ຜູ້ແທນໜັງສືພິມປະຊາຊົນຢ້ຽມຢາມສຳນັກຂ່າວສານ ແລະ ວິທະຍຸກະຈາຍສຽງຫວຽດນາມ

ໃນຕອນເຊົ້າທີ 24 ກັນຍາ ນີ້ ໂດຍແມ່ນ ສະຫາຍນາງ ຫວູ ຫວຽດຈາງ ອຳນວຍການໃຫຍ່ສຳນັກຂ່າວສານຫວຽດນາມ ພ້ອມຄະນະໃຫ້ການຕ້ອນຮັບ ໂອກາດດັ່ງກ່າວສະຫາຍ ນາງ ຫວູ ຫວຽດຈາງ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ຄະນະຜູ້ແທນ ໜັງສືພິມປະຊາຊົນ ທີ່ໄດ້ເດີນທາງຢ້ຽມຢາມ ສສ ຫວຽດນາມໃນຄັ້ງນີ້ ເພື່ອເປັນການສືບຕໍ່ຮັດແໜ້ນຄວາມສາມັກຄີພິເສດການພົວພັນຮ່ວມມືຮອບດ້ານລະຫວ່າງສອງພັກ, ສອງລັດກໍຄືປະຊາຊົນສອງຊາດຫວຽດນາມ ແລະ ລາວ ເວົ້າສະເພາະແມ່ນສອງໜັງສືພິມປະຊາຊົນ ສຽງຂອງສູນກາງພັກ ປປ ລາວ ແລະ ໜັງສືພິມ ເຢີນເຢີນ ສຽງຂອງສູນກາງພັກກອມມູນິດຫວຽດນາມ ທີ່ມີມູນເຊື້ອການພົວພັນຮ່ວມມືຊ່ວຍເຫຼືອກັນໃຫ້ແໜ້ນແຟ້ນຍິ່ງຂຶ້ນ,

ການຢ້ຽມຢາມສຳນັກຂ່າວສານຫວຽດນາມ ຄັ້ງນີ້ແມ່ນຢູ່ໃນໄລຍະ ຄົບຮອບ 80 ປີ ແຫ່ງການສ້າງຕັ້ງຂ່າວສານຫວຽດນາມຄື (15 ກັນຍາ 1945 - 15 ກັນຍາ 2025) ສະຫາຍນາງ ຫວູ ຫວຽດຈາງ ຍັງໄດ້ລາຍງາຍໂດຍຫຍໍ້ປະຫວັດຄວາມເປັນມາຕໍ່ຄະນະຜູ້ແທນໜັງສືພິມປະຊາຊົນ ໄດ້ຮັບຊາບວ່າ: ຕະຫຼອດ 80 ປີ ຜ່ານມາຂ່າວສານຫວຽດນາມໄດ້ມີຄວາມເຕີບໃຫຍ່ຂະຫຍາຍຕົວທັງປະລິມານ ແລະ ຄຸນນະພາບ, ໄດ້ມີການພົວພັນຮ່ວມມືກັບ 40 ອົງການຂ່າວສານ ແລະ ອົງການຂ່າວສານສາກົນໃຫຍ່ໃນທົ່ວໂລກ, ມີ 30 ຫ້ອງການຜູ້ຕ່າງໜ້າຕັ້ງຢູ່ 28 ປະເທດ, ໂດຍສະເພາະໄດ້ມີການພົວພັນຮ່ວມມືກັບສຳນັກຂ່າວສານປະເທດລາວກໍຄືສຳນັກຂ່າວສື່ຕ່າງໆຂອງລາວ ໂດຍໄດ້ຮັບການຮ່ວມມື ແລະ ສະໜັບສະໜູນດ້ວຍດີຕະຫຼອດມາ ເຮັດໃຫ້ຂ່າວສານຫວຽດນາມໄດ້ມີບົດບາດສຳຄັນໃນການໂຄສະນາເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ເຮັດໃຫ້ຂ່າວສານໄດ້ບົດບາດອິດທິພົນຢູ່ໃນເວທີພາກພື້ນແລະສາກົນ, ສະຫາຍ ວັນໄຊ ຕະວິນຍານ ຕາງໜ້າຄະນະຜູ້ແທນໜັງສືພິມປະຊາຊົນ ໄດ້ກ່າວສະແດງຄວາມຂອບໃຈຕໍ່ ສະຫາຍ ຫວູ ຫວຽດຈາງ ທີ່ໃຫ້ການຕ້ອນຢ່າງອົບອຸ່ນໃນຄັ້ງນີ້ພ້ອມທັງໄດ້ແຈ້ງໃຫ້ຊາບກ່ຽວກັບການຢ້ຽມຢາມຫວຽນາມຄັ້ງນີ້ ແມ່ນເພື່ອປະຕິບັດແຜນການຮ່ວມມືສອງຝ່າຍກໍຄືສອງໜັງສືພິມ,ໃນຕອນເຊົ້າວັນດຽວກັນ ຄະນະຜູ້ແທນໜັງສືພິມ ປະຊາຊົນ ຍັງໄດ້ສືບຕໍ່ຢ້ຽມຢາມສຳນັກງານວິທະຍຸກະຈາຍສຽງຫວຽດນາມໂດຍໃຫ້ການຕ້ອນຮັບຂອງສະຫາຍ ໂງມິງຫຽນ ຮອງອຳນວຍການໃຫຍ່ວິທະຍຸກະສຽງແຫ່ງຊາດຫວຽດນາມຕື່ມອີກ.

ຂ່າວ-ພາບ:ພູວຽງຄຳ