 |
ພິທີປິດຈັດຂຶ້ນໃນວັນທີ 24 ສິງຫາຜ່ານມາໂດຍມີທ່ານ ນາງ ເພັດດາແກ້ວ ພົນສາລາດ ຮອງປະທານສະຫະພັນແມ່ຍິງແຂວງເຊກອງ, ມີທ່ານ ນາງ ຈັນສະໝອນ ແສງຫາລາດ ຮອງຫົວໜ້າສູນຝຶກອົບຮົມແມ່ຍິງລາວ, ມີພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ບຸນຖະໜອມ ສີສຸມານ ຫົວໜ້າຂະແໜງພັດທະນາແມ່ຍິງ ແລະຝຶກອົບຮົມວິຊາຊີບ, ສະຫະພັນແມ່ຍິງແຂວງເຊກອງ ລາຍງານວ່າ: ຊຸດຝຶກອົບຮົມຄັ້ງນີ້ ໄດ້ເລີ່ມຈັດຕັ້ງປະຕິບັດມາແຕ່ວັນທີ 17, ໂດຍມີສະມາຊິກສະຫະພັນແມ່ຍິງ ເຂົ້າຮ່ວມຝຶກອົບຮົມ 15 ຄົນ; ໃນນັ້ນ, ຈາກແຂວງສາລະວັນ 2 ຄົນ, ເຊກອງ 13 ຄົນ ເຊິ່ງໄດ້ຮຽນຮູ້ພື້ນຖານກ່ຽວກັບການແນະນໍາອຸປະກອນຕ່າງໆ, ຂັ້ນຕອນ, ວິທີປະກອບຂອງຮູບແບບການຫຍິບເສື້ອ, ນໍາພາວາງແບບເສື້ອ, ຕັດແບບເສື້ອ ແລະ ຂັ້ນຕອນການຫຍິບເສື້ອແວັດໃຫ້ສໍາເລັດ, ສ້າງແບບເສື້ອຂັ້ນພື້ນຖານ, ແນະນໍາການເຮັດແຟ້ມໃສ່ເອກະສານ, ການສ້າງແບບ, ວາງແບບ, ຕັດແບບ ແລະ ຂັ້ນຕອນການຫຍິບແຟ້ມໃສ່ເອກະສານໃຫ້ສໍາເລັດ; ພ້ອມນີ້ ກໍເປີດໂອກາດແລກປ່ຽນຄໍາເຫັນ, ມີການສອບຖາມ ຄວາມເຂົ້າໃຈໃນແຕ່ລະຂັ້ນຕອນ; ທັງໝົດນັ້ນ, ມີຜົນໄດ້ຮັບຄື: ຕັດຫຍິບເສື້ອແວັດ ໄດ້ 22 ຜືນ, ເຮັດແຟ້ມເອກະສານ ໄດ້ 18 ອັນ, ນອກຈາກນັ້ນ ຄູຝຶກ ຍັງໄດ້ສອນວິທີຕັດ ແລະ ຫຍິບກະເປົ໋າໃສ່ຄອມພິມເຕີ ໄດ້ 7 ໜ່ວຍ.
 |
ໂອກາດນີ້ ທ່ານ ນາງ ເພັດດາແກ້ວ ພົນສາລາດ ໄດ້ມີຄໍາເຫັນວ່າ: ຫວັງຢ່າງຍິ່ງວ່າຜູ້ທີ່ໄດ້ຮັບການອົບຮົມທຸກຄົນ ຈະນໍາເອົາບົດຮຽນທີ່ໄດ້ຈາກການຝຶກອົບຮົມຄັ້ງນີ້ ໄປນຳໃຊ້ແລະສືບຕໍ່ພັດທະນາສີມືດ້ວຍຕົນເອງຕື່ມ ເພື່ອໃຫ້ມີຄວາມຊຳນິຊຳນານຂຶ້ນເລື້ອຍໆ ທັງນີ້ ກໍເພື່ອສ້າງໃຫ້ເປັນອາຊີບ, ສາມາດສ້າງລາຍຮັບໃຫ້ກັບຕົນເອງ ແກ້ໄຂຊີວິດຄອບຄົວໃຫ້ດີຂຶ້ນເທື່ອລະກ້າວ, ທີ່ສໍາຄັນ ຈົ່ງເອົາໃຈໃສ່ໃນການຄົ້ນຄິດອອກແບບໃໝ່ໆ ໃຫ້ໄປຕາມຍຸກສະໄໝ, ໃຫ້ຖືກຕາມຄວາມຕ້ອງການຂອງລູກຄ້າ.
ຂ່າວ: ພຸດທະສອນ
ຄໍາເຫັນ