 |
ໂອກາດນີ້ ໄດ້ຮັບຟັງການລາຍງານສະພາບລວມໂດຍຫຍໍ້ຈາກຄະນະບ້ານວ່າ: ບ້ານຜາເກັ່ງນ້ອຍ ປະກອບມີ 3 ຊົນເຜົ່າ, ມີທັງໝົດ 146 ຄອບຄົວ, ພົນລະເມືອງ 930 ຄົນ, ຍິງ 428 ຄົນ, ປະຊາຊົນສ່ວນຫຼາຍຢຶດຖືກເອົາການປູກຝັງ-ລ້ຽງສັດ ແລະບໍລິການຄ້າຂາຍ, ສາມາດສ້າງຄວາມເຂັ້ມແຂງ ກາຍເປັນບ້ານພັດທະນາ, ພ້ອມນັ້ນ ຕາງໜ້າປະຊາຊົນ ໄດ້ມີຄໍາສະເໜີຕໍ່ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 6 ເຊັ່ນ: ຂໍທຶນສ້າງອຸ່ງ (ອ່າງ) ເກັບນໍ້າລິນເພີ່ມອີກ, ເນື່ອງຈາກອຸ່ງເກັບນໍ້າໃນປັດຈຸບັນມີຂະໜາດນ້ອຍ, ນໍ້າບໍ່ພຽງພໍຕໍ່ການຊົມໃຊ້ຂອງປະຊາຊົນ, ສະເໜີໃຫ້ຊ່ວຍຊອກວິທີທາງຊ່ວຍເຫຼືອຄອບຄົວທີ່ຍັງທຸກຍາກ ແລະປັບປຸງພື້ນຖານໂຄງລ່າງພາຍໃນບ້ານ, ລວມທັງເສັ້ນທາງເຂົ້າຫາເຂດທໍາການຜະລິດ.
 |
ຈາກນັ້ນ ຜູ້ຕາງໜ້າພະແນກການຂັ້ນແຂວງ ທີ່ໄດ້ຮ່ວມຕິດຕາມຄະນະ ໄດ້ຂຶ້ນມີຄໍາຊີ້ແຈງ, ອະທິບາຍ ແລະເຜີຍແຜ່ບັນດາແຈ້ງການ-ຂໍ້ຫ້າມ ທີ່ກ່ຽວຂ້ອງກັບວຽກງານວິຊາສະເພາະ ຂອງແຕ່ລະຂະແໜງການ, ເພື່ອໃຫ້ປະຊາຊົນຊ່ວຍປະກອບສ່ວນ ຮັກສາຮ່ອງລະບາຍນໍ້າຂ້າງທາງ, ອະນາໄມຫຍ້າແຄມທາງ ແລະແນວທາງສົ່ງເສີມການປູກໜາກກາເຟ ເພື່ອສ້າງລາຍຮັບໃຫ້ກັບປະຊາຊົນ.
 |
ໂອກາດນີ້, ທ່ານ ບຸນເລື່ອມ ມະນີວົງ ໄດ້ເຜີຍແຜ່ຜົນສຳເລັດ ກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ X ແລະສະພາປະຊາຊົນແຂວງ ຊຸດທີ V, ທັງໄດ້ເປີດໂອກາດໃຫ້ຜູ້ເຂົ້າຮ່ວມສະແດງຄວາມເຫັນ ແລະຄຳສະເໜີ ກ່ຽວກັບບັນຫາທີ່ກະທົບຕໍ່ຊີວິດການເປັນຢູ່ຂອງປະຊາຊົນ ເພື່ອນຳສະເໜີຕໍ່ສະພາແຫ່ງຊາດ ແລະປະສານກັບຂະແໜງການທີ່ກ່ຽວຂ້ອງ ພິຈາລະນາແກ້ໄຂຕາມຄວາມເໝາະສົມ, ຖືກຕ້ອງຕາມລະບຽບການ. ພ້ອມນີ້ ໄດ້ອະທິບາຍ ແລະຊີ້ແຈງບາງຄຳເຫັນ ເພື່ອໃຫ້ປະຊາຊົນຮັບຮູ້-ເຂົ້າໃຈຕໍ່ແນວທາງນະໂຍບາຍຂອງພັກ, ກົດໝາຍ ແລະນິຕິກຳຂອງລັດ ເພື່ອພ້ອມກັນປະກອບສ່ວນສ້າງສາ-ພັດທະນາປະເທດຊາດ ກໍຄື ແຂວງຫຼວງພະບາງ ໃຫ້ນັບມື້ຈະເລີນກ້າວໜ້າ.
ທ່ານເລຂາພັກແຂວງປະທານສະພາປະຊາຊົນແຂວງຫຼວງພະບາງຍັງໄດ້ມອບເງິນຈຳນວນ 15 ລ້ານກີບ ໃຫ້ແກ່ຄະນະກຳມະການປົກຄອງ 3 ບ້ານ ທີ່ເຂົ້າຮ່ວມ ເພື່ອນຳໄປຊຸກຍູ້ການຈັດຕັ້ງປະຕິບັດວຽກງານຂອງບ້ານ ໃຫ້ໄດ້ຮັບຜົນດີ.
ຂ່າວ-ພາບ: ທະນູສີນ ອິດທິພົນ
ຄໍາເຫັນ