ໃນປີ 2025 ສ ເກົາຫຼີ ມີ 23.25 ລ້ານຄົວເຮືອນ, ເພີ່ມຂຶ້ນ 0.25 ລ້ານຄົວເຮືອນ ຫຼື 1.1%, ຈາກປີກ່ອນ. ໂດຍຄົວເຮືອນທົ່ວໄປ ຊຶ່ງໝາຍເຖິງຄົວເຮືອນທີ່ປະກອບດ້ວຍສະມາຊິກໃນຄອບຄົວ ຫຼື ກຸ່ມຄົນທີ່ບໍ່ແມ່ນຄອບຄົວຂະໜາດນ້ອຍທີ່ອາໄສຢູ່ຮ່ວມກັນ, ກວມເອົາ 96.8% ຂອງຄົວເຮືອນທັງໝົດ. ໃນຂະນະທີ່ຄົວເຮືອນສະຖາບັນ ຊຶ່ງໝາຍເຖິງບຸກຄົນທີ່ບໍ່ມີສ່ວນກ່ຽວຂ້ອງທາງສາຍເລືອດທີ່ອາໄສຢູ່ຮ່ວມກັນໃນສະຖາບັນຕ່າງໆເຊັ່ນ: ສະຖານທີ່ເບິ່ງແຍງຜູ້ອາຍຸສູງ ແລະ ຄົວເຮືອນຕ່າງປະເທດຄິດເປັນ 3.2% ທີ່ເຫຼືອ.
ໂຄງສ້າງຄົວເຮືອນແບບດັ້ງເດີມປ່ຽນແປງໄປຢ່າງຕໍ່ເນື່ອງ, ໂດຍຈຳນວນຄົວເຮືອນທີ່ມີສະມາຊິກຄົນດຽວ ແລະ ຄົວເຮືອນທີ່ມີສະມາຊິກທີ່ບໍ່ກ່ຽວຂ້ອງກັນທາງສາຍເລືອດເພີ່ມຂຶ້ນຫຼາຍ. ໃນບັນດາຄົວເຮືອນທົ່ວໄປທັງໝົດ, ຄົວເຮືອນທີ່ມີສະມາຊິກຄົນດຽວມີອັດຕາສ່ວນສູງສຸດແບບບໍ່ເຄີຍມີມາກ່ອນ ເຖິງ 36.6% ໃນປີ 2025.
ຈຳນວນສະມາຊິກສະເລ່ຍຕໍ່ຄົວເຮືອນໃນປີ 2025 ຢູ່ທີ່ 2.16 ຄົນ, ຫຼຸດລົງ 0.03 ຄົນຈາກປີກ່ອນ ແລະ ຫຼຸດລົງ 0.18 ຄົນ ເມື່ອທຽບກັບຫ້າປີກ່ອນ. ໃນນັ້ນ, ຄົວເຮືອນທີ່ປະກອບດ້ວຍຍາດພີ່ນ້ອງທາງສາຍເລືອດຄິດເປັນ 60.7% ໃນປີ 2025, ຫຼຸດລົງຈາກ 61.3% ໃນປີ 2024 ແລະ ຫຼຸດລົງຈາກ 74.9% ໃນປີ 2010. ໃນຂະນະດຽວກັນ, ອັດຕາສ່ວນຂອງຄົວເຮືອນທີ່ມີສະມາຊິກທີ່ບໍ່ແມ່ນຍາດພີ່ນ້ອງທາງເລືອດ ເຊັ່ນ: ໝູ່ເພື່ອນ ຫຼື ຄູ່ຮັກທີ່ບໍ່ໄດ້ແຕ່ງງານອາໄສຢູ່ນຳກັນ, ໄດ້ເພີ່ມຂຶ້ນເປັນ 2.7% ໃນປີ 2025 ຈາກ 2.6% ໃນປີ 2024 ແລະ 1.2% ໃນປີ 2010.
ບົດລາຍງານຊີ້ໃຫ້ເຫັນວ່າ: ປະຊາກອນທັງໝົດຂອງ ສ ເກົາຫຼີ ໃນປີ 2025 ມີຈຳນວນ 51.82 ລ້ານຄົນ, ເພີ່ມຂຶ້ນ 0.02% ຈາກປີກ່ອນ, ໂດຍໄດ້ຮັບການສະໜັບສະໜູນຈາກຈຳນວນຄົນຕ່າງປະ ເທດທີ່ເພີ່ມຂຶ້ນ ຊຶ່ງຊ່ວຍຊົດເຊີຍການຫຼຸດລົງຂອງປະຊາກອນ ສ ເກົາຫຼີ.
ຈຳນວນພົນລະເມືອງ ສ ເກົາຫຼີ ຫຼຸດລົງ 0.1% ມາເປັນ 49.71 ລ້ານຄົນ ຊຶ່ງຄິດເປັນ 95.9%ຂອງປະຊາກອນທັງໝົດ. ໃນຂະນະດຽວກັນ, ຈຳນວນຄົນຕ່າງປະເທດທີ່ອາໄສຢູ່ໃນ ສ ເກົາຫຼີ ເພີ່ມຂຶ້ນ 3.2% ເປັນ 2.11 ລ້ານຄົນ.
ປະຊາກອນໃນໄວເຮັດວຽກ (ອາຍຸ 15-64 ປີ) ຫຼຸດລົງຈາກ 36.26 ລ້ານຄົນໃນປີ 2024 ເປັນ 35.87 ລ້ານຄົນໃນປີ 2025. ໃນຂະນະທີ່ປະຊາກອນເດັກນ້ອຍ (ອາຍຸ 0-14 ປີ) ຫຼຸດລົງຈາກ 5.42 ລ້ານຄົນເປັນ 5.22 ລ້ານຄົນ. ປະຊາກອນຜູ້ອາຍຸສູງ (ອາຍຸ 65 ປີຂຶ້ນໄປ) ເພີ່ມຂຶ້ນຈາກ 10.12 ລ້ານຄົນເປັນ 10.72 ລ້ານຄົນໃນປີດຽວກັນ. ປະຊາກອນຜູ້ອາຍຸສູງ ຄິດເປັນ 20.7% ຂອງປະຊາກອນທັງໝົດ ຊຶ່ງຊຸກຍູ້ໃຫ້ ສ ເກົາຫຼີ ກ້າວໄປສູ່ສັງຄົມຜູ້ອາຍຸສູງຫຼາຍຂຶ້ນ.
ຄໍາເຫັນ