້າ, ຄິດຫງໍາ, ຕຶກຕອງ ແລະ ປະກອບຄຳຄິດຄຳເຫັນຢ່າງມີຈຸດສຸມ, ກະທັດຮັດ ຕໍ່ເນື້ອໃນຕ່າງໆໃຫ້ມີຄວາມເລິກເຊິ່ງ, ໜັກແໜ້ນ, ເປັນສະຕິປັນຍາລວມໝູ່ຂອງສູນກາງພັກ ໃນການບູລະນະແນວທາງ, ນະໂຍບາຍ ເພື່ອເປັນທິດຊີ້ນໍາ ໃຫ້ແກ່ການຜັນຂະຫຍາຍ ແລະ ຈັດຕັ້ງປະຕິບັດ ໃຫ້ເປັນຈິງ ເຮັດໃຫ້ຄາດໝາຍ ທີ່ກອງປະຊຸມໃຫຍ່ຄັ້ງທີ XII ຂອງພັກ ວາງອອກ ບັນລຸຜົນສໍາເລັດຢ່າງຈົບງາມ.
(ຂ່າວ: ຫສພ; ພາບ: ສຳນານ)
ຄໍາເຫັນ