ໃນວັນ 7 ກໍລະກົດຜ່ານມານີ້ ທີ່ຫ້ອງປະຊຸມໂຮງຮຽນວິຊາຊີບແບບປະສົມແຂວງຜົ້ງສາລີ ສູນການສຶກສານອກໂຮງຮຽນ ໄດ້ຈັດພິທີສອບເສັງຈົບຊັ້ນ ມໍ7 ບໍາລຸງ ຊຸດທີ 26 ສົກຮຽນ 2024-2025. ໂດຍການເປັນປະທານຂອງທ່ານ ສານ ໄຊຍະວົງ ຮອງຫົວໜ້າພະແນກ ສຶກສາທິການ ແລະ ກິລາແຂວງຜົ້ງສາລີ ຜູ້ຊີ້ນຳວຽກງານສູນການສຶກສານອກໂຮງຮຽນ, ມີທ່ານ ວັນທອງ ພົມມະຈັນ ຮັກສາການຫົວຫນ້າພະແນກສົ່ງເສີມວິຊາຊີບຂັ້ນພື້ນຖານ, ກົມການສຶກສານອກໂຮງຮຽນກະຊວງສຶກສາ ທິການແລະກິລາ, ມີທ່ານ ອຸ່ນຄຳ ແສງອິນແກ້ວ ຜູ້ອຳນວຍການ ສູນການສຶກສານອກໂຮງຮຽນ ແຂວງຜົ້ງສາລີ, ເຂົ້າຮ່ວມມີຄະນະຮັບຜິດຊອບການສອບເສັງ,ພະນັກງານຄູອາຈານ,ພາກສ່ວນທີກ່ຽວຂ້ອງ,ຕະຫຼອດນັກສອບເສັງ ມ7 ຈາກສູນການສຶກສານອກໂຮງຮຽນຂອງແຂວງເຂົ້າຮ່ວມ.
ທ່ານ ອຸ່ນຄໍາ ແສງອິນແກ້ວ ຜູ້ອໍານວຍການ ສູນການສຶກສານອກໂຮງຮຽນແຂວງ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດການຮຽນ-ການສອນຊັ້ນມັດທະຍົມຕອນປາຍບຳລຸງ ມໍ7 ຊຸດທີ 26 ສົກຮຽນ 2024-2025. ສຳລັບນັກຮຽນ ມໍ7 ບໍາລຸງຊຸດທີ 26 ນີ້, ມີທັງໝົດ 23 ຄົນ ຍິງ 4 ຄົນ, ການສອບເສັງຈົບຊັ້ນມັດທະຍົມຕອນປາຍ (ມ7) ບໍາລຸງ ຊຸດທີ 26 ໃຊ້ເວລາ 2 ວັນ (ວັນທີ 8-9 ກໍລະກົດ 2025), ລວມມີ 4 ວິຊາຄື: ວິຊາພາສາລາວ - ວັນນະຄະດີ, ວິຊາເຄມີສາດ, ວິຊາຄະນິດຊາດ ແລະ ວິຊາພູມສາດ. ຈາກນັ້ນ, ທ່ານ ສານ ໄຊຍະວົງ ຮອງຫົວໜ້າພະແນກ ສຶກສາທິການ ແລະ ກິລາແຂວງ ໄດ້ກ່າວເປີດການສອບເສັງຢ່າງເປັນທາງການ.
(ຂ່າວ: ສົມຄິດ)
ຄໍາເຫັນ