 |
ທ່ານ ພູວົງ ວົງຄໍາຊາວ ໄດ້ກ່າວວ່າ: ຄະນະຮັບຜິດຊອບລະດັບຊາດ ພ້ອມດ້ວຍການນໍາຂອງແຂວງບໍ່ແກ້ວ ແລະ ແຂວງເຊກອງ, ຄະນະອົງການປົກຄອງ ນວ ແລະ 9 ເມືອງ ຕະຫຼອດຮອດ ປະຊາຊົນທຸກຊັ້ນຄົນ, ນັກຮຽນທົ່ວເມືອງປາກງື່ມ ໄດ້ມາເຕົ້າໂຮມກັນ ເຂົ້າຮ່ວມພິທີແຫ່-ແລ່ນທວນໄຟ ເພື່ອເປັນການສະໜັບສະໜູນ ແລະ ເປັນເຈົ້າພາບທີ່ດີຮ່ວມກັນ ໃຫ້ແກ່ງານມະຫະກໍາກິລາແຫ່ງຊາດ ຄັ້ງທີ XII ທີ່ ນວ ຊຶ່ງຈະຈັດຂຶ້ນໃນລະຫວ່າງວັນທີ 15-25 ພະຈິກ 2025 ໂດຍຂະບວນແຫ່-ແລ່ນທວນໄຟຄັ້ງນີ້ ເປັນຄັ້ງທີ 7 ທີ່ສືບຕໍ່ຈາກເມືອງຫາດຊາຍຟອງ. ຈຸດປະສົງເພື່ອເປັນການແຈ້ງຂ່າວ ແລະ ປຸກລະດົມ ໃຫ້ທົ່ວສັງຄົມ ປະຊາຊົນຊາວນະຄອນຫຼວງວຽງຈັນ ກໍຄື ບັນດາແຂວງໄດ້ຮັບຊາບ ແລະ ເປັນເຈົ້າການຮ່ວມກັນ ເປັນເຈົ້າພາບທີ່ດີ ໃນການຈັດງານແຂ່ງຂັນກິລາ ຄັ້ງນີ້ ໃຫ້ມີຜົນສໍາເລັດ ຕາມລະດັບຄາດໝາຍ.
ພິທີແຫ່-ແລ່ນທວນໄຟ ຈະກາຍເປັນສັນຍາລັກແຫ່ງຄວາມສາມັກຄີ, ມິດຕະພາບອັນເປັນປຶກແຜ່ນ ແລະ ຄວາມເປັນຈິດໜຶ່ງໃຈດຽວ ຂອງຄະນະນໍານັກກິລາ ແລະ ນັກກິລາຈາກບັນດາແຂວງ ໃນທົ່ວປະເທດ, ພ້ອມກັນພັດທະນາວຽກງານກິລາ-ກາຍຍະກໍາ ຊຶ່ງເປັນໜຶ່ງໃນ 5 ຫຼັກມູນຂອງການສຶກສາ ແລະ ສ້າງໃຫ້ໄດ້ນັກກິລາທີ່ດີເດັ່ນ ໃນວົງການກິລາລາວ ກໍຄືການສ້າງປະສົບການ ແລະ ຄວາມເຂັ້ມແຂງໃຫ້ນັກກິລາດ້ວຍຫຼາຍຮູບແບບ ຫຼາຍສີສັນ ສ້າງເງື່ອນໄຂຍົກລະດັບຄວາມສາມາດ ຂອງນັກກິລາໃຫ້ທຽບທັນກັບລະດັບພາກພື້ນ ແລະ ສາກົນ. ດັ່ງຄໍາຂວັນຂອງງາານມະຫະກໍາກິລາແຫ່ງຊາດ ທີ່ວ່າ: ສາມັກຄີ ມີວິໄນ ໂປ່ງໃສ ໄດ້ການພັດທະນາ; ພ້ອມກັນນັ້ນ ເພື່ອສືບຕໍ່ຊຸກຍູ້ການສ້າງຂະບວນການໃຫ້ມີລັກສະນະຕໍ່ເນື່ອງ ແລະ ຟົດຟື້ນ ທັງເປັນການຈັດງານມະຫະກໍາກິລາ-ກາຍຍະກໍາ ໃນທົ່ວປະເທດ ໃຫ້ປະສົບຜົນສໍາເລັດຢ່າງມີໝາກຜົນ ແລະ ຈົບງາມ.
 |
ຂະບວນແຫ່ ແລະ ແລ່ນທວນໄຟ ແມ່ນໄດ້ເລີ່ມຈາກໜ້າໂຮງຮຽນມັດທະຍົມຕອນຕົ້ນບ້ານພ້າວ ນໍາພາຂະບວນແຫ່-ແລ່ນທວນໄຟ ເລີ່ມຈາກຈຸດທີ 1 ໄລຍະ 200 ແມັດ ໂດຍທ່ານ ພູວົງ ວົງຄໍາຊາວ ແລ້ວມອບທວນໄຟສົ່ງຕໍ່ໃຫ້ທ່ານ ພົຈວ ແປ້ນຄໍາ ບຸດຈັນແພງ ເພື່ອນໍາຂະບວນສືບຕໍ່ແຫ່-ແລ່ນທວນໄຟ ຈາກຈຸດທີ 2 ໄລຍະ 200 ແມັດ ແລະ ສົ່ງຕໍ່ໃຫ້ທ່ານ ບຸນຫຼາຍ ບຸດທີ ເພື່ອນໍາຂະບວນສືບຕໍ່ແຫ່-ແລ່ນທວນໄຟ ຈາກຈຸດທີ 3 ໄລຍະ 200 ແມັດ ແລະ ສົ່ງຕໍ່ໃຫ້ທ່ານ ຄໍາໝູນ ຕຽງທະລາດ ເລຂາພັກເມືອງປາກງື່ມ ຮັບ ແລະ ສົ່ງມອບໃຫ້ຄະນະຮັບຜິດຊອບ ຈັດງານມະຫະກໍາກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ເກມ 2025.
ສໍາລັບຂະບວນແຫ່ ແລະ ແລ່ນທວນໄຟ ສະໜັບສະໜູນງານມະຫະກໍາກິລາແຫ່ງຊາດ ຄັ້ງທີ XII ຄັ້ງຕໍ່ໄປ ຈະໄດ້ຈັດຂຶ້ນຢູ່ເມືອງໄຊທານີ ຊຶ່ງຈະເປັນເມືອງທີ 8 ໃນວັນທີ 7 ພະຈິກ 2025 ນີ້.
ຂ່າວ: ສີພອນ
ຄໍາເຫັນ