ກອງປະຊຸມສະໄໝສາມັນເທື່ອທີ6ຂອງສະພາປະຊາຊົນນະຄອນຫຼວງວຽງຈັນ (ນວ) ຊຸດທີIIໄດ້ເປີດຂຶ້ນຢ່າງເປັນທາງການໃນວັນທີ5ທັນວານີ້ ທີ່ຫ້ອງວ່າການປົກຄອງນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ອານຸພາບ ຕຸນາລົມຄະນະເລຂາທິການສູນກາງພັກ ເລຂາຄະນະພັກ ປະທານສະພາປະຊາຊົນນະຄອນຫຼວງວຽງຈັນ, ມີບັນດາສະມາຊິກສະພາແຫ່ງຊາດປະຈໍາເຂດເລືອກຕັ້ງທີ1ນະຄອນຫຼວງວຽງຈັນ, ບັນດາທ່ານສະມາຊິກສະພາປະຊາຊົນນະຄອນຫຼວງວຽງຈັນ ພ້ອມດ້ວຍແຂກຖືກເຊີນເຂົ້າຮ່ວມ.
ທ່ານ ອານຸພາບ ຕຸນາລົມ ໄດ້ກ່າວເປີດກອງປະຊຸມ ວ່າ:ກອງປະຊຸມຄັ້ງນີ້, ຈະໄດ້ພິຈາລະນາຮັບຮອງເອົາບັນດາເນື້ອໃນທີ່ສໍາຄັນຄື:
1. ພິຈາລະນາແລະຮັບຮອງເອົາບົດລາຍງານຂອງທ່ານເຈົ້າຄອງນະຄອນຫຼວງວຽງຈັນກ່ຽວກັບຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານປະຈໍາປີ2023ແລະທິດທາງແຜນການປະຈໍາປີ2024ຂອງນະຄອນຫຼວງວຽງຈັນ, ຕິດພັນກັບການຈັດຕັ້ງປະຕິບັດ2ວາລະແຫ່ງຊາດໃນໄລຍະປີ2021-2023ຢູ່ນະຄອນຫຼວງວຽງຈັນ;
2. ພິຈາລະນາແລະຮັບຮອງເອົາຮ່າງຂໍ້ຕົກລົງຂອງທ່ານເຈົ້າຄອງນະຄອນຫຼວງວຽງຈັນຈໍານວນ2ສະບັບຄື:
1) ຮ່າງຂໍ້ຕົກລົງວ່າດ້ວຍການກໍານົດລາຄາຫົວໜ່ວຍຊົດເຊີຍທົດແທນຄ່າເສຍຫາຍຂອງໂຄງການກໍ່ສ້າງປ້ອງກັນຕາຝັ່ງແລະພັດທະນາແຄມຂອງໄລຍະII;
2) ຮ່າງຂໍ້ຕົກລົງວ່າດ້ວຍກອງທຶນພັດທະນາກິລາ-ກາຍຍະກໍານະຄອນຫຼວງວຽງຈັນ.
3. ພິຈາລະນາແລະຮັບຮອງເອົາບົດລາຍງານຜົນການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ2023ແລະທິດທາງແຜນການເຄື່ອນໄຫວວຽກງານປະຈໍາປີ2024ຂອງອົງການກວດສອບປະຈໍາພາກກາງ; ຜົນການກວດສອບປະຈໍາປີ2022ຂອງອົງການກວດສອບປະຈໍາພາກກາງ1;
4. ພິຈາລະນາແລະຮັບຮອງເອົາບົດລາຍງານຂອງອົງການກວດກາລັດນະຄອນຫຼວງກ່ຽວກັບຜົນການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ2023ແລະທິດທາງແຜນການປະຈໍາປີ2024, ຜົນການກວດກາຕາມຜົນການກວດສອບປີ2018ແລະປີ2022;
5. ພິຈາລະນາແລະຮັບຮອງເອົາບົດລາຍງານຜົນການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ2023ແລະທິດທາງແຜນການປະຈໍາປີ2024ຂອງອົງການໄອຍະການປະຊາຊົນພາກກາງແລະອົງການໄອຍະການປະຊາຊົນນະຄອນຫຼວງວຽງຈັນ;
6. ພິຈາລະນາແລະຮັບຮອງເອົາບົດລາຍງານຜົນການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ2023ແລະທິດທາງແຜນການປະຈໍາປີ2024ຂອງສານປະຊາຊົນພາກກາງແລະສານປະຊາຊົນນະຄອນຫຼວງວຽງຈັນ;
7. ພິຈາລະນາແລະຮັບຮອງເອົາບົດລາຍງານຜົນການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ2023ແລະທິດທາງແຜນການປະຈໍາປີ2024ຂອງສະພາປະຊາຊົນນະຄອນຫຼວງວຽງຈັນຊຸດທີIIຕິດພັນກັບແຜນການເຄື່ອນໄຫວພົບປະຜູ້ມີສິດເລືອກຕັ້ງເພື່ອເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ6ຂອງສະພາແຫ່ງຊາດຊຸດທີIXແລະສະພາປະຊາຊົນນະຄອນຫຼວງຊຸດທີII;
8. ຮັບຟັງການປະກອບຄໍາເຫັນຂອງອົງການແນວລາວສ້າງຊາດນະຄອນຫຼວງຕໍ່ຜົນການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍປີ2023ແລະທິດທາງແຜນການປະຈໍາປີ2024ຂອງສະພາປະຊາຊົນນະຄອນຫຼວງວຽງຈັນ;
9. ຮັບຟັງການຊີ້ແຈງບາງບັນຫາສໍາຄັນແລະພົ້ນເດັ່ນຂອງນະຄອນຫຼວງຈໍານວນໜຶ່ງເປັນຕົ້ນ:
1) ວິທີການ, ມາດຕະການໃນການຊຸກຍູ້ສົ່ງເສີມແລະຂະຫຍາຍແຫຼ່ງລາຍຮັບໃໝ່ຂອງນະຄອນຫຼວງວຽງຈັນທີ່ຕິດພັນກັບຂົງເຂດກະສິກໍາແລະປ່າໄມ້, ຂົງເຂດອຸດສາຫະກໍາແລະການຄ້າ, ຂົງເຂດຖະແຫຼງຂ່າວ, ວັດທະນະທໍາແລະທ່ອງທ່ຽວແລະຂົງເຂດເສດຖະກິດພິເສດ;
2) ກົນໄກ, ມາດຕະການສົ່ງເສີມແລະປົກປ້ອງການຜະລິດພາຍໃນລວມທັງການແບ່ງຄວາມຮັບຜິດຊອບຂອງພາກສ່ວນກ່ຽວຂ້ອງໃນການຈັດຕັ້ງປະຕິບັດ;
3) ການຈັດຕັ້ງປະຕິບັດຜັງເມືອງແລະມາດຕະການຄຸ້ມຄອງຜັງເມືອງຢູ່ນະຄອນຫຼວງວຽງຈັນ;
4) ການຄຸ້ມຄອງຄົນຕ່າງປະເທດຢູ່ນະຄອນຫຼວງວຽງຈັນ;
5) ການຄຸ້ມຄອງ, ຕິດຕາມກວດກາການສຶກສາສໍາຫຼວດ, ຂຸດຄົ້ນຫຼືສໍາປະທານແຮ່ເກືອໂປຕັສ (ເກືອກາຣີ) ຢູ່ນະຄອນຫຼວງວຽງຈັນ;
6) ການຈັດສັນຄວາມບໍ່ເປັນລະບຽບຮຽບຮ້ອຍໃນສັງຄົມເພື່ອຕ້ອນຮັບການເປັນເຈົ້າພາບກອງປະຊຸມສຸດຍອດອາຊຽນແລະປີທ່ອງທ່ຽວລາວ2024ແລະການແກ້ໄຂບັນຫາເລື່ອງປ້າຍທີ່ບໍ່ຖືກຕ້ອງຢູ່ນະຄອນຫຼວງ.
ນອກຈາກບັນດາເນື້ອໃນທີ່ກ່າວມາຂ້າງເທິງແລ້ວກອງປະຊຸມຍັງຈະໄດ້ຮັບຟັງການຊີ້ແຈງບາງບັນຫາພົ້ນເດັ່ນທີ່ສະມາຊິກສະພາແຫ່ງຊາດແລະສະມາຊິກສະພາປະຊາຊົນນະຄອນຫຼວງຍົກຂຶ້ນຫຼືຊັກຖາມໃນກອງປະຊຸມຈາກອົງການປົກຄອງ, ສານປະຊາຊົນ, ອົງການໄອຍະການປະຊາຊົນແລະພາກສ່ວນກ່ຽວຂ້ອງຕື່ມອີກ.
(ຂ່າວ-ພາບ: ແສງຈັນ)
ຄໍາເຫັນ