ພາຍໄຕ້ການເປັນປະທານຂອງ ສະຫາຍ ນາງ ວາດສະໜາ ໂພໄຊຍະວົງ ປະທານກໍາມະການພັກແຂວງ ປະທານສະຫາພັນແມ່ຍິງແຂວງ,ສະຫາຍ ນາງ ວຽງໄຊ ແກ້ວວົງວິໄລວົງ ກໍາມະການພັກເມືອງ ປະທານສະຫະພັນແມ່ຍິງເມືອງ, ໃຫ້ກຽດຮ່ວມມີສະຫາຍ ວຽງວິໄລຄໍາ ອຸດຕາສັກ ວ່າການເຈົ້າເມືອງໆເລົ່າງາມ, ມີແຂກຖືກເຊີນ ແລະ ຜູ້ແທນສົມບູນເຂົ້າຮ່ວມ.
ສະຫາຍ ໃບສະຫວັນ ທອງແກ້ວມະນີ ຮອງປະທານສະຫະພັນແມ່ຍິງເມືອງ ໄດ້ຍົກໃຫ້ເຫັນຜົນງານທີ່ພົ້ນເດັ່ນໃນໄລຍະຜ່ານມາ ແລະ ຈຸດອ່ອນຂໍ້ຄົງຄ້າງ ທີ່ຈະຕ້ອງໄດ້ປັບປຸງແກ້ໄຂໃນຕໍ່ໜ້າ; ຮັບຟັງການຜ່ານບົດສະຫຼູບການຈັດຕັ້ງປະຕິບັດແຜນພັດທະນາແມ່ຍິງເມືອງໄລຍະ 5 ປີຜ່ານມາ (2019-2024) ແລະ ແຜນ 5 ປີຕໍ່ໜ້າ (2025-2029) ການປະກອບຄໍາເຫັນກ່ຽວກັບການສ້າງລາຍຮັບເຂົ້າໃນຄອບຄົວເພື່ອຫຼຸດພົ້ນຈາກຄວາມທຸກຍາກ ພ້ອມນີ້ກໍໄດ້ມອບໃບຍ້ອງຍໍໃຫ້ບຸກຄົນ, ກົມກອງທີ່ມີຜົນງານດີເດັ່ນໃນການຈັດຕັ້ງປະຕິບັດວຽກງານໃນໄລຍະຜ່ານມາ. ຈາກນັ້ນ, ປະທານສະຫະພັນແມ່ຍິງເມືອງ ພ້ອມດ້ວຍຄະນະໄດ້ຜ່ານບົດສໍາຫຼວດການນໍາພາ ແລະ ກ່າວລາໜ້າທີ່. ພ້ອມກັນນັ້ນ, ຜູ້ແທນສົມບູນໄດ້ປ່ອນບັດຄັດເລືອກເອົາຄະນະສະຫະພັນແມ່ຍິງເມືອງ ຊຸດໃໝ່ ຈຳນວນ 23 ສະຫາຍ, ກອງປະຊຸມປະຖົມມະລຶກໄດ້ເລືອກເອົາ ສະຫາຍ ນາງ ວຽງໄຊ ແກ້ວວົງວິໄລວົງ ເປັນປະທານ, ສະຫາຍ ນາງ ໃບສະຫວັນ ທອງແກ້ວມະນີ ເປັນຮອງປະທານ ທັງເປັນປະທານກວດກາ, ສະຫາຍ ນາງ ຕ່ອງອ່ອນ ເປັນຄະນະແມ່ຍິງເມືອງຊຸດໃໝ່.
(ຂ່າວ-ພາບ: ວົງດາລາ ຈັນທະວົງ)
ຄໍາເຫັນ