ສະຫາຍ ພັນເອກ ທິມສາວ ດວງຈໍາປາ ຮອງຫົວໜ້າກົມໂຄສະນາອົບຮົມ ໄດ້ຜ່ານບົດລາຍງານແຜນ ການກະກຽມຄວາມພ້ອມໃນການຈັດຕັ້ງເປີດຊຸດຝຶກອົບຮົມວ່າ: ການຝຶກອົບຮົມຄັ້ງນີ້ຈັດຂຶ້ນເພື່ອຍົກລະດັບທິດສະດີການເມືອງ, ຫຼັກການ, ແບບແຜນວິທີເຮັດວຽກໃຫ້ພະນັກງານ-ນັກຮົບ, ນັກຂ່າວຢູ່ບັນດາກົມກອງສື່ມວນຊົນໃຫ້ມີປະສິດທິພາບສູງຂຶ້ນ, ສືບຕໍ່ນໍາເອົາບັນດາແນວທາງແຜນນະໂຍບາຍຂອງພັກ-ລັດ, ສຶກສາອົບຮົມໃຫ້ພະນັກງານ-ນັກຮົບຢູ່ກົມກອງສື່ມວນຊົນກອງທັບ ມີຄຸນສົມບັດສິນທຳປະຕິວັດ, ມີຄຸນທາດການເມືອງໜັກແໜ້ນ, ມີຄວາມຈົງຮັກພັກດີຕໍ່ອຸດົມການຂອງພັກ, ຕໍ່ການປະຕິວັດ ແລະ ປະເທດຊາດ. ການຝຶກອົບຮົມຄັ້ງນີ້ມີຜູ້ເຂົ້າຮ່ວມທັງໝົດ 70 ສະຫາຍ ຍິງ 32 ສະຫາຍ, ຈັດຕັ້ງເປັນ 2 ຊຸດ ມາຈາກ 8 ກົມກອງສື່ມວນຊົນກອງທັບ ຊຶ່ງເນື້ອໃນທີ່ນໍາມາຝຶກມີ 3 ບົດ, ໃຊ້ເວລາຝຶກ 14 ວັນ (ວັນທີ 12-27 ພຶດສະພາ 2025) ຈຶ່ງຈະສຳເລັດ.
ໂອກາດນີ້, ສະຫາຍ ພັນເອກ ແກ້ວສຸວັນ ຜາງພິລາວົງ ໄດ້ມີຄໍາເຫັນໂອ້ລົມ ແລະ ເນັ້ນໜັກໃຫ້ນັກຝຶກອົບຮົມບັນດາກົມກອງສື່ມວນຊົນກອງທັບ ພ້ອມກັນເອົາໃຈໃສ່ຍົກສູງໜ້າທີ່ຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ໂດຍສະເພາະແມ່ນປະຕິບັດໂມງເວລາໃນການຂຶ້ນຫ້ອງຮຽນ ທັງສຸມຈິດໃຈໃສ່ໃນການຄົ້ນຄວ້າຮ່ຳຮຽນໃຫ້ເລິກເຊິ່ງເພື່ອໃຫ້ກໍາໄດ້ເນື້ອໃນຂອງການຝຶກອົບຮົມຄັ້ງນີ້ຢ່າງມີປະສິດທິພາບ ແລະ ໄດ້ຮັບໝາກຜົນສໍາເລັດຢ່າງຈົບງາມ.
ຂ່າວ: ສົມຄິດ ພູມມີຈິດ
ຄໍາເຫັນ