 |
ການສະເຫຼີມສະຫຼອງຄັ້ງນີ້ ຈັດຂຶ້ນພາຍໃຕ້ຫົວຂໍ້ “People-Partnership-Progress” ຊຶ່ງສະ ທ້ອນໃຫ້ເຫັນເຖິງການປະຕິບັດງານຂອງສະຖາບັນແມ່ນໍ້າຂອງ ໃນການພັດທະນາຊັບພະຍາກອນມະນຸດ, ສົ່ງເສີມການຮ່ວມມື ແລະ ເສີມຂະຫຍາຍຄວາມກ້າວໜ້າຢູ່ອະນຸພາກພື້ນແມ່ນ້ຳຂອງ.
 |
ໃນໂອກາດດັ່ງກ່າວ, ທ່ານ ສົມບູນ ສີຫານາດ ໄດ້ຂຶ້ນກ່າວຄໍາເຫັນ ເພື່ອສະແດງຄວາມຊົມເຊີຍ ຕໍ່ສະຖາບັນແມ່ນ້ຳຂອງ ທີ່ໄດ້ປະກອບສ່ວນສໍາຄັນເຂົ້າໃນການພັດທະນາ ແລະ ການຮ່ວມມືໃນອະນຸພາກພື້ນແມ່ນໍ້າຂອງ ຕະຫຼອດໄລຍະ 30 ປີ ຜ່ານມາ ແລະ ຍັງໄດ້ສະແດງຄວາມຂອບໃຈຕໍ່ບັນດາຜູ້ກໍ່ຕັ້ງ, ຜູ້ອໍານວຍການສະຖາບັນແມ່ນໍ້າຂອງໃນແຕ່ລະໄລຍະ, ຕະຫຼອດຮອດບັນດາພະນັກງານຂອງສະຖາບັນແມ່ນໍ້າຂອງທີ່ໄດ້ເອົາໃຈໃສ່ຢ່າງຕັ້ງໜ້າໃນການປະຕິບັດໜ້າທີ່ຂອງຕົນດ້ວຍຄວາມເສຍສະຫຼະ, ມີຫົວຄິດປະດິດສ້າງ ແລະ ມີຄວາມຮັບຜິດຊອບສູງ, ພ້ອມທັງໄດ້ສະແດງຄວາມຂອບໃຈຕໍ່ບັນດາຄູ່ຮ່ວມງານ, ຄູ່ຮ່ວມພັດທະນາ ແລະ ອົງການຈັດຕັ້ງອື່ນໆທີ່ໄດ້ໃຫ້ການສະໜັບສະໜູນ ແລະ ການຮ່ວມມືທີ່ດີຕະຫຼອດມາ. ນອກນັ້ນ ຍັງໄດ້ຢືນຢັນຄືນຄວາມໝາຍໝັ້ນ ທີ່ ສປປ ລາວ ຈະສືບຕໍ່ຊຸກຍູ້ ແລະ ໃຫ້ການຮ່ວມມືແກ່ ສະຖາບັນແມ່ນໍ້າຂອງ ໃນປັດຈຸບັນກໍຄືໃນຕໍ່ໜ້າ, ໂດຍສະເພາະໃນໄລຍະ ທີ່ ສປປ ລາວ ປະຕິບັດໜ້າທີ່ປະທານສະພາບໍລິຫານງານສະຖາບັນແມ່ນໍ້າຂອງ.
 |
ພ້ອມນີ້, ຍັງມີຜູ້ຕາງໜ້າຈາກສະຖານກົງສຸນໃຫຍ່ ແຫ່ງ ສປປ ລາວ, ສປ ຈີນ ແລະ ສສ ຫວຽດນາມ ທີ່ ຂອນແກ່ນ ໄດ້ຂຶ້ນກ່າວຄໍາເຫັນຊົມເຊີຍ ໃນງານສະເຫຼີມສະຫຼອງດັ່ງກ່າວ. ຄຽງຄູ່ກັນນີ້, ທ່ານ Narongchai Akrasanee, ປະທານຄະນະປະຈຳສະຖາບັນແມ່ນ້ຳຂອງ ກໍໄດ້ຂຶ້ນກ່າວຄໍາເຫັນ ເພື່ອຫວນຄືນເຖິງການເຕີບໃຫຍ່ຂະຫຍາຍຕົວຂອງສະຖາບັນແມ່ນໍ້າຂອງ ຕະຫຼອດ 3 ທົດສະວັດຜ່ານມາ.
ນອກຈາກນີ້, ທ່ານ Suriyan Vichitlekarn ໄດ້ຂຶ້ນກ່າວຄໍາເຫັນອໍາລາ ໃນໂອກາດສິ້ນສຸດວາລະການດໍາລົງຕໍາແໜ່ງເປັນຜູ້ອໍານວຍການສະຖາບັນແມ່ນໍ້າຂອງ ແລະ ທ່ານ ອານູລັກ ກິດຕິຄຸນ ກໍໄດ້ຂຶ້ນກ່າວຄໍາເຫັນແນະນໍາຕົນເອງ ໃນໂອກາດເຂົ້າຮັບຕໍາແໜ່ງເປັນຜູ້ອຳນວຍການຄົນໃໝ່ຂອງສະຖາບັນແມ່ນ້ຳຂອງ ໃນໂອກາດນີ້ອີກດ້ວຍ.
(ຂ່າວ: ກຕທ)
ຄໍາເຫັນ