ສະຫາຍ ອານົງສັກ ອິນທະວົງ ກຳມະການຄະນະພັກ ຫົວໜ້າກົມຈັດຕັ້ງ ຄະນະໂຄສະນາອົບຮົມສູນກາງພັກ (ຄອສພ) ໄດ້ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ VI ຂອງອົງຄະນະພັກ ຄອສພ ເມື່ອບໍ່ດົນຜ່ານມາໃນຫົວຂໍ້: “ການນຳພາຂອງພັກ ໃນການປັບປຸງກົງຈັກການຈັດຕັ້ງ” ວ່າ: ພັກມີຄວາມຮັບຜິດຊອບຕໍ່ການກໍ່ສ້າງ, ການບຳລຸງພະນັກງານ, ການບັນຈຸສັບຊ້ອນ ແລະ ນຳໃຊ້ພະນັກງານ ໃນຕຳແໜ່ງງານທີ່ສຳຄັນຂອງອົງການພັກ-ລັດ ທັງຢູ່ຂັ້ນສູນກາງ ແລະ ທ້ອງຖິ່ນໃຫ້ຖືກຕ້ອງເໝາະສົມ. ພັກຍາມໃດກໍຖືວຽກງານປັບປຸງກົງຈັກການຈັດຕັ້ງ ເປັນວຽກງານໜຶ່ງທີ່ສຳຄັນໃນການນຳພາ-ຊີ້ນຳ ເພື່ອຂັບເຄື່ອນການພັດທະນາ ຕາມແນວທາງນະໂຍບາຍຂອງພັກ-ລັດ ໃນແຕ່ລະໄລຍະໃຫ້ມີປະສິດທິຜົນສູງ, ສອດຄ່ອງກັບການຂະຫຍາຍຕົວຂອງເສດຖະກິດປະເທດ ແຕ່ຕ້ອງເອົາໃຈໃສ່ວຽກງານສຶກສາອົບຮົມການເມືອງ-ແນວຄິດໃຫ້ພະນັກງານ, ສະມາຊິກພັກມີຄວາມຮັບຮູ້ເຂົ້າໃຈ, ມີຄວາມເປັນເອກະພາບສູງ, ມີຄວາມອຸ່ນອ່ຽນທຸ່ນທ່ຽງບໍ່ທໍ້ຖອຍຄອນແຄນ.
ຕະຫຼອດໄລຍະຜ່ານມາ, ຄອສພ ກໍໄດ້ເອົາໃຈໃສ່ຄົ້ນຄວ້າປັບປຸງພາລະບົດບາດວ່າດ້ວຍການຈັດຕັ້ງ ແລະ ການເຄື່ອນໄຫວຂອງຕົນໃຫ້ສອດຄ່ອງກັບໜ້າທີ່ການເມືອງໃນແຕ່ລະໄລຍະ. ໃນປີ 2022 ກົມການ ເມືອງສູນກາງພັກໄດ້ອອກມະຕິຕົກລົງ ວ່າດ້ວຍການປັບປຸງກົງຈັກການຈັດຕັ້ງຂອງ ຄອສພ ໂດຍເຫັນດີສັບຊ້ອນຫ້ອງການສະພາທິດສະດີສູນກາງພັກ ຈາກຫ້ອງວ່າການສູນກາງພັກຕາມຂໍ້ຕົກລົງ ເລກທີ 413/ຫສພ, ໜັງສືພິມປະຊາຊົນ ຈາກກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ຕາມດຳລັດເລກທີ 176/ນຍ, ມາຂຶ້ນກັບ ຄອສພ ແລະ ໂຮມກົມສັງລວມ ເຂົ້າກັບຫ້ອງການ ຄອສພ, ໂຮມວາລະສານໂຄສະນາ ເຂົ້າກັບກົມໂຄສະນາ. ມາຮອດປີ 2025 ຄະນະບໍລິຫານງານພັກ ໄດ້ອອກມະຕິ ສະບັບເລກທີ 03/ຄບສພ, ລົງວັນທີ 12 ມີນາ 2025 ວ່າດ້ວຍການປັບປຸງກົງຈັກການຈັດຕັ້ງ. ໃນນັ້ນ, ໄດ້ໂອນເອົາວຽກຖະແຫຼງຂ່າວ-ວຽກສື່ມວນຊົນ ແລະ ຍົກຍ້າຍບຸກຄະລາກອນ ພ້ອມທັງອາຄານຫ້ອງການ, ພາຫະນະວັດຖຸອຸປະກອນຮັບໃຊ້ວຽກງານ, ທີ່ດິນ ແລະ ອຸປະກອນອື່ນໆ ຈາກກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ມາຂຶ້ນກັບ ຄອສພ.
ສະຫາຍ ອານົງສັກ ອິນທະວົງ ໃຫ້ຮູ້ຕື່ມວ່າ: ສໍາລັບທິດທາງ ໃນການສືບຕໍ່ປັບປຸງກົງຈັກການຈັດຕັ້ງຄື: ສືບຕໍ່ປັບປຸງພາລະບົດບາດ, ໜ້າທີ່, ຂອບເຂດສິດຂອງບັນດາກົມ, ທຽບເທົ່າກົມໃຫ້ໄປຕາມທິດ; ປັບປຸງ, ສັບຊ້ອນ, ຈັດວາງບຸກຄະລາກອນຄືນໃໝ່ໃຫ້ແທດເໝາະກັບຕົວຈິງ, ເນັ້ນຄຸນນະພາບເປັນຕົ້ນຕໍ ແລະ ຊຸກຍູ້-ສົ່ງເສີມຜູ້ດີ-ຜູ້ເກັ່ງ ພຽບພ້ອມຄຸນນະທຳ, ຄຸນສົມບັດສິນທຳປະຕິວັດ ກໍຄືດຶງດູດໄດ້ຜູ້ທີ່ມີຄວາມຮູ້, ຄວາມສາມາດ ເຮັດວຽກມີຄຸນນະພາບ, ຜູ້ໜຶ່ງເຮັດໄດ້ຫຼາຍວຽກ; ປັບປຸງກົນໄກ, ລະບອບນໍາພາ, ແບບແຜນວິທີເຮັດວຽກຂອງຄະນະພັກ, ຄະນະນໍາ, ຮາກຖານພັກ, ກົມກອງໃຫ້ມີຄວາມຄ່ອງຕົວ, ສອດຄ່ອງກັບສະພາບ, ແທດກັບຕົວຈິງ ແລະ ມີວິທະຍາສາດ ຮັບປະກັນໄດ້ຄວາມສະຫງົບຢູ່ພາຍໃນ; ຮັບປະກັນດ້ານງົບປະມານ ເພື່ອຮັບໃຊ້ເຂົ້າໃນການປັບປຸງກົງຈັກ ກໍຄືຮອງຮັບໃຫ້ການເຄື່ອນໄຫວວຽກງານໃຫ້ມີປະສິດທິຜົນ ບົນຈິດໃຈປະຢັດ.
ຄໍາເຫັນ