ໂຄງການຄິວລົດທ່ອງທ່ຽວດັ່ງກ່າວ, ແມ່ນໄດ້ຮັບການກໍ່ສ້າງດ້ວຍງົບປະມານທັງໝົດ 125 ລ້ານກີບ, ຊຶ່ງເປັນການຊ່ວຍເຫຼືອຈາກໂຄງການຈຳປາ (AFD) ຈາກປະເທດຝະລັ່ງ. ທ່ານ ຄຳບອນ ແກ້ວອິນຕາ ຜູ້ປະກອບການທຸລະກິດຄິວລົດທ່ອງທ່ຽວ ກ່າວວ່າ: ໂຄງການນີ້, ເປັນສ່ວນໜຶ່ງຂອງແຜນພັດທະນາການທ່ອງທ່ຽວແບບຍືນຍົງຂອງເມືອງຈຳປາສັກ, ພວກເຮົາຫວັງວ່າຄິວລົດທ່ອງທ່ຽວນີ້ ຈະຊ່ວຍດຶງດູດນັກທ່ອງທ່ຽວເພີ່ມຂຶ້ນ ແລະ ສ້າງລາຍຮັບໃຫ້ແກ່ຊຸມຊົນທ້ອງຖິ່ນ. ເມືອງຈຳປາສັກ ມີແຫຼ່ງທ່ອງທ່ຽວທີ່ສຳຄັນຫຼາຍແຫ່ງ ບໍ່ວ່າຈະເປັນແຫຼ່ງທ່ອງທ່ຽວທາງດ້ານວັດທະນະທຳ, ປະຫວັດສາດ (ເຂດບູຮານ ມໍລະດົກໂລກວັດພູ) ແລະ ທ່ອງທ່ຽວທໍາມະຊາດອື່ນໆ.
ທ່ານ ຮອງເລຂາພັກເມືອງ ໄດ້ກ່າວວ່າ: ການເປີດຄິວລົດທ່ອງທ່ຽວຄັ້ງນີ້ ບໍ່ພຽງແຕ່ເປັນການພັດທະນາພື້ນຖານໂຄງລ່າງດ້ານການທ່ອງທ່ຽວເທົ່ານັ້ນ, ແຕ່ຍັງເປັນການສົ່ງເສີມການພັດທະນາເສດຖະກິດ-ສັງຄົມຂອງເມືອງຈຳປາສັກ. ທັງເປັນບ່ອນດຶງດູດນັກທ່ອງທ່ຽວພາຍໃນ ແລະ ຕ່າງປະເທດມາທ່ຽວເມືອງຈຳປາສັກ ນັບມື້ນັບຫຼາຍຂຶ້ນ ພ້ອມທັງເປີດຄິວລົດທ່ອງທ່ຽວຢ່າງເປັນທາງການ.
(ຂ່າວ-ພາບ ໄຊຍະສິດ ສີຫາວົງ)
ຄໍາເຫັນ