ບົດລາຍງານລະບຸວ່າ: ຜົນການເຝົ້າຕິດຕາມຜູ້ໃຫຍ່ທີ່ເປັນໂຣກຕຸ້ຍ ແລະ ເບົາຫວານປະເພດ 2 ຈຳນວນ 6,356 ຄົນ ເປັນເວລາ 8 ປີ ແລະ ໄດ້ວິເຄາະອັດຕາການເກີດໂຣກມະເຮັງໃນກຸ່ມທີ່ໃຊ້ຢາຫຼຸດນ້ຳໜັກແບບສັກ ແລະ ກຸ່ມທີ່ເຂົ້າຮັບການຜ່າຕັດເພື່ອຫຼຸດນ້ຳໜັກ ພົບວ່າ: ເຖິງແມ່ນວ່າການຜ່າຕັດຈະຊ່ວຍຫຼຸດນ້ຳໜັກໄດ້ຫຼາຍກວ່າ, ແຕ່ການຫຼຸດລົງຂອງຄວາມສ່ຽງເປັນໂຣກມະເຮັງແມ່ນໃກ້ຄຽງກັນໃນທັງສອງກຸ່ມ.
ໃນຂະນະທີ່ຜົນຂອງການຄໍານວນຄວາມແຕກຕ່າງຂອງນໍ້າໜັກພົບວ່າ: ຢາຫຼຸດນໍ້າໜັກແບບສັກຫຼຸດຄວາມສ່ຽງຂອງໂຣກມະເຮັງຫຼາຍກວ່າການຜ່າຕັດເຖິງ 41%, ໂດຍນັກຄົ້ນຄວ້າຊີ້ໃຫ້ວ່າຢາມີຄຸນສົມບັດຕ້ານການອັກເສບ ຄຽງຄູ່ກັບຜົນຂ້າງຄຽງນອກເໜືອຈາກການຫຼຸດນໍ້າໜັກຂອງຢາທີ່ກ່ຽວຂ້ອງອື່ນໆ ອາດຈະປະກອບສ່ວນໃນການຫຼຸດຜ່ອນຄວາມສ່ຽງເປັນໂຣກມະເຮັງ.
ຢ່າງໃດກໍຕາມ, ທີມນັກຄົ້ນຄວ້າໄດ້ເນັ້ນໜັກວ່າການສຶກສາເພີ່ມເຕີມແມ່ນຈໍາເປັນເພື່ອຢືນຢັນວ່າຢາລົດນໍ້າໜັກແບບສັກເຫຼົ່ານີ້ບໍ່ໄດ້ເພີ່ມຄວາມສ່ຽງຕໍ່ການເປັນໂຣກມະເຮັງທີ່ກ່ຽວຂ້ອງກັບໂຣກຕຸ້ຍ.
ຜົນການສຶກສາດັ່ງກ່າວ ໄດ້ຖືກເຜີຍແຜ່ຜ່ານ E-Clinical Medicine ຊຶ່ງແມ່ນສ່ວນໜຶ່ງຂອງວາລະສານການແພດ The Lancet ໃນວັນທີ 12 ພຶດສະພາ ຜ່ານມາ.
ຄໍາເຫັນ