ເຜີຍແຜ່ຄວາມເຂົ້າໃຈກ່ຽວກັບໂຄງການຂົນສົ່ງແບບຍືນຍົງໃນຕົວເມືອງໃຫ້ແກ່ ນັກຮຽນ

ໂອກາດດັ່ງກ່າວ, ທ່ານ ສະເດັດດາ ສີອຳພອນ ຮອງຫົວໜ້າໂຄສະນາອົບຮົມ ນະຄອນຫຼວງວຽງ ຈັນ ຄະນະຮັບຜິດຊອບໂຄສະນາການຈັດຕັ້ງປະຕິບັດໂຄງການລົດເມດ່ວນ BRT ໄດ້ເຜີຍແຜ່ຂໍ້ຕົກລົງ ຂອງທ່ານເຈົ້າຄອງ ນວ ວ່າດ້ວຍການຮັບຮອງເບື້ອງຕົ້ນກ່ຽວກັບຫຼັກການຄຸ້ມຄອງ ແລະ ບໍລິການລົດເມ ດ່ວນ ພ້ອມທັງຍົກໃຫ້ເຫັນຄວາມສຳຄັນຂອງໂຄງການດັ່ງກ່າວ ຊຶ່ງໂຄງການລົດເມດ່ວນ BRT ແມ່ນລະ ບົບລົດເມທີ່ສາມາດບໍລິການຢ່າງມີປະສິດທິພາບດ້ວຍຄວາມວ່ອງໄວ ແລະ ຄຸນນະພາບດີ ປະກອບມີ ຊ່ອງຈາລະຈອນສະເພາະສຳລັບລົດເມດ່ວນມີດອນກາງລະຫວ່າງຊ່ອງຈະລາຈອນບໍ່ມີຄົນເກັບຄ່າໂດຍສານ ມີບ່ອນຂຶ້ນ-ລົງລົດເມຢູ່ກັບຊ່ອງຈະລາຈອນ ແລະ ເປັນລົດເມທີ່ມີສິດທິພິເສດໃນທາງສີ່ແຍກ ພາຍຫຼັງໂຄງ ການສຳເລັດຈະສາມາດແກ້ໄຂສະພາບການຈະລາຈອນແອອັດໂດຍການສ້າງລະບົບຂົນສົ່ງສາທາລະນະທີ່ມີຄຸນນະພາບສູງ (ລົດເມ BRT) ແທນການນຳໃຊ້ພາຫະນະສ່ວນຕົວເທື່ອລະກ້າວ ຈັດສັນບ່ອນຈອດລົດ ໃນຕົວເມືອງໃຫ້ເປັນລະບຽບຮຽບຮ້ອຍປັບປຸງທັດສະນີຍະພາບຕົວເມືອງສີຂຽວ ແລະ ເປັນມິດກັບສິ່ງແວດ ລ້ອມປັບປຸງທາງຍ່າງ ແຄມທາງໃຫ້ສວຍງາມ ພ້ອມນີ້ການໃຊ້ບໍລິການລົດເມ BRT ຍັງຊ່ວຍປະຢັດຄ່າໃຊ້ ຈ່າຍໂດຍສະເພາະຄ່ານໍ້າມັນລົດຂອງພະນັກງານກໍຄືນັກຮຽນ ນັກສຶກສາໃນໄລຍະທີ່ນໍ້າມັນມີລາຄາສູງ ປັດ ຈຸບັນລົດເມ BRT ເປີດໃຫ້ບໍລິການໂດຍບໍ່ເສຍຄ່າຈົນຮອດວັນທີ 9 ພຶດສະພາ 2026 ນີ້ ໂດຍເລີ່ມຈາກ ສະຖານີຕະຫຼາດເຊົ້າຫາສະຖານີດົງໂດກ (ມະຫາວິທະຍາໄລແຫ່ງຊາດ).

ທ່ານ ພັນໂທ ຫຼຽນໄຊ ມົງພົນຄຳ ຫົວໜ້າກອງໂຄສະນາ ພະແນກຕຳຫຼວດຈະລາຈອນ ປກສ ນວ ກໍໄດ້ເຜີຍແຜ່ເອກະສານກ່ຽວກັບການນຳໃຊ້ເສັ້ນທາງທີ່ມີການປ່ຽນແປງທິດການສັນຈອນ 9 ເສັ້ນທາງ ໃນ ນວ ທັງນີ້ກໍເພື່ອເຮັດໃຫ້ຜູ້ເຂົ້າຮ່ວມກໍຄືນັກຮຽນໄດ້ຮັບຮູ້ ແລະ ເຂົ້າໃຈ ສາມາດສັນຈອນໄປມາຢ່າງ ຖືກຕ້ອງຕາມກົດຈະລາຈອນ ຫຼີກລ່ຽງການເກີດອຸບັດເຫດ ນອກຈາກນີ້ໃນພິທີຜູ້ເຂົ້າຮ່ວມ ແລະ ຄະນະ ຮັບຜິດຊອບກໍໄດ້ປະກອບຄໍາຄິດຄໍາເຫັນ ສົນທະນາແລກປ່ຽນກ່ຽວກັບໂຄງການລົດເມ BRT ພ້ອມກັນນີ້ ຍັງມີກິດຈະກໍາຖາມ-ຕອບກ່ຽວກັບໂຄການລົດເມ BRT ສໍາລັບນັກຮຽນ ແລະ ຜູ້ເຂົ້າຮ່ວມຕື່ມອີກ.

(ຂ່າວ-ພາບ: ສຳນານ)