ສະຫະພັນກຳມະບານ ຄຕພ ເປີດກອງປະຊຸມສະຫຼຸບກາງສະໄໝ

ເມື່ອບໍ່ດົນມານີ້, ສະຫະພັນກຳມະບານ ຄະນະພົວພັນຕ່າງປະເທດສູນກາງພັກ (ຄຕພ) ຈັດກອງປະຊຸມສະຫຼຸບກາງສະໄໝ ໂດຍການເປັນປະທານຂອງ ສະຫາຍ ວາລະໄຊ ເລັ່ງສະຫວັດ ກຳມະການພັກ ຮອງຫົວໜ້າຄະນະພົວພັນຕ່າງປະເທດສູນກາງພັກ ຜູ້ຊີ້ນຳວຽກງານອົງການຈັດຕັ້ງມະຫາຊົນຂອງ ຄຕພ, ມີບັນດາສະຫາຍ ຄະນະບໍລິຫານສະຫະພັນກຳມະບານ, ບັນດາສະຫາຍຕາງໜ້າໜ່ວຍພັກອ້ອມຂ້າງອົງຄະນະພັກ, ສະຫະພັນແມ່ຍິງ ແລະ ອົງການຈັດຕັ້ງຊາວໜຸ່ມ ປປ ລາວ ຕະຫຼອດຮອດສະມາຊິກກຳມະບານທົ່ວ ຄຕພ ເຂົ້າຮ່ວມ.
ໃນກອງປະຊຸມ ສະຫາຍ ຫົງແກ້ວ ສຸກສະຫວັດ ຮອງປະທານຄະນະບໍລິຫານງານສະຫະພັນກຳມະບານ ຄຕພ ໄດ້ຜ່ານບົດລາຍງານການເມືອງ ແລະ ທິດທາງແຜນການທ້າຍສະໄໝ 2023-2025 ໂດຍຍົກໃຫ້ເຫັນຜົນສຳເລັດໃນການຈັດຕັ້ງປະຕິບັດ ເນື້ອໃນຂໍ້ແຂ່ງຂັນ 5 ເປັນເຈົ້າ ຕະຫຼອດໄລຍະ 2 ປີເຄິ່ງຜ່ານມາ ຊຶ່ງໄດ້ຮັບໃບຢັ້ງຢືນ 5 ເປັນເຈົ້າສອງປີຕິດຕໍ່ກັນ ຈາກປະທານສູນກາງສະຫະພັນກຳມະບານລາວ. ຈາກນັ້ນ, ສະຫາຍ ເກີລໍ່ ຢ່າງກໍ ກຳມະການຄະນະບໍລິຫານງານສູນກາງກຳມະບານລາວ ປະທານສະຫະພັນກຳມະບານ ຄຕພ ໄດ້ຜ່ານບົດສຳຫຼວດການນຳພາລວມ ຂອງຄະນະບໍລິງານຫານສະຫະພັນກຳມະບານ ຄຕພ ກາງສະໄໝ ໂດຍຍົກໃຫ້ເຫັນດ້ານດີທີ່ຕ້ອງສືບຕໍ່ນຳພາ ແລະ ດ້ານຄົງຄ້າງ ທີ່ຈະຕ້ອງແກ້ໄຂໃຫ້ມີການຫັນປ່ຽນຢ່າງແຂງແຮງໃນທ້າຍສະໄໝ.
ໃນຕອນທ້າຍ, ສະຫາຍ ວາລະໄຊ ເລັ່ງສະຫວັດ ໄດ້ໃຫ້ທິດຊີ້ນຳ ແລະ ໂອ້ລົມໂດຍໄດ້ເນັ້ນໜັກໃຫ້ຄະນະບໍລິຫານງານກຳມະບານ ຄຕພ ເອົາໃຈໃສ່ນຳພາ-ຊີ້ນຳ ການຈັດຕັ້ງປະຕິບັດວຽກງານກຳມະ ບານໃນທ້າຍສະໄໝ ໃຫ້ບັນລຸຜົນຕາມແຜນການທີ່ວາງອອກ, ທັງເປັນເສນາທິການໃຫ້ຄະນະພັກ ຄຕພ ໃນການສຶກສາອົບຮົມການເມືອງ-ແນວຄິດ ໃຫ້ແກ່ຖັນແຖວພະນັກງານ-ລັດຖະກອນ ຂອງ ຄຕພ ໃຫ້ມີຄວາມໜັກແໜ້ນທາງດ້ານການເມືອງ ເພື່ອຮັບປະກັນການປະຕິບັດໜ້າທີ່ການເມືອງຂອງ ຄຕພ ໃຫ້ມີໃບໜ້າໃໝ່ກ້າວຂຶ້ນເລື້ອຍໆ.                              
ຂ່າວ-ພາບ: ຄຕພ