ການສຶກສານໍາພາໂດຍສະຖາບັນສຸຂະພາບແຫ່ງຊາດຂອງສະຫະລັດ ອາເມຣິກາ ໄດ້ນໍາສະເໜີຜົນການວິເຄາະgenome ຂອງມະເຮັງປອດໃນຜູ້ທີ່ບໍ່ເຄີຍສູບຢາ ຊຶ່ງສະໜອງຂໍ້ມູນໃໝ່ກ່ຽວກັບກໍລະນີມົນລະພິດທາງສິ່ງແວດລ້ອມອາດຈະເຮັດໃຫ້ເກີດການເປັນມະເຮັງ ເຖິງແມ່ນວ່າບໍ່ເຄີຍສູບຢາ.
ຄະນະນັກຄົ້ນຄວ້າຈາກສະຖາບັນມະເຮັງແຫ່ງຊາດ ສັງກັດສະຖາບັນສຸຂະພາບແຫ່ງຊາດຂອງ ສະຫະລັດ ອາເມຣິກາ ແລະ ມະຫາວິທະຍາໄລຄາລິຟໍເນຍ, ຊານດິເອໂອ ໄດ້ກວດສອບເນື້ອງອກໃນປອດຈາກຄົນເຈັບທີ່ບໍ່ເຄີຍສູບຢາ ຈຳນວນ 871 ຄົນ ໃນ 28 ພາກພື້ນທົ່ວໂລກ ຊຶ່ງເປັນສ່ວນໜຶ່ງຂອງການສຶກສາ Sherlock-Lung ຊຶ່ງມີຈຸດປະສົງເພື່ອຕິດຕາມການກາຍພັນຂອງມະເຮັງປອດ.
ການກວດສອບພົບວ່າ: ການສໍາຜັດກັບມົນລະພິດທາງອາກາດ, ໂດຍສະເພາະຈາກການຈະລາຈອນ ແລະ ແຫຼ່ງອຸດສາຫະກໍາແມ່ນກ່ຽວຂ້ອງກັບການກາຍພັນທີ່ເຮັດໃຫ້ເກີດມະເຮັງ ຊຶ່ງລວມທັງການກາຍພັນໃນພັນທຸກຳ TP53 ແລະ ສັນຍານການກາຍພັນອື່ນໆທີ່ເຊື່ອມຕໍ່ກັບມະເຮັງທີ່ມີສາເຫດຈາກການສູບຢາ.
ນອກຈາກນັ້ນ, ມົນລະພິດທາງອາກາດຍັງພົວພັນກັບກໍລະນີ telomeres ຫຼື ສ່ວນທີ່ຢູ່ບໍລິເວນປາຍສຸດຂອງໂຄໂມໂຊມທີ່ສັ້ນລົງ ຊຶ່ງເປັນກໍລະນີທີ່ກ່ຽວຂ້ອງກັບຄວາມແກ່ຊະລາ ແລະ ຄວາມສາມາດການແບ່ງຈຸລັງຫຼຸດລົງທີ່ມີທ່າອ່ຽງຈະເລັ່ງການແຜ່ລາມຂອງມະເຮັງ.
ການເຮັດຄວາມເຂົ້າໃຈວ່າມົນລະພິດທາງອາກາດມີສ່ວນສົ່ງເສີມການກາຍພັນຂອງເນື້ອງອກໃນປອດອາດຊ່ວຍອະທິບາຍຄວາມສ່ຽງຂອງການເກີດມະເຮັງໃນຜູ້ທີ່ບໍ່ສູບຢາ ແລະ ເນັ້ນໜັກເຖິງຄວາມຈຳເປັນອັນຮີບດ່ວນໃນການປົກປັກຮັກສາສິ່ງແວດລ້ອມໃຫ້ຫຼາຍຂຶ້ນ.
ທັງນີ້, ມະເຮັງປອດໃນກຸ່ມຜູ້ທີ່ບໍ່ສູບຢາກວມເອົາ 25% ຂອງຄົນເຈັບມະເຮັງປອດທັງໝົດໃນທົ່ວໂລກ.
ຄໍາເຫັນ