 |
ທ່ານ ບຸນທັນ ອໍຕ໋ອງຫວັນ ຮອງຫົວໜ້າຫ້ອງການສຶກສາທິການ ແລະ ກິລາເມືອງ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານການສຶກສາ ແລະ ກິລາ ສົກຮຽນ 2025-2026 ຜ່ານມາ ແລະ ທິດທາງແຜນການ ສົກຮຽນ 2026-2027. ໃນນັ້ນ ໄດ້ສະຫຼຸບສັງລວມຜົນການຈັດຕັ້ງປະຕິບັດ 13 ຄາດໝາຍໃຫ້ຮູ້ວ່າ: ສາມາດບັນລຸໄດ້ 8 ຄາດໝາຍ ແລະ ມີ 2 ຄາດໝາຍໃກ້ຈະບັນລຸ, ພ້ອມນັ້ນ ຍັງບໍ່ທັນບັນລຸ 3 ຄາດໝາຍ; ທົ່ວເມືອງຫຼວງນໍ້າທາ ມີໂຮງຮຽນທັງພາກລັດ ແລະ ເອກະຊົນ ທັງໝົດ 158 ແຫ່ງ, ມີນັກຮຽນທັງໝົດ 17,576 ຄົນ, ຍິງ 8,445 ຄົນ ແລະ ຄູສອນ 1,094 ຄົນ, ຍິງ 774 ຄົນ.
 |
ອັດຕາເຂົ້າຮຽນຂອງເດັກ 0-2 ປີ ເທົ່າກັບ 16.48%, ເດັກ 3-4 ປີ 94.6%, ເດັກ 3-5 ປີ 95.8%ແລະ ເດັກ 5 ປີ 97.6%; ຊັ້ນປະຖົມສຶກສາອັດຕາເຂົ້າຮຽນໃໝ່ ປ1 ປະຕິບັດໄດ້ 85.5%, ອັດຕາເຂົ້າຮຽນລວມ ປ1 ເທົ່າກັບ 104.6%, ອັດຕາເລື່ອນຊັ້ນ ປ5 ເທົ່າກັບ 98.3%, ແລະ ອັດຕາປະລະການຮຽນຊັ້ນ ປ1 ເທົ່າກັບ 0.9%ແລະ ຊັ້ນມັດທະຍົມຕອນຕົ້ນອັດຕາເຂົ້າຮຽນລວມຊັ້ນມັດທະຍົມຕອນຕົ້ນ ເທົ່າກັບ 102.1%, ອັດຕາເລື່ອນຊັ້ນ ແລະ ຈົບຊັ້ນ ເທົ່າກັບ 93.6%ແລະ ອັດຕາປະລະການຮຽນຊັ້ນມັດທະຍົມຕອນຕົ້ນ ເທົ່າກັບ 5.4%.
ນອກຈາກນີ້, ຜູ້ເຂົ້າຮ່ວມກອງປະຊຸມຍັງໄດ້ພ້ອມກັນປະກອບຄຳເຫັນ ກ່ຽວກັບ ການຈັດຕັ້ງປະຕິບັດວຽກງານການສຶກສາໃນໄລຍະຜ່ານມາ ເພື່ອຊອກຫາວິທີແກ້ໄຂບັນຫາໃນຕໍ່ໜ້າໃຫ້ດີຂຶ້ນ ເປັນຕົ້ນແມ່ນ ນັກຮຽນປະລະການຮຽນ, ບັນຫານັກຮຽນບໍ່ຢາກມາໂຮງຮຽນ, ມາດຕະການປ້ອງກັນການມົ້ວສຸມຢາເສບຕິດ, ການປັບປຸງຄຸນນະພາບການຮຽນ-ການສອນ ແລະ ການວາງແຜນຊຸກຍູ້ການຈັດຕັ້ງປະຕິບັດບັນດາຄາດໝາຍທີ່ຍັງບໍ່ທັນບັນລຸໃຫ້ສຳເລັດຕາມແຜນ.
 |
ທ່ານ ຫຼົງມີໄຊ ສອນມະນີ ຮອງຫົວໜ້າພະແນກສຶກສາທິການ ແລະ ກິລາແຂວງໄດ້ໃຫ້ກຽດໂອ້ລົມໂດຍໄດ້ເນັ້ນໜັກໃຫ້ຜູ້ບໍລິຫານການສຶກສາແຕ່ລະຂັ້ນ ເອົາໃຈໃສ່ຍົກລະດັບຄຸນນະພາບການຮຽນ-ການສອນຢ່າງຈິງຈັງ. ພ້ອມທັງຮຽກຮ້ອງໃຫ້ຄູ-ອາຈານ ເອົາໃຈໃສ່ພັດທະນາວິທີການສິດສອນໃຫ້ມີຄວາມໜ້າສົນໃຈ, ແທດເໝາະກັບສະພາບຕົວຈິງຂອງນັກຮຽນ. ພ້ອມກັນນັ້ນ, ຕ້ອງໄດ້ເອົາໃຈໃສ່ຕິດຕາມ ແລະ ປະເມີນຜົນການຮຽນຂອງນັກຮຽນຢ່າງໃກ້ຊິດ ເພື່ອຊອກຫາວິທີຊ່ວຍເຫຼືອນັກຮຽນທີ່ຮຽນອ່ອນ, ຫຼຸດຜ່ອນອັດຕາການຄ້າງຫ້ອງ ແລະ ແກ້ໄຂບັນຫາການປະລະການຮຽນໃຫ້ຫຼຸດລົງຢ່າງເປັນຮູບປະທຳ.
ທ່ານ ຄໍາຫຼ້າ ແຫຼ່ງໄຊຍະທຳ ໄດ້ມີຄຳເຫັນໂອ້ລົມຕໍ່ກອງປະຊຸມ ໂດຍຮຽກຮ້ອງໃຫ້ຄະນະຜູ້ບໍລິຫານ ແລະ ຄູອາຈານທຸກພາກສ່ວນ ຈົ່ງຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນ, ພ້ອມທັງເນັ້ນໃຫ້ເອົາໃຈໃສ່ສຶກສາອົບຮົມການເມືອງແນວຄິດ, ຄຸນສົມບັດສິນທຳປະຕິວັດ, ຮີດຄອງປະເພນີອັນດີງາມໃຫ້ແກ່ນັກຮຽນ ຄວບຄູ່ໄປກັບການໃຫ້ຄວາມຮູ້ທາງດ້ານວິຊາການ ທັນຍຸກຂໍ້ມູນຂ່າວສານໃນໄລຍະໃໝ່, ສ້າງສະພາບແວດລ້ອມພາຍໃນໂຮງຮຽນໃຫ້ເປັນສະຖານທີ່ສີຂຽວ, ສະອາດ, ປອດໄພ ແລະ ປາສະຈາກຢາເສບຕິດຢ່າງເດັດຂາດ; ເພີ່ມທະວີການປະສານສົມທົບຢ່າງແໜ້ນແຟ້ນລະຫວ່າງ ໂຮງຮຽນ, ຄອບຄົວ ແລະ ອົງການປົກຄອງບ້ານ ເພື່ອພ້ອມກັນຕິດຕາມ, ຊຸກຍູ້ລູກຫຼານໃຫ້ມາໂຮງຮຽນ ແລະ ປົກປ້ອງເຍົາວະຊົນໃຫ້ຫ່າງໄກຈາກອະບາຍຍະມຸກຕ່າງໆ.
ຂ່າວ: ເມືອງຫຼວງນ້ຳທາ
ຄໍາເຫັນ