 |
ໃນພິທີ, ສະຫາຍ ສອນສະຫວັນ ມະນີວົງ ຮອງຫົວໜ້າໂຮງຮຽນການເມືອງ ແລະ ການປົກຄອງ ນວ ໄດ້ຂຶ້ນຜ່ານບົດສະຫຼຸບການຕີລາຄາສະພາບການຈັດຕັ້ງປະຕິບັດ ແຜນການຮຽນ-ການສອນທິດສະດີການເມືອງຂັ້ນຕົ້ນ ຮຸ່ນທີ XV ຊຶ່ງໄດ້ຍົກໃຫ້ເຫັນຜົນສໍາເລັດ, ບັນຫາຄົງຄ້າງ ຕະຫຼອດໃນໄລຍະການດໍາເນີນການຮຽນ-ການສອນໃນໄລຍະຜ່ານມາ. ໂດຍປະຕິບັດຕາມຫຼັກສູດທິດສະດີການເມືອງຂັ້ນຕົ້ນ ທີ່ສະຖາບັນການເມືອງ ແລະ ການປົກຄອງແຫ່ງຊາດ ວາງອອກ, ມີ 5 ກຸ່ມວິຊາ, ປະກອບມີ 11 ວິຊາ, ມີ 61 ບົດ, ເທົ່າກັບ 420 ຊົ່ວໂມງ. ພິເສດໂຮງຮຽນ ໄດ້ເພີ່ມພາກແນວທາງຂອງພັກ ແລະ ວຽກງານຈຸດສຸມ ຂອງ ນວ ເປັນພາກໜຶ່ງ ລວມມີ 12 ວິຊາ, ໃນນີ້ອາຈານຂຶ້ນຫ້ອງບັນຍາຍທັງໝົດ 79 ເທື່ອທ່ານ, ຈໍານວນ 250 ຊົ່ວໂມງ, ເທົ່າກັບ 69.28%, ສໍາມະນາ 36 ຊົ່ວໂມງ, ລາຍງານເພີ່ມ 16 ຊົ່ວໂມງ, ແກ້ຂໍ້ຂ້ອງໃຈ 48 ຊົ່ວໂມງ, ສອບເສັງຂຽນ 12 ຊົ່ວໂມງ ແລະ ສອບເສັງຮູບແບບສໍາພາດ 24 ຊົ່ວໂມງ, ທັດສະນະສຶກສາ 7 ຊົ່ວໂມງ ແລະ ຂຽນບົດ ແລະ ປ້ອງກັນບົດຈົບຂັ້ນ 27 ຊົ່ວໂມງ ລວມທັງໝົດ 420 ຊົ່ວໂມງ, ເທົ່າກັບ 100%.
 |
ຕອນທ້າຍພິທີຍັງໄດ້ຮັບຟັງການໂອ້ລົມ ຂອງ ສະຫາຍ ພູທອນ ແກ້ວດວງມະນີ, ສະຫາຍໄດ້ມີຄໍາເຫັນຕໍ່ບັນດາສະຫາຍນັກສຶກສາທີ່ສໍາເລັດໃນການຮຽນທິດສະດີການເມືອງຂັ້ນຕົ້ນຊຸດນີ້ ເພື່ອເປັນທິດໃນການນໍາເອົາບົດຮຽນໄປໝູນໃຊ້ໃນພຶດຕິກຳຕົວຈິງ ຄື: ຕ້ອງຮູ້ໝູນໃຊ້ສິ່ງທີ່ໄດ້ຮຽນຮູ້ມາຢ່າງປະດິດສ້າງ ເພື່ອນໍາໄປຈັດຕັ້ງຜັນຂະຫຍາຍເຂົ້າໃນໜ້າທີ່ວຽກງານຂອງຕົນໃຫ້ປະກົດຜົນເປັນຈິງ, ຈົ່ງນໍາເອົາຄວາມຮູ້ທີ່ໄດ້ຮຽນມາ ໄປກວດສອບຢູ່ໃນພຶດຕິກຳຕົວຈິງໃນການປະຕິບັດໜ້າທີ່ວຽກງານ ຈຶ່ງຈະຊ່ວຍໃຫ້ພວກສະຫາຍເຫັນແຈ້ງວ່າອັນໃດຖືກ, ອັນໃດສອດຄ່ອງ ເໝາະສົມ ຫຼື ບໍ່ສອດຄ່ອງ, ເດັດດ່ຽວປົກປ້ອງສິ່ງທີ່ຖືກຕ້ອງ ພ້ອມກັນນັ້ນກໍຕັດສິນໃຈດັດແປງ, ປັບປຸງ ແກ້ໄຂອັນທີ່ບໍ່ຖືກຕ້ອງຢ່າງທັນການ, ຈົ່ງສືບຕໍ່ກໍ່ສ້າງ, ພັດທະນາຕົນເອງ, ຕັ້ງໜ້າຝຶກຝົນຫຼໍ່ຫຼອມໃນຂະບວນການວຽກງານຕົວຈິງໃຫ້ຫຼາຍຂຶ້ນ, ມີຄວາມຮັບຜິດ ຊອບຕໍ່ຕົນເອງຫຼາຍກວ່າເກົ່າ, ສຸມໃສ່ວຽກງານການສ້າງຕັ້ງຕາແສງຢູ່ແຕ່ລະເມືອງ ແລະ ກະກຽມປະກາດສ້າງຕັ້ງຕາແສງ, ສະເພາະຢູ່ເມືອງໄຊທານີ ມີແຜນການສ້າງຕັ້ງຕາແສງ 5 ຕາແສງ; ບັນດາສະຫາຍທີ່ຮຽນຈົບໃນຄັ້ງນີ້ກໍອາດຈະໄດ້ເຮັດວຽກປະກອບ ສ່ວນເຂົ້າໃນການສ້າງຕັ້ງຕາແສງ ຫຼື ອາດຈະໄດ້ໄປເຮັດວຽກປະກອບສ່ວນຊ່ວຍປະຈຳຢູ່ຕາແສງ ນໍາເອົາບົດຮຽນທີ່ໄດ້ໄປໝູນໃຊ້ເຂົ້າໃນການປະຕິບັດໜ້າທີ່ວຽກງານໃຫ້ເກີດຜົນເປັນຈິງ, ທັງເປັນການປະກອບສ່ວນໃນການພັດທະນາເມືອງໄຊທານີໃຫ້ມີໂສມໜ້າໃໝ່ ແລະ ວຽກງານອື່ນໆ.
(ຂ່າວ: ແສງຈັນ)
ຄໍາເຫັນ