 |
ໄລຍະ 5 ປີຕໍ່ໜ້າ, ຕ້ອງສືບຕໍ່ເພີ່ມທະວີການນໍາພາ-ຊີ້ນໍາ ແລະ ຄຸ້ມຄອງບັນດາສື່ມວນຊົນ ທັງສື່ສິ່ງພິມ ແລະ ສື່ເອເລັກໂຕຣນິກ ໃຫ້ກ້າວໄປສູ່ຄວາມທັນສະໄໝ ໂດຍເນັ້ນການມີສ່ວນຮ່ວມຂອງສັງຄົມ. ສູ້ຊົນຫັນປ່ຽນຢ່າງແຂງແຮງທັງດ້ານເນື້ອໃນ ແລະ ຮູບແບບການນໍາສະເໜີ ເພື່ອສ່ອງແສງລາຍງານເຫດການຕ່າງໆ ໃຫ້ມີຄວາມໂດດເດັ່ນ, ຊັດເຈນ ແລະ ມີຊີວິດຊີວາ ໂດຍຮັບປະກັນໃຫ້ໄດ້ 4 ລັກສະນະຂອງສື່ມວນຊົນ (ລັກສະນະພັກ, ລັກສະນະຕົວຈິງ, ລັກສະນະສຶກສາອົບຮົມ ແລະ ລັກສະນະມະຫາຊົນ). ສຸມໃສ່ການສະໜອງຂໍ້ມູນຂ່າວສານທີ່ຫຼາກຫຼາຍ ແລະ ທັນເຫດການ ໂດຍຜ່ານການປະສານສົມທົບຢ່າງກົມກຽວກັບພາກສ່ວນກ່ຽວຂ້ອງ ເພື່ອສ້າງກະແສສັງຄົມທີ່ຕັ້ງໜ້າ ແລະ ຄຸ້ມຄອງຂໍ້ມູນຂ່າວສານໃຫ້ມີຄວາມຮັດກຸມ, ຖືກຕ້ອງຕາມແນວທາງນະໂຍບາຍຂອງພັກ. ພ້ອມກັນນັ້ນ, ຕ້ອງຍູ້ແຮງການພັດທະນາບຸກຄະລາກອນສື່ມວນຊົນ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຈັນຍາບັນ ແລະ ເປັນມືອາຊີບ; ສຸມໃສ່ການຝຶກອົບຮົມຍົກລະດັບວິຊາສະເພາະ ທັງພາຍໃນ ແລະ ຕ່າງປະເທດ ເພື່ອຍົກສູງເຕັກນິກການຜະລິດເນື້ອໃນໃຫ້ມີຄຸນນະພາບສູງ, ທັງປຸກລະດົມຂະຫຍາຍຕາໜ່າງເພື່ອນຮ່ວມງານໃຫ້ກວ້າງຂວາງ ແລະ ເຂັ້ມແຂງໃນທົ່ວປະເທດ.
ວຽກຄຸ້ມຄອງສື່ ຈະໄດ້ສຸມໃສ່ການຫັນວຽກງານສື່ມວນຊົນເປັນດີຈີຕອນຢ່າງຮອບດ້ານ ໂດຍການສ້າງຖານຂໍ້ມູນລວມສູນເພື່ອຂຶ້ນທະບຽນສື່ ແລະ ອອກບັດນັກຂ່າວແບບອອນລາຍ (E-Licensing), ພ້ອມທັງນໍາໃຊ້ AI ເຂົ້າໃນການກວດກາຂ່າວປອມ ແລະ ເລັ່ງຫັນປ່ຽນລະບົບກະຈາຍ ສຽງ-ພາບ ຈາກອານາລັອກໄປສູ່ດີຈີຕອນໃນທົ່ວປະເທດ. ດ້ານນິຕິກຳ, ຈະມີການປັບປຸງກົດໝາຍສື່ມວນຊົນໃຫ້ທັນສະໄໝ ເພື່ອຄຸ້ມຄອງບັນດາຜູ້ຜະລິດເນື້ອໃນ (Content Creators) ແລະ Influencers ໃຫ້ເຄື່ອນໄຫວຢ່າງມີຈັນຍາບັນ ແລະ ຖືກຕ້ອງຕາມລະບຽບກົດໝາຍ.
ສະຫາຍ ວັນສີ ກົວມົວ ກ່າວຕື່ມວ່າ: ສໍາລັບການພັດທະນາຊັບພະຍາກອນມະນຸດ, ຈະຍົກລະດັບທັກສະ "ນັກຂ່າວດີຈີຕອນ" ທີ່ສາມາດຜະລິດເນື້ອໃນໄດ້ຮອບດ້ານ (Multi-skilling) ຄວບຄູ່ໄປກັບການບຳລຸງແນວຄິດການເມືອງໃຫ້ໜັກແໜ້ນ. ນອກຈາກນີ້, ຈະສືບຕໍ່ຂະຫຍາຍຕາໜ່າງໂທລະໂຄ່ງດີຈີຕອນ ໃຫ້ເຂົ້າເຖິງເຂດຫ່າງໄກສອກຫຼີກໄດ້ 100% ແລະ ຊຸກຍູ້ການຜະລິດເນື້ອໃນທີ່ສ້າງສັນເພື່ອສົ່ງເສີມການພັດທະນາເສດຖະກິດ-ສັງຄົມ. ດ້ານການຮ່ວມມື, ຈະເພີ່ມທະວີການເປັນຄູ່ຮ່ວມກັບພາກເອກະຊົນ ແລະ ສາກົນ ເພື່ອຍາດແຍ່ງທຶນຮອນ ແລະ ເຕັກນິກທີ່ທັນສະໄໝ ແນໃສ່ເຮັດໃຫ້ສື່ມວນຊົນລາວມີຄຸນນະພາບ, ວ່ອງໄວ ແລະ ຮັບໃຊ້ສັງຄົມໄດ້ຢ່າງມີປະສິດທິຜົນສູງສຸດ; ສະມາຄົມນັກຂ່າວແຫ່ງ ສປປ ລາວ ສືບຕໍ່ປັບປຸງກົງຈັກການຈັດຕັ້ງ ແລະ ພາລະບົດບາດໃຫ້ມີຄວາມສອດຄ່ອງກັບສະພາບເງື່ອນໄຂໄລຍະໃໝ່, ເສີມຂະຫຍາຍການພົວພັນຮ່ວມມືກັບສະມາຄົມນັກຂ່າວຕ່າງປະເທດ ແລະ ອົງການຈັດຕັ້ງສາກົນ ເພື່ອພັດທະນາວຽກງານສື່ມວນຊົນໃຫ້ນັບມື້ດີຂຶ້ນ.
ຄໍາເຫັນ