 |
ໂອກາດນີ້ ໄດ້ຮັບຟັງການລາຍງານສະພາບການດຳເນີນການກໍ່ສ້າງວ່າ: ໂຄງການກໍ່ສ້າງເຂື່ອນໄຟຟ້ານ້ຳຂອງຫຼວງພະບາງ ຕັ້ງຢູ່ລະຫວ່າງເມືອງຈອມເພັດ ແລະ ເມືອງປາກອູ ແຂວງຫຼວງພະບາງ ເປັນໂຄງການພັດທະນາເຂື່ອນໄຟຟ້າ ພະລັງງານນ້ຳແບບຍືນຍົງໃນເຂດແມ່ນ້ຳຂອງຕອນລຸ່ມ ເຊີ່ງໄດ້ຖອດຖອນບົດຮຽນຈາກ ການພັດທະນາເຂື່ອນໄຟຟ້ານ້ຳຂອງໄຊຍະບູລີ, ມີມູນຄ່າການກໍ່ສ້າງປະມານ 5 ຕື້ໂດລາ, ໄດ້ຜ່ານການວິເຄາະພັນປາເພື່ອອານຸລັກ, ສຳຫຼວດ-ອອກແບບໃຫ້ເໝາະສົມກັບພື້ນທີ່ ໂດຍບໍ່ສົ່ງຜົນກະທົບຕໍ່ເຂດມໍລະດົກໂລກຫຼວງພະບາງ, ຫຼີກລຽງຜົນກະທົບໜັກ ຕໍ່ສີ່ງແວດລ້ອມ ແລະ ສັງຄົມ ໂດຍສະເພາະລະດັບນ້ຳທີ່ຍື່ງຂຶ້ນ ບໍ່ເກີນ 310 ແມັດ ຈາກລະດັບໜ້ານໍ້າທະເລ ຫຼື ເທົ່າກັບລະດັບນ້ຳທີ່ເຄີຍມີປະລິມານສູງຂຶ້ນ ໃນລະດູຝົນໄລຍະຜ່ານມາ, ມີສີ່ງອຳນວຍຄວາມສະດວກໃຫ້ກັບ ການຂື້ນ-ລົງຂອງເຮືອຂົນສົ່ງສີນຄ້າ ລະດັບ 500 ໂຕນ ແລະ ເຮືອຂົນສົ່ງໂດຍສານ ໃຊ້ເວລາປະມານ 40 ນາທີ, ທັງອຳນວຍຄວາມສະດວກການຂຶ້ນ-ລົງຂອງປາ, ຮອງຮັບແຮງສັ່ນສະເທືອນ ຈາກເຫດການແຜ່ນດີນໄຫວ ໃນລະດັບທີ່ແນ່ນອນ, ໃນພື້ນທີ່ພັດທະນາມີຜົນກະທົບກວມ 22 ບ້ານ ມີປະຊາກອນປະມານ 7,000 ຄົນ, ເຊິ່ງໄດ້ມີການຍົກຍ້າຍຈັດສັນໄປຢູ່ບ່ອນໃໝ່ແລ້ວຈຳນວນໜຶ່ງ, ເຊິ່ງຜູ້ພັດທະນາໂຄງການໄດ້ເອົາໃຈໃສ່ຊຸກຍູ້ສົ່ງເສີມການພັດທະນາຊີວິດການເປັນຢູ່ຂອງປະຊາຊົນ ຕາມນະໂຍບາຍຂອງລັດຖະບານ, ຮັບປະກັນໃຫ້ຊີວິດການເປັນຢູ່ດີຂຶ້ນກວ່າເກົ່າ ພາຍຫຼັງທີ່ໄດ້ຮັບການຍົກຍ້າຍ.
 |
ສຳລັບວຽກງານການກໍ່ສ້າງ ປັດຈຸບັນກຳລັງດຳເນີນການກໍ່ສ້າງຕາມແຜນການ ສາມາດປະເມີນຄວາມຄືບໜ້າສໍາເລັດແລ້ວ 72% ໂດຍສະເພາະການກໍ່ສ້າງໂຕເຂື່ອນ ເຊິ່ງໄດ້ອວ່າຍນ້ຳໃຫ້ເຮືອສາມາດຂຶ້-ນລົງໄດ້ຕາມປົກກະຕິ ແລະ ກໍ່ສ້າງຮາກຖານຂອງໂຕເຂື່ອນ ພາຍຫຼັງສຳເລັດຈະສືບຕໍ່ປ່ຽນແລວນ້ຳ ເພື່ອດຳເນີນການກໍ່ສ້າງຮາກຖານຂອງເຂື່ອນອີກເບື້ອງ, ຄາດວ່າໂຄງການກໍ່ສ້າງຈະສຳເລັດພາຍໃນໄລຍະ 5 ປີ ຫຼື ປະມານປີ 2030 ຈະໄດ້ເລີ້ມຜະລິດໄຟຟ້າ.
ໂອກາດນີ້ ທ່ານ ພົນເອກ ວິໄລ ຫຼ້າຄຳຟອງ ໄດ້ມີຄຳເຫັນເຈາະຈີ້ມບາງບັນຫາ ເປັນຕົ້ນ ການປະຕິບັດນະໂຍບາຍຕໍ່ຜູ້ໄດ້ຮັບຜົນກະທົບ, ການລະບາຍຕະກອນຂອງເຂື່ອນ, ສະພາບການຮັກສາລະດັບນ້ຳໃນລະດູແລ້ງຢູ່ກ້ອງເຂື່ອນ, ການຈຳໜ່າຍໄຟຟ້າ ພາຍຫຼັງກໍ່ສ້າງສຳເລັດ ແລະ ການສ້າງຜົນປະໂຫຍດໃຫ້ລັດຖະບານ ກໍຄືທ້ອງຖີ່ນຈຸດທີ່ຕັ້ງຂອງການພັດທະນາເຂື່ອນໄຟຟ້າ ເຊິ່ງໄດ້ຮັບການຕອບແຕ່ລະບັນຫາຢ່າງລະອຽດ ແຕ່ລະບັນຫາຈາກຜູ້ບໍລິຫານໂຄງການ.
 |
ຈາກນັ້ນ ທ່ານ ພົນເອກ ວິໄລ ຫຼ້າຄຳຟອງ ພ້ອມຄະນະ ໄດ້ທ່ຽວຊົມເຂດພັດທະນາໂຕເຂື່ອນ, ທັງທ່ຽວຊົມສູນພັດທະນາສີມືແຮງງານຂອງໂຄງການ ຕື່ມອີກ.
ຂ່າວ: ອາພຸດເດດ ບຸບຜາ
ຄໍາເຫັນ