ປິດຊຸດຝຶກອົບຮົມບໍາລູງທິດສະດີ-ແນວທາງຂອງພັກຊຸດທີ I

ໂອກາດນີ້, ທ່ານໄມທອງ ທໍາມະວົງສາ,ຮອງລັດຖະມົນຕີກະຊວງການຕ່າງປະເທດ, ໄດ້ສະແດງຄວາມຊົມເຊີຍ ແລະ ໃຫ້ກຽດໂອ້ລົມ, ໃຫ້ທິດຊີ້ນຳຕໍ່ຜູ້ເຂົ້າຝຶກອົບຮົມ,ໃຫ້ສືບຕໍ່ເອົາໃຈໃສ່ນຳເອົາບົດຮຽນ ແລະ ຄວາມຮັບຮູ້ທີ່ໄດ້ຄົ້ນຄວ້າຮໍ່າຮຽນຈາກການເຂົ້າຮ່ວມຊຸດຝຶກອົບຮົມໃນຄັ້ງນີ້ ໄປສືບຕໍ່ຜັນຂະຫຍາຍ ແລະ ໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານຕົວຈິງ ໃຫ້ມີຄຸນນະພາບ, ມີປະສິດທີ່ຜົນສູງສຸດ ແລະ ໄດ້ຮັບຜົນສຳເລັດ.ໂດຍສະເພາະພະນັກງານຜູ້ສືບທອດທີ່ຍັງໜຸ່ມນ້ອຍທີ່ເປັນກໍາລັງແຮງໃຫ້ກັບການເຄື່ອນໄຫວວຽກງານຕ່າງປະທດ ຈະຕ້ອງໄດ້ມີຄວາມພະຍາຍາມ ແລະ ເອົາໃຈໃສ່ໃນການຄົ້ນຄວ້າບັນດາເນື້ອໃນເອກະສານອັນເປັນພື້ນຖານທີ່ສໍາຄັນທາງດ້ານທິດສະດີການເມືອງເພື່ອເຊື່ອມຊຶມເນື້ອໃນໃຫ້ເລິກເຊິ່ງກ່ຽວກັບ ທິດສະດີມາກ-ເລນິນ, ແນວຄິດ ປະທານ ໄກສອນ ພົມວິຫານ, ກຳແໜ້ນແນວທາງນະໂຍບາຍ ແລະ ການບູລະນະລະບອບປະຊາທິປະໄຕ ປະຊາຊົນ ຕາມທິດສັງຄົມນິຍົມ ກໍຄື ການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ນັບມື້ນັບຈະເລີນຮຸ່ງເຮືອງຂຶ້ນເລື້ອຍໆ.

ການຝຶກອົບຮົມທິດສະດີຊຸດທີIນີ້ ແມ່ນໄດ້ດຳເນີນໄປດ້ວຍບັນຍາກາດທີ່ຟົດຟື້ນຜ່ານການແລກປ່ຽນບົດຮຽນ,ປະສົບການວຽກງານຕົວຈິງ ແລະ ການສົນທະນາ ລະຫວ່າງຄູອາຈານ, ວິທະຍາກອນ ແລະ ຜູ້ເຂົ້າຝຶກອົບຮົມ, ເຊິ່ງໄດ້ຍົກໃຫ້ເຫັນເຖິງທິດສະດີທີ່ຕິດພັນກັບພຶດຕິກໍາໃນການເຮັດວຽກງານຕົວຈິງ ຕໍ່ກັບການຜັນຂະຫຍາຍແນວທາງນະໂຍບາຍຂອງພັກໃນແຕ່ລະໄລຍະ. ເຫັນວ່າການຝຶກອົບຮົມຄັ້ງນີ້ແມ່ນໄດ້ຮັບຜົນສໍາເລັດຕາມຈຸດປະສົງເປົ້າໝາຍທີ່ໄດ້ວາງໄວ້ຢ່າງຈົບງາມ. ຜູ້ເຂົ້າຮັບການຝຶກອົບຮົມ ແມ່ນມີຄວາມບຸກບືນຮໍ່າຮຽນຈົນຮຽນຮູ້ ແລະ ເຂົ້າໃຈເນື້ອໃນອັນເປັນພື້ນຖານ ແລະ ຄວາມໝາຍຄວາມສຳຄັນພື້ນຖານທິດສະດີ ມາກ-ເລນິນ ແລະ ບົດຮຽນຕ່າງໆ ທີ່ຕິດພັນກັບການພັດທະນາ ເສດຖະກິດສັງຄົມ. ນອກນັ້ນ ຜູ້ເຂົ້າຮ່ວມຝຶກອົບຮົມກໍໄດ້ໄປທັດສະນະສຶກສາທີ່ອະນຸສອນສະຖານ ປະທານ ໄກສອນ ພົມວິຫານເພື່ອສືບຕໍ່ຄົ້ນຄວ້າປະຫວັດພະລະກິດການປະຕິວັດຊາດປະຊາທິປະໄຕ ແລະ ແບບແຜນການດໍາລົງຊີວິດຂອງ ປະທານໄກສອນ ພົມວິຫານ ເພື່ອນໍາມາໝູນໃຊ້ເຂົ້າໃນການເຮັດວຽກ ແລະ ການດຳລົງຊີວິດຂອງຕົນ ໃຫ້ກາຍເປັນພະນັກງານທີ່ມີຄຸນນະພາບ ແລະ ເປັນແບບຢ່າງທີ່ດີໃຫ້ມະຫາຊົນຕໍ່ໄປ.