ກ່ອນໜ້ານີ້ 80 ປີ, ຊາວຫວຽດນາມ ຫຼາຍກວ່າ 20 ລ້ານຄົນ ໄດ້ລຸກຮື້ຂຶ້ນຕໍ່ສູ້ພວກສັດຕູຮຸກຮານ ເພື່ອຍາດເອົາໄຊຊະນະອັນຍິ່ງໃຫຍ່ຂອງການປະຕິວັດເດືອນສິງຫາ, ຍາດເອົາອຳນາດການປົກຄອງມາໃຫ້ປະຊາຊົນ. ໄຊຊະນະຂອງການປະຕິວັດເດືອນສິງຫາ, ແມ່ນກຳລັງໜູນໃຫ້ແກ່ບັນດາຜົນສຳເລັດຂອງຫວຽດນາມ ໃນພາລະກິດແຫ່ງການສ້າງສາ ແລະ ພັດທະນາປະເທດຊາດ. ການປະຕິວັດເດືອນສິງຫາ ແມ່ນໜຶ່ງໃນບັນດາໄຊຊະນະອັນຍິ່ງໃຫຍ່ຂອງການປະຕິວັດ ຫວຽດນາມ ໃນສະຕະວັດທີ XX. ໃນນັ້ນ, ມີບົດເພງວິລະຊົນເດືອນສິງຫາ ກໍແມ່ນໝາກຜົນແຫ່ງການເຕົ້າໂຮມກຳລັງແຮງດ້ານຄຸນທາດ, ພູມປັນຍາ, ບັນຍາກາດອັນສະຫງ່າອົງອາດຂອງຊາດຫວຽດນາມ ໃນຍຸກສະໄໝ ໂຮ່ຈິມິນ ພາຍໃຕ້ການນຳພາຂອງພັກກອມມູນິດ ຫວຽດນາມ.
ນຳພາຊາດຫວຽດນາມ ກ້າວເຂົ້າສູ່ສັງກາດໃໝ່
ພາຍໃຕ້ການນຳພາຂອງພັກກອມມູນິດ ຫວຽດນາມ ແລະ ປະທານ ໂຮ່ຈິມິນ, ປະຊາຊົນ ຫວຽດນາມ ພ້ອມກັນລຸກຮື້ຂຶ້ນດຳເນີນການຕໍ່ສູ້ຄັ້ງໃຫຍ່, ຍາດເອົາສິດອຳນາດປົກຄອງ. ການລຸກຮື້ຂຶ້ນຕໍ່ສູ້ຄັ້ງໃຫຍ່ຂອງຊາວຫວຽດນາມ ໃຊ້ເວລາພຽງ 15 ວັນເທົ່ານັ້ນ ໃນທ້າຍເດືອນສິງຫາປີ 1945, ກໍຍາດໄດ້ໄຊຊະນະຢ່າງສົມບູນ, ຍາດເອົາອຳນາດການປົກຄອງມາໃຫ້ປະຊາຊົນ.
ໄຊຊະນະຂອງການປະຕິວັດເດືອນສິງຫາປີ 1945 ໄດ້ນຳພາຊາດຫວຽດນາມ ກ້າວເຂົ້າສູ່ສັງກາດໃໝ່, ສັງກາດເອກະລາດຊົນຊາດ ຕິດພັນກັບສັງຄົມນິຍົມ. ປະຊາຊົນຫວຽດນາມ ຈາກທີ່ເປັນຂ້າທາດ ໄດ້ກາຍເປັນເຈົ້າຂອງປະເທດຊາດ, ເປັນເຈົ້າຊາຕະກຳຂອງຕົນ. ການປະຕິວັດເດືອນສິງຫາ ໄດ້ຮັບໄຊຊະນະ ໄດ້ພິສູດໃຫ້ເຫັນການປະຕິບັດແນວທາງທີ່ຖືກຕ້ອງ, ການນຳພາທີ່ສະຫຼາດສ່ອງໃສ, ວິໄສທັດທີ່ມີຍຸດທະສາດຂອງພັກ ແລະ ປະທານ ໂຮ່ຈິມິນ. ການປະຕິວັດເດືອນສິງຫາ ປະສົບຜົນສຳເລັດ ເປັນການຢືນຢັນກຳລັງແຮງຂອງມະຫາສາມັກຄີທົ່ວປວງຊົນທັງຊາດ.
ປະຊາຊົນຫວຽດນາມ, ນອກຈາກມີນ້ຳໃຈຮັກຊາດແລ້ວ, ຍັງແມ່ນເຈດຈຳນົງເປັນເຈົ້າປະເທດຊາດ. ສະນັ້ນ, ປະຊາຊົນຫວຽກນາມ ນັບໝື່ນຄົນ ໄດ້ຕັດສິນໃຈສູງສົ່ງດ້ວຍຈິດໃຈ ແລະ ກຳລັງແຮງ, ເສຍສະຫຼະຊີວິດ, ຊັບສິນ ເພື່ອຮັກສາສິດເສລີ ແລະ ເອກະລາດ. ນີ້ສະແດງໃຫ້ເຖິງເປັນຄວາມເປັນຈິດໜຶ່ງໃຈດຽວກັນ, ເຫັນດີເປັນເອກະພາບ ລະຫວ່າງ ສູນກາງ ແລະ ທ້ອງຖິ່ນ, ລະຫວ່າງ ລັດຖະບານ ແລະ ປະຊາຊົນ, ລະຫວ່າງ ພັກກັບປະຊາຊົນ.
ສ້າງຄວາມໄວ້ເນື້ອເຊື່ອໃຈ, ກຳລັງໜູນໃນພາລະກິດແຫ່ງການສ້າງສາ, ພັດທະນາປະເທດຊາດຕື່ມອີກ
80 ປີຜ່ານມາ, ຫວຽດນາມ ບັນລຸໄດ້ຜົນງານໃຫຍ່ຫຼວງຫຼາຍຢ່າງ, ມີຄວາມໝາຍປະຫວັດສາດໃນທຸກຂົງເຂດວຽກງານ. ຂອບຂະໜາດ ແລະ ກຳລັງບົ່ມຊ້ອນດ້ານເສດຖະກິດ ເພີ່ມຂຶ້ນຢ່າງວ່ອງໄວ, ຈາກປະເທດທຸກຍາກ, ດ້ອຍພັດທະນາ, ຫວຽດນາມ ໄດ້ກາຍເປັນປະເທດພວມພັດທະນາ, ມີລາຍຮັບປານກາງ. ສູ້ຊົນຮອດປີ 2045, ຫວຽດນາມ ກາຍເປັນປະເທດພັດທະນາ, ມີລາຍຮັບສູງ ຕາມມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII ຂອງພັກ ວາງອອກ.
ພິເສດ, ພາຍຫຼັງ 39 ປີ ແຫ່ງການປະຕິບັດການປ່ຽນແປງໃໝ່ (1986 – 2025), “ປະເທດ ຫວຽດນາມ ບໍ່ມີຍາມໃດມີພາລະກິດໃຫຍ່ຫຼວງ, ກຳລັງບົ່ມຊ້ອນ, ມີທີ່ຕັ້ງ ແລະ ອິດທິພົນຊື່ສຽງສາກົນຄືໃນທຸກວັນນີ້”. ຫວຽດນາມ ພວມສືບຕໍ່ຍູ້ແຮງການຫັນປະເທດຊາດເປັນອຸດສາຫະກຳ ແລະ ທັນສະໄໝ, ເຊື່ອມໂຍງເຂົ້າກັບສາກົນຢ່າງແຮງ ແລະ ເລິກເຊິ່ງກວ້າງຂວາງ, ເສດຖະກິດ ບັນລຸການເຕີບໂຕສູງ ແລະ ມີສະຖຽນລະພາບ, ຊີວິດການເປັນຢູ່ຂອງປະຊາຊົນນັບມື້ໄດ້ຮັບການປັບປຸງ, ເອກະລາດ, ອະທິປະໄຕ, ທ້ອນໂຮມປະເທດຊາດ ແລະ ຜືນແຜ່ນດິນອັນຄົບຖ້ວນ ໄດ້ຮັກສາໄວ້ຢ່າງໝັ້ນຄົງ. ບັນດາຜົນງານທີ່ມີຄວາມໝາຍປະຫວັດສາດນັ້ນ ແມ່ນສິ່ງພິສູດໃຫ້ເຫັນຄຳສາບານຕົວເອກະລາດປີ 1945 ແລະ ເປັນການຢັ້ງຢືນນ້ຳໃຈສາມັກຄີ, ເຈດຈຳນົງບໍ່ຍອມຈຳນົນ ແລະ ຄວາມຄາດຫວັງບືນຕົວຂຶ້ນຂອງທົ່ວປວງຊົນທັງຊາດ ພາຍໃຕ້ການນຳພາຂອງພັກກອມມູນິດ ຫວຽດນາມ.
ປັດຈຸບັນ, ຫວຽດນາມ ພວມອອກແຮງແຂ່ງຂັນປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງພັກ, ແຜນການພັດທະນາເສດຖະກິດ - ສັງຄົມ 5 ປີ (2021 – 2025), ສູ້ຊົນປະຕິບັດສຳເລັດບັນດາເປົ້າໝາຍຍຸດທະສາດ ຕາມມະຕິກອງປະຊຸມໃຫຍ່ຄັ້ງທີ XIII ຂອງພັກ ວາງອອກ, ສ້າງທ່ວງທ່າຢ່າງໝັ້ນແກ່ນໃນຕໍ່ໜ້າ. ໃນພິທີສາບານຕົວຂຶ້ນຮັບດຳລົງຕຳແໜ່ງ ໃນວັນທີ 3 ສິງຫາ 2024, ທ່ານ ໂຕເລິມ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ກ່າວວ່າ: ຄະນະບໍລິຫານງານສູນກາງພັກກອມມູນິດ ຫວຽດນາມ, ກົມການເມືອງ, ຄະນະເລຂາທິການສູນກາງພັກ ຊຸດທີ 13 ແມ່ນບັນດາໝູ່ຄະນະທີ່ໝັ້ນຄົງເຂັ້ມແຂງ, ເປັນແກ່ນສານເຕົ້າໂຮມກຳລັງແຮງ, ຊີ້ນຳ-ນຳພາ ທົ່ວພັກ, ທົ່ວປວງຊົນ, ທົ່ວກອງທັບ ປະຕິບັດແຜນນະໂຍບາຍ, ແນວທາງຂອງພັກ ຢ່າງມີໄຊ. ກ່ອນອື່ນໝົດ ແມ່ນມະຕິກອງປະຊຸມໃຫຍ່ ຜູ້ແທນທົ່ວປະເທດຄັ້ງທີ XIII ຂອງພັກ, ສ້າງພື້ນຖານຢ່າງໝັ້ນແກ່ນ ເພື່ອປະຕິບັດສຳເລັດເປົ້າໝາຍຂອງປະເທດຊາດ 100 ປີ ພາຍໃຕ້ການຊີ້ນຳ-ນຳພາ ຂອງພັກ, 100 ປີປະເທດ ປະຊາທິປະໄຕ ສາທາລະນະລັດ ຫວຽດນາມ. ປັດຈຸບັນ, ແມ່ນປະເທດສາທາລະນະລັດ ສັງຄົມນິຍົມ ຫວຽດນາມ, ຮອດກາງສະຕະວັດທີ 21, ຫວຽດນາມ ກາຍເປັນປະເທດພັດທະນາ ຕາມການກຳນົດທິດສັງຄົມນິຍົມ.
80 ປີກ່ອນໜ້ານີ້, ດ້ວຍບັນຍາກາດອັນສະຫງ່າອົງອາດຂອງການປະຕິວັດເດືອນສິງຫາ 1945, ທົ່ວພັກ, ທົ່ວປວງຊົນ ແລະ ທົ່ວກອງທັບຫວຽດນາມ ໄດ້ຮ່ວມແຮງຮ່ວມໃຈ, ຕັດສິນໃຈ ສ້າງບັນດາຜົນງານທີ່ມະຫັດສະຈັນ ໄລຍະທາງແຫ່ງການປະຕິວັດໃໝ່, ສັງກາດໃໝ່ ຂອງຊາດຫວຽດນາມ ວິລະຊົນ.
ໂດຍ: ຫອມໄຊຍະເດດ
ຄໍາເຫັນ