ທ່ານ ທອງສະຫວັນ ພົມວິຫານລັດຖະມົນຕີກະຊວງການຕ່າງປະເທດ, ທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ພ້ອມດ້ວຍ ບັນດາທ່ານແຂກທີ່ມີກຽດ ໄທ ແລະ ລາວ.
ກອງປະຊຸມຄັ້ງນີ້, ຈັດຂຶ້ນເພື່ອເປັນການສະເຫຼີມສະຫຼອງ ຄົບຮອບ 25 ປີ ຂອງການຮ່ວມມືລາວ-ໄທ ດ້ານການພັດທະນາຂີດຄວາມສາມາດຂອງບຸກຄະລາກອນທາງການແພດ ແລະ ສາທາລະນະສຸກ ຕາມພະຣາຊະດຳຣິ ສົມເດັດພະກະນິດຖາທິຣາດເຈົ້າ ກົມສົມເດັດພະເທບຣັດຣາຊະສຸດາ ສະຫຍາມບໍຣົມຣາຊະກຸມາຣີ ແຫ່ງຣາຊະອານາຈັກໄທ; ການຮ່ວມມືດັ່ງກ່າວ ໄດ້ຈັດຕັ້ງປະຕິບັດມາຕັ້ງແຕ່ປີ 2000 ຊຶ່ງປີນີ້ ກ້າວເຂົ້າສູ່ປີທີ 26 ແລະ ຍັງຈະສືບຕໍ່ໄປເລື້ອຍໆ, ປີນີ້ ເປັນປີມະຫາມຸງຄຸນ ທີ່ ສົມເດັດພະກະນິດຖາທິຣາດເຈົ້າ ກົມສົມເດັດພະເທບຣັດຣາຊະສຸດາ ສະຫຍາມບໍຣົມຣາຊະກຸມາຣີ ຊົງຈະເລີນພະຊົນມະຍຸຄົບ 70; ດັ່ງນັ້ນ, ໂຄງການສ່ວນພະອົງສົມເດັດພະກະນິດຖາທິຣາດເຈົ້າ ກົມສົມເດັດພະເທບຣັດຣາຊະສຸດາ ສະຫຍາມບໍຣົມຣາຊະກຸມາຣີ, ມະຫາວິທະຍາໄລ ມະຫິດົນ, ກົມຄວາມຮ່ວມມືລະຫວ່າງປະເທດ, ສະຖານເອກອັກຄະຣາຊະທູດໄທ ປະຈໍາ ສປປ ລາວ ແລະ ກະຊວງສາທາລະນະສຸກ ແຫ່ງ ສປປ ລາວ ຈຶ່ງໄດ້ຈັດກອງປະຊຸມດັ່ງກ່າວນີ້.
ທ່ານບຸນແຝງ ພູມມະໄລສິດ,ໃນນາມຄະນະຈັດຕັ້ງກອງປະຊຸມໄດ້ກ່າວສະແດງຄວາມຮູ້ບຸນຄຸນ ມາຍັງ ສົມເດັດພະກະນິດຖາທິຣາດເຈົ້າ ກົມສົມເດັດພະເທບຣັດຣາຊະສຸດາ ສະຫຍາມບໍຣົມຣາຊະກຸມາຣີທີ່ສະເດັດມາເປັນປະທານໃນພິທີເປີດ ແລະ ເຂົ້າຮ່ວມກອງປະຊຸມວິຊາການດ້ານການແພດ ແລະ ສາທາລະນະສຸກ. ພ້ອມນີ້, ກໍກ່າວວ່າ: ໃນປີນີ້ ເປັນປີຄົບຮອບ 25 ປີ ແຫ່ງການພົວພັນຮ່ວມມືດັ່ງກ່າວ ເຫັນໄດ້ວ່າສົມເດັດພະກະນິດຖາທິຣາດເຈົ້າ ກົມສົມເດັດພະເທບຣັດຣາຊະສຸດາ ສະຫຍາມບໍຣົມຣາຊະກຸມາຣີໄດ້ໃຫ້ຄວາມສໍາຄັນ, ເອົາໃຈໃສ່ຊຸກຍູ້ສົ່ງເສີມ ແລະ ຕິດຕາມມາຢ່າງຕໍ່ເນື່ອງໃນທຸກໆປີ; ເຖິງວ່າໃນໄລຍະຜ່ານມາ,ຈະມີການແຜ່ລະບາດຂອງພະຍາດ ໂຄວິດ-19, ແຕ່ ສົມເດັດພະກະນິດຖາທິຣາດເຈົ້າ ກົມສົມເດັດພະເທບຣັດຣາຊະສຸດາ ສະຫຍາມບໍຣົມຣາຊະກຸມາຣີກໍຍັງໃຫ້ຄວາມຫ່ວງໃຍ ແລະ ບໍ່ຢຸດທີ່ຈະຊ່ວຍພັດທະນາບຸກຄະລາກອນດ້ານການແພດຂອງລາວ ໃຫ້ໄດ້ຮັບການພັດທະນາສູງຍິ່ງໆຂຶ້ນ. ສປປ ລາວ ໄດ້ມີບຸກຄະລາກອນດ້ານສາທາລະນະສຸກກວມທົ່ວທຸກແຂວງ ທີ່ເຄີຍໄດ້ຜ່ານການຝຶກອົບຮົມພາຍໃຕ້ໂຄງການ ພະຣາຊະດຳຣິ ຂອງ ສົມເດັດພະກະນິດຖາທິຣາດເຈົ້າ ກົມສົມເດັດພະເທບຣັດຣາຊະສຸດາ ສະຫຍາມບໍຣົມຣາຊະກຸມາຣີລວມມີທັງໝົດ1,171 ທ່ານ, ປັດຈຸບັນແມ່ນຮຸ່ນທີ 27; ສິ່ງທັງໝົດເຫຼົ່ານີ້ນັບເປັນຄວາມພາກພູມໃຈຂອງປະຊາຊົນລາວ ທັງເປັນການສະແດງໃຫ້ເຫັນເຖິງຄວາມເອື້ອເຟື້ອເຜື່ອແຜ່ ຂອງ ສົມເດັດພະກະນິດຖາທິຣາດເຈົ້າ ກົມສົມເດັດພະເທບຣັດຣາຊະສຸດາ ສະຫຍາມບໍຣົມຣາຊະກຸມາຣີໃນການຊ່ວຍຊຸກຍູ້ສົ່ງເສີມຕໍ່ການຮັກສາ ແລະ ເບິ່ງແຍງສຸຂະພາບຂອງປະຊາຊົນລາວ ໃຫ້ໄດ້ຮັບການດູແລຢ່າງທົ່ວເຖິງເພື່ອການສ້າງສຸຂະພາບທີ່ດີໃນອະນາຄົດ.
ກອງປະຊຸມຄັ້ງນີ້, ປະກອບມີ: ເວທີສົນທະນາພິເສດ, ມີການບັນຍາຍ, ການສົນທະນາແບບໂຕະມົນ, ການນໍາສະເໜີຜົນງານວິຊາການຂອງຜູ້ທີ່ຜ່ານການຝຶກອົບຮົມພາຍໃຕ້ໂຄງການຮ່ວມມືດັ່ງກ່າວແລະການວາງສະແດງຜົນງານດ້ານວິຊາການ, ມີຜູ້ເຂົ້າຮ່ວມທັງໝົດ 350 ທ່ານ ລວມເອົາສິດເກົ່າຈາກນະຄອນຫຼວງວຽງຈັນ ແລະ 17 ແຂວງຂອງລາວ ຊຶ່ງປະກອບມີ ວິຊາການ ແລະ ຊ່ຽວຊານທາງດ້ານການວິໄຈ ທີ່ມາຈາກກະຊວງສາທາລະນະສຸກ ແລະ ມະຫາວິທະຍາໄລວິທະຍາສາດສຸຂະພາບ ຂອງ ສປປ ລາວ, ຄະນະຜູ້ບໍລິຫານອາຈານ ຈາກມະຫາວິທະຍາໄລມະຫິດົນ ແລະ ສະຖາບັນ ພະບໍຣົມຣາດຊະນົກ.
ນອກນີ້, ກອງປະຊຸມຄັ້ງນີ້ຈະເປັນເວທີທີ່ສະແດງໃຫ້ເຫັນເຖິງການຮ່ວມມືຢ່າງໃກ້ຊິດສະໜິດແໜ້ນ ແລະ ຈະເປັນເວທີທີ່ບັນດາສິດເກົ່າຈະໄດ້ນໍາສະເໜີຜົນງານດ້ານວິຊາການ ເພື່ອແລກປ່ຽນບັນດາປະສົບການຕ່າງໆທີ່ໄດ້ຮໍ່າຮຽນເພື່ອມາຖ່າຍທອດໃຫ້ບັນດາທ່ານໄດ້ເຫັນເຖິງຄວາມສໍາຄັນຂອງການພັດທະນາຕົນເອງທາງ ດ້ານການເບິ່ງແຍງສຸຂະພາບ ທີ່ມີຄວາມສໍາຄັນ ແລະ ຍືນຍົງ.
(ຂ່າວ-ພາບ: ແສງຈັນ)
ຄໍາເຫັນ