 |
ພິທີພົບປະຄັ້ງນີ້ ເພື່ອທົບທວນຄືນໝາກຜົນຂອງການຮ່ວມມືໃນໄລຍະຜ່ານມາ ຕາມບົດບັນທຶກຮ່ວມກັນ ໃນຄັ້ງວັນທີ 27 ກັນຍາ 2022 ຢູ່ທີ່ນະຄອນເຫວ້ ເປັນຕົ້ນ: ສຶກສາອົບຮົມຄວາມສໍາຄັນກ່ຽວກັບສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດ ລາວ - ຫວຽດນາມ ແນໃສ່ ເພື່ອຍົກສູງຄວາມ ຮັບຜິດຊອບໃນການປົກປັກຮັກສາ, ເພີ່ມພູນຄູນສ້າງ ແລະ ພັດທະນາສາຍພົວພັນແບບພິເສດ ລະຫວ່າງ ສອງປະເທດ ກໍຄືສອງການຈັດ ຕັ້ງຂອງພວກເຮົາໃຫ້ນັບມື້ນັບຂະຫຍາຍ ຕົວຍິ່ງໆຂຶ້ນ; ພ້ອມກັນນັ້ນ, ກໍໄດ້ໂຄສະນາ, ເຜີຍແຜ່, ເຊື່ອມຊຶມວັນເກີດ ຂອງປະທານ ໂຮ່ຈິມິນ ຄົບຮອບ 136 ປີ, ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 64 ປີ, ວັນເຊັນສົນທິສັນຍາ ມິດ ຕະພາບ ລາວ-ຫວຽດ ນາມ ຄົບຮອບ 49 ແລະ ວັນສະຖາປານາສາທາລະນະລັດ ສັງ ຄົມນິຍົມ ຫວຽດນາມ ຄົບຮອບ 81 ປີ; ໄດ້ຊຸກຍູ້ສະຫະພັນກຳມະບານເມືອງສະໝ້ວຍ ສ ປ ປ ລາວ ທີ່ມີຊາຍແດນຕິດຈອດກັບ ສະຫະພັນແຮງງານຕາແສງ ອາເລື້ອຍ ສສ ຫວຽດນາມ ໃຫ້ມີການພົວພັນຮ່ວມມື ແລະ ແລກປ່ຽນ ບົດຮຽນເຊິ່ງກັນ ແລະ ກັນ. ນອກຈາກນິີ້ ຍັງໄດ້ຮັບການສະໜັບສະໜູນຊ່ວຍເຫຼືອດ້ານອຸປະກອນເຄື່ອງຮັບໃຊ້ຫ້ອງການ ຈາກນະຄອນເຫວ້ ສສ ຫວຽດນາມ ເຊັ່ນ: ຄອມພີວເຕີໂນດບຸກ (ຍີ່ຫໍ້ DELL) ລວມມູນຄ່າ 20 ລ້ານກວ່າກີບ.
ການພົບປະແລກປ່ຽນບົດຮຽນຄັ້ງນີ້ ນັບເປັນອີກກ້າວສຳຄັນໃນການສືບຕໍ່ເສີມສ້າງ ແລະ ພັດທະນາສາຍພົວພັນຮ່ວມມືລະຫວ່າງອົງການກຳມະບານ ແຂວງສາລະວັນ ກັບ ສະຫະພັນແຮງງານ ນະຄອນເຫວ້ ໃຫ້ນັບມື້ແໜ້ນແຟ້ນ ແລະ ມີປະສິດທິຜົນຍິ່ງຂຶ້ນ. ທັງສອງຝ່າຍຈະສືບຕໍ່ຮ່ວມມື, ແລກປ່ຽນບົດຮຽນ ແລະ ສົ່ງເສີມການເບີ່ງແຍງປົກປ້ອງສິດ ແລະ ຜົນປະໂຫຍດຂອງກຳມະກອນ, ລັດຖະກອນ ແລະ ຜູ້ອອກແຮງງານ ພ້ອມທັງຮ່ວມກັນທະນຸຖະໜອມ ແລະ ເສີມຂະຫຍາຍມິດຕະພາບ, ຄວາມສາມັກຄີພິເສດ ລາວ–ຫວຽດນາມ ໃຫ້ຍືນຍົງຕໍ່ໄປ. ພາບ-ຂ່າວ: ສ.ພະຈັນ
ຄໍາເຫັນ