 |
ການລົງເຄື່ອນໄຫວໃນຄັ້ງນີ້ ນຳໂດຍ ທ່ານ ນາງ ວິໄລ ເຮືອງສີ ຫົວໜ້າ ກວດກາຊັບພະຍາກອນທຳມະຊາດ ແລະ ສິ່ງແວດລ້ອມ ພະແນກກະສິກຳ ແລະ ສິ່ງແວດລ້ອມ ແຂວງຈຳປາສັກ, ໂດຍມີ ທ່ານ ຄອນສະຫວັນ ພົມມະວົງສາ ຮອງຫົວໜ້າຫ້ອງການກະສິກຳ ແລະ ສິ່ງແວດລ້ອມ ເມືອງມຸນລະປາໂມກ ພ້ອມດ້ວຍທີມງານວິຊາການເຂົ້າຮ່ວມ.
ຄະນະດັ່ງກ່າວ ໄດ້ລົງຕິດຕາມການທຳການຜະລິດຢູ່ທົ່ງນາຂອງຊາວກະສິກອນຕົວຈິງ ເຊິ່ງໄດ້ເນັ້ນໃສ່ 2 ວຽກງານສຳຄັນເຊັ່ນ: ຕິດຕາມຄວາມຄືບໜ້າຂອງການປັກດຳເຂົ້ານາປີຢູ່ບ້ານປາໂມກ ເພື່ອໃຫ້ທັນຕາມລະດູການ ແລະ ຄາດໝາຍທີ່ວາງໄວ້ ເຊິ່ງປັດຈຸບັນທົ່ວເມືອງປູກເຂົ້ານາປີໄດ້ 11,399.95 ຮຕ ທຽບໃສ່ແຜນໄດ້ 75.26% ໃນນັ້ນ, ມີນາຫວ່ານ 3,297.95 ຮຕ, ນາຢອດ 448 ຮຕ ແລະ ນາປັກດຳໄດ້ 7,666.95 ຮຕ, ລົງກວດກາພື້ນທີ່ຕົວຈິງ ເຂດບ້ານທີ່ມີຄວາມສ່ຽງ ບ້ານເດື່ອເຕ້ຍ ເຊິ່ງເປັນເຂດທີ່ອາດຈະໄດ້ຮັບຜົນກະທົບຈາກນ້ຳຖ້ວມໃນໄລຍະຝົນຕົກ ເຊິ່ງລະດັບນໍ້າຂອງໃນປັດຈຸບັນ 9.60 m ແລະ ຖ້ານ້ຳຂອງຂຶ້ນຮອດ 10.50 m ນ້ຳຈະລົ້ນຝັ່ງ.
 |
ທ່ານ ນາງ ວິໄລ ເຮືອງສີ ໄດ້ຊີ້ນຳໃຫ້ ຫ້ອງການກະສິກຳ ແລະ ສິ່ງແວດລ້ອມ ເມືອງມຸນລະປາໂມກ ປະສານງານກັບອົງການປົກຄອງບ້ານຢ່າງໃກ້ຊິດ ໃນການຕິດຕາມສະພາບອາກາດ ແລະ ລະດັບນ້ຳຈາກກົມອຸຕຸນິຍົມ ແລະ ອຸທົກກະສາດຢ່າງປະຈຳ, ພ້ອມທັງກຽມພ້ອມແຜນອົບພະຍົກສັດລ້ຽງ, ກະກຽມກຳລັງພົນ, ພາຫະນະ ແລະ ເຄື່ອງມື ເພື່ອຊ່ວຍເຫຼືອຊາວກະສິກອນໄດ້ທັນເວລາ ຫາກເກີດສະພາບອຸທົກກະໄພ ເພື່ອຫຼຸດຜ່ອນຄວາມເສຍຫາຍຕໍ່ຜົນຜະລິດເຂົ້ານາປີໃຫ້ໄດ້ຫຼາຍທີ່ສຸດ.
ພາບ-ຂ່າວ: ເມືອງມຸນລະປາໂມກ
ຄໍາເຫັນ