ເປີດນຳໃຊ້ເສັ້ນທາງ ຈາກເທສະບານເມືອງໄຊຈໍາພອນ - ດ່ານນໍ້າອອນ

ເສັ້ນທາງດັ່ງກ່າວເປັນເສັ້ນທາງປູຢາງອັດສະຟານ, ມີຄວາມຍາວ 35 ກິໂລແມັດ, ໃນນັ້ນ ເສັ້ນທາງເຂດເທສະບານເມືອງ ຍາວ 2 ກິໂລແມັດ ມີ 4 ຊ່ອງຈະລາຈອນ (ທາງຂຶ້ນ 2 ຊ່ອງ, ທາງລ່ອງ 2 ຊ່ອງ), ແຕ່ລະຊ່ອງ ມີຄວາມກວ້າງ 3.5 ແມັດ, ຄວາມກວ້າງຄູກາງ 2 ແມັດ, ຄວາມກວ້າງຂອງຄອງລະບາຍ ເບື້ອງລະ 0.7 ແມັດ ຊຶ່ງລວມຄວາມກວ້າງຂອງໜ້າທາງແມ່ນ 14 ແມັດ ແລະ ລວມຄວາມກວ້າງຂອງພື້ນທາງ 17.4 ແມັດ. ສຳລັບເສັ້ນທາງເຂດນອກເທສະບານເມືອງ ມີຄວາມຍາວ 33 ກິໂລແມັດ ມີຂະໜາດໜ້າທາງກວ້າງ 5.5 ແມັດ ແບ່ງເປັນ 2 ຊ່ອງຈະລາຈອນ (ຂຶ້ນ ແລະ ລ່ອງ), ຄວາມກວ້າງບ່າທາງ ເບື້ອງລະ 1 ແມັດ, ລວມຄວາມກວ້າງຂອງພື້ນທາງ 7.5 ແມັດ. ຕະຫຼອດໄລຍະຄວາມຍາວ 35 ກິໂລແມັດນັ້ນ ໄດ້ມີການກໍ່ສ້າງຂົວເບຕົງເສີມເຫຼັກ ທີ່ມີຄວາມກວ້າງ 9.4 ແມັດ ຈໍານວນ 2 ແຫ່ງ ລວມຄວາມຍາວ 154.8 ແມັດ ແລະ ທໍ່ລະບາຍນໍ້າ 1 ແຫ່ງ ຊຶ່ງລວມມູນຄ່າໂຄງການທັງໝົດ 260 ຕື້ກີບ ໂດຍແມ່ນທຶນຊ່ວຍເຫຼືອຈາກບໍລິສັດ ຫຸ້ນສ່ວນລົງທຶນ ແລະ ພັດທະນາພະລັງງານ ຫວຽດນາມ-ລາວ ກໍຄືຜູ້ລົງທຶນໃນກຸ່ມໂຄງການໄຟຟ້າພະລັງງານລົມ ເຈືອງເຊີນ ຢູ່ແຂວງບໍລິຄຳໄຊ ໂດຍມີໄລຍະເວລາໃນການກໍ່ສ້າງແມ່ນ 6 ເດືອນ (ທ້າຍປີ 2025), ພາຍຫຼັງມອບ-ຮັບ ແລະ ເປີດນຳໃຊ້ຢ່າງເປັນທາງການ, ບໍລິສັດຜູ້ໃຫ້ທຶນ ແລະ ຮັບເໝົາກໍ່ສ້າງຈະສືບຕໍ່ໃຫ້ການບຳລຸງຮັກສາເສັ້ນທາງດັ່ງ ກ່າວຕື່ມອີກ ເປັນໄລຍະເວລາ 5 ປີ.

ການຊ່ວຍເຫຼືອກໍ່ສ້າງເສັ້ນທາງດັ່ງກ່າວ ເປັນການປະກອບສ່ວນອັນໃຫຍ່ຫຼວງຂອງບໍລິສັດ ຫຸ້ນສ່ວນລົງທຶນ ແລະ ພັດທະນາພະລັງງານ ຫວຽດນາມ-ລາວ ເຂົ້າໃນການພັດທະນາເສດຖະກິດ-ສັງຄົມຂອງແຂວງກໍຄືການພັດທະນາພື້ນຖານໂຄງລ່າງເມືອງໄຊຈຳພອນທີ່ຍັງເປັນເມືອງທຸກຍາກຂອງແຂວງ ຊຶ່ງຕັດຂາດການເດີນທາງເຂົ້າ-ອອກບາງໄລຍະໃນລະດູຝົນ (ກ່ອນກໍ່ສ້າງເສັ້ນທາງ), ກາຍເປັນເມືອງທີ່ສາມາດທຽວໄປມາໄດ້ສະດວກທັງສອງລະດູ, ເຮັດໃຫ້ການເດີນທາງສູ່ບັນດາເມືອງອ້ອມຂ້າງໃຊ້ເວລາສັ້ນກວ່າເກົ່າຫຼາຍຊົ່ວໂມງ,ປະກອບສ່ວນເຮັດໃຫ້ປະຊາຊົນທ້ອງຖິ່ນ ມີເງື່ອນໄຂສະດວກ ໃນການພັດທະນາຊີວິດການເປັນຢູ່ ໃຫ້ດີຂຶ້ນ. ສະນັ້ນ, ຜົນສຳເລັດດັ່ງກ່າວ ຈຶ່ງຖືເປັນບາດກ້າວສຳຄັນ ທີ່ເອື້ອອຳນວຍ ແລະ ກະຕຸກຊຸກຍູ້ເມືອງໄຊຈຳພອນເປີດປະຕູສູ່ບັນດາເມືອງໃກ້ຄຽງ ຂອງ ສປປ ລາວ ແລະ ສສ ຫວຽດນາມ ຫຼາຍຂຶ້ນ ໂດຍສະເພາະ ການຄ້າ, ການລົງທຶນ, ການທ່ອງທ່ຽວ, ການພັດທະນາເສດຖະກິດ ເຂດຊາຍແດນ ແລະ ອື່ນໆ ຊຶ່ງຈະຊ່ວຍເຮັດໃຫ້ ເສດຖະກິດ-ສັງຄົມ ຂອງເມືອງໄຊຈຳພອນ ໄດ້ຮັບການພັດທະນາດີຂຶ້ນຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນ ຈະໄດ້ຮັບການປັບປຸງ ແລະ ພັດທະນາດີຂຶ້ນ ເປັນກ້າວໆ.

(ຂ່າວ-ພາບ: ກົມປະຊາສໍາພັນ ຫສນຍ)