 |
ໃນການລົງເຄື່ອນໄຫວຢ້ຽມຢາມ ແລະ ເຮັດວຽກຄັ້ງນີ້ ໄດ້ຮັບຟັງການລາຍງານສະພາບລວມຂອງເມືອງໃນການຈັດຕັ້ງປະຕິບັດວຽກງານ 6 ເດືອນຕົ້ນປີໂດຍຫຍໍ້ຈາກສະຫາຍ ສອນສະໜຸກ ສີສຸລາດ ກຳມະການພັກແຂວງ ເລຂາພັກເມືອງຂວາ ຊຶ່ງສະຫາຍໃຫ້ຮູ້ວ່າການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2026 ແມ່ນການຈັດຕັ້ງຜັນຂະຫຍາຍແຜນການ 5 ປີ ຄັ້ງທີ IV (2025-2029) ຂອງເມືອງ ຊຶ່ງໄດ້ກໍານົດຮູບແບບການພັດທະນາຂອງເມືອງຕາມຮູບແບບ 1-1:8:4, ມີ 6 ເປົ້າໝາຍ, ມີ 10 ແຜນງານ 48 ໂຄງການ, ເສດຖະກິດຂອງເມືອງຂະຫຍາຍຕົວ 6%, ລວມຍອດມູນຄ່າຜົນຜະລິດ ບັນລຸ 274.60 ຕື້ກີບ, ສະເລ່ຍຕໍ່ຫົວຄົນບັນລຸ 702 ໂດລາ; ສາມາດຂຸດຄົ້ນລາຍຮັບເຂົ້າງົບປະມານທ້ອງຖິ່ນໄດ້ທັງໝົດ 1,395.70 ລ້ານກີບ ເທົ່າກັບ 38.72% ຂອງແຜນການປີ, ລະດົມເງິນຝາກຂອງບັນດາທະນາຄານສາຂາຕ່າງໆ ໄດ້ທັງໝົດ 371.05 ຕື້ກີບ, ກວມ 120.10% ປ່ອຍສິນເຊື່ອໄດ້ທັງໝົດ 21.71 ຕື້ກີບ ກວມ 4.20 % ຂອງແຜນການປີ, ໄດ້ຮັບທຶນຊ່ວຍເຫຼືອທາງການເພື່ອການພັດທະນາ ທັງໝົດ 23 ໂຄງການ, ມູນຄ່າທັງໝົດ 450.21 ຕື້ກີບ; ການລົງທຶນຂອງເອກະຊົນພາຍໃນ ແລະ ຕ່າງປະເທດລວມທັງໝົດ 8 ໂຄງການ, ມີທຶນຈົດທະບຽນທັງໝົດ 86.45 ຕື້ກີບ, ໃນນີ້ໂຄງການລົງທຶນຂອງເອກະຊົນພາຍໃນ ມີ 2 ໂຄງການ, ມີທຶນຈົດທະບຽນທັງໝົດ 25.78 ຕື້ກີບ ແລະໂຄງການລົງທຶນຂອງເອກະຊົນຕ່າງປະເທດ ມີ 6 ໂຄງການ, ມີທຶນຈົດທະບຽນທັງໝົດ 60.67 ຕື້ກີບ, ໄດ້ນໍາທຶນເຂົ້າມາຈັດຕັ້ງປະຕິບັດ ມີທັງໝົດ 8 ໂຄງການ, ເປັນມູນຄ່າທັງໝົດ 42.72 ຕື້ກີບ.
 |
ພາຍຫຼັງໄດ້ຮັບຟັງການລາຍງານ ສະຫາຍ ວັນໄຊ ພອງສະຫວັນ ກໍໄດ້ສະແດງຄວາມຍ້ອງຍໍຊົມເຊີຍຕໍ່ການນຳພາ-ຊີ້ນຳຂອງຄະນະພັກ-ຄະນະນຳຂອງເມືອງທີ່ໄດ້ມີຜົນສຳເລັດຫຼາຍດ້ານພ້ອມທັງມີຄຳເຫັນໂອ້ລົມຕໍ່ຄະນະພັກ, ຄະນະນໍາ ພ້ອມດ້ວຍພະນັກງານຫຼັກແຫຼ່ງຂອງເມືອງ,ສະຫາຍໄດ້ເນັ້ນໃຫ້ຄະນະພັກ ຄະນະນໍາຂອງເມືອງເອົາໃຈໃສ່ໃນການແກ້ໄຂຄວາມທຸກຍາກຂອງປະຊາຊົນ, ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່, ແຜນພັດທະນາເສດຖະກິດ-ສັງຄົມຂອງເມືອງຕິດພັນກັບຄາດໝາຍສູ້ຊົນຂອງແຂວງຂອງເມືອງ, ເພີ່ມທະວີໃນການສ້າງການຫັນປ່ຽນເພື່ອເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນກວ່າເກົ່າ; ຫັນເອົາຄາດໝາຍສູ້ຊົນມາເປັນແຜນການແຜນງານອັນລະອຽດ ເພື່ອເປັນບ່ອນອີງໃນການຈັດຕັ້ງຕົວຈິງ, ສືບຕໍ່ເອົາໃຈໃສ່ໃນການພັດທະນາເສດຖະກິດ, ສົ່ງເສີມເສດຖະກິດພູມປັນຍາຂອງປະຊາຊົນ, ສົ່ງເສີມໃຫ້ປະປະຊາຊົນມີວຽກເຮັດງານທຳເພື່ອສ້າງລາຍຮັບ ເປັນຕົ້ນແມ່ນການປູກ, ການລ້ຽງ, ດຶງດູດການລົງທຶນຂອງພາຍໃນ, ຕ່າງປະເທດ, ສ້າງຖານລາຍຮັບໃໝ່ດ້ວຍການສົ່ງເສີມການລົງທຶນ, ເອົາໃຈໃສ່ຊຸກຍູ້ສົ່ງເສີມໃຫ້ລູກຫຼານໄດ້ຮັບການສຶກສາ ເພາະການສຶກສາກໍເປັນໜຶ່ງໃນເງື່ອນໄຂແກ້ໄຂຄວາມທຸກຍາກ; ຊຸກຍູ້ສົ່ງເສີມແຮງງານດິບໃຫ້ກາຍເປັນແຮງງານທີ່ມີຄວາມຮູ້ຄວາມສາມາດ; ການກໍ່ສ້າງພັກ-ພະນັກງານກໍຕ້ອງໄດ້ເອົາໃຈໃສ່ສ້າງພະນັກງານໃຫ້ມີຄຸນສົມບັດສິນທຳປະຕິວັດ, ມີຄວາມຮັບຜິດຊອບຕໍ່ໜ້າທີ່ການເມືອງ, ສັບຊ້ອນໜ້າທີ່ວຽກງານໃຫ້ສອດຄ່ອງຕາມຄວາມຮູ້ຄວາມສາມາດ, ສຳລັບວຽກງານກວດກາ ຄະນະພັກ, ຄະນະນໍາ ຕ້ອງເຂົ້າໃຈຢ່າງເລິກເຊິ່ງຕໍ່ວຽກງານກວດກາ, ເພາະວຽກງານກວດກາແມ່ນໜຶ່ງໃນວຽກງານການນຳພາຂອງພັກເປັນກົນໄກການບໍລິຫານໜຶ່ງຂອງການນຳພາຄຸ້ມຄອງບໍລະຫານລັດ, ແຜນການກວດກາຕ້ອງເປັນແຜນຂອງຄະນະປະຈຳພັກເມືອງບໍ່ແມ່ນຂອງຄະນະກວດກາ, ຄະນະກວດກາແມ່ນເຮັດໜ້າທີ່ຕິດຕາມ, ກວດກາຕາມແຜນຂອງຄະນະປະຈຳພັກເມືອງ ເພື່ອຊອກໃຫ້ເຫັນດ້ານດີ, ດ້ານຄົງຄ້າງ.
 |
ໂອກາດດຽວກັນນີ້, ສະຫາຍ ວັນໄຊ ພອງສະຫວັນ ກໍໄດ້ມອບເງິນຈຳນວນ 50,000,000 ກີບ, ຄອມພິວເຕີ ແລະ ປິ່ນເຕີ ຈຳນວນ 6 ຊຸດ ພ້ອມນີ້ ກຸ່ມນັກທຸລະກິດໜຸ່ມກໍໄດ້ປະກອບສ່ວນມອບເງິນ ຈຳນວນ 100,000,000 ກີບ ໃຫ້ເມືອງ ເພື່ອນໍາໄປໝູນໃຊ້ໃນວຽກງານຕ່າງໆຂອງເມືອງ ແລະ ໃນໂອກາດດັ່ງກ່າວ, ກໍໄດ້ໄປຢ້ຽມຊົມເທດສະບານເມືອງ, ຂົວອູ່ ແລະ ຫ້ອງການຕາແສງຈອມຕານ ອີກດ້ວຍ.
(ຂ່າວ: ຕູ່ນ່າ)
ຄໍາເຫັນ