 |
ສະຫາຍ ພັນເອກ ກົມພັນ ຈັນທະວົງ ຮອງຫົວໜ້າກົມສູ້ຮົບ ກົມໃຫຍ່ເສນາທິການກອງທັບ ໄດ້ສະຫຼຸບວຽກງານປ້ອງກັນເສັ້ນທາງລົດໄຟ ລາວ-ຈີນ ຕະຫຼອດໄລຍະ 2 ປີຜ່ານມາ ສາມາດຮັກສາໄດ້ວຽກງານປ້ອງກັນຮັກສາຄວາມສະຫງົບ, ນໍາໃຊ້ກໍາລັງ, ພາຫະນະເຂົ້າເຮັດໜ້າທີ່ປ້ອງກັນຄວາມເປັນລະບຽບຮຽບຮ້ອຍຕາມເສັ້ນທາງລົດໄຟ ລາວ-ຈີນ, ພະນັກງານ-ນັກຮົບ ມີຄວາມຮັບຜິດຊອບສູງຕໍ່ໜ້າທີ່ການເມືອງຂອງຕົນ, ສະກັດກັ້ນ ແລະ ທັບມ້າງກົນອຸບາຍທໍາລາຍມ້າງເພ ຂອງອິດທິກຳລັງປໍລະປັກ ແລະ ກຸ່ມຄົນບໍ່ດີທີ່ມີແຜນການເຄື່ອນໄຫວສ້າງຄວາມບໍ່ສະຫງົບຕາມແລວເສັ້ນທາງລົດໄຟ ລາວ-ຈີນ ຮັກສາໄດ້ຄວາມສະຫງົບປອດໄພ ແລະ ສຳເລັດໜ້າທີ່ຕາມຄາດໝາຍທີ່ໄດ້ກຳນົດ, ບັນດາກົມກອງກຳລັງທ້ອງຖິ່ນທີ່ເຂົ້າຮ່ວມເຮັດໜ້າທີ່ປ້ອງກັນ ໄດ້ເປັນເຈົ້າການແຕ່ຫົວທີ, ມີລະບຽບແບບແຜນ, ມີສະຕິກຽມພ້ອມສູ້ຮົບເຂັ້ມງວດ, ມີຄວາມຫ້າວຫັນ, ມີນໍ້າໃຈອົດທົນຜ່ານຜ່າຄວາມຫຍຸ້ງຍາກ ນາໆປະການ, ສະແດງອອກການປ້ອງກັນເວນຍາມທັງກາງເວັນ ແລະ ກາງຄືນ, ເສັ້ນທາງເຄື່ອນໄຫວປ້ອງກັນຕາມແລວເສັ້ນທາງເຂົ້າ-ອອກປ້ອມປ້ອງກັນ, ເປັນເຈົ້າການຕິດຕາມ ກຳແໜ້ນແກ້ໄຂສະພາບການຢ່າງວ່ອງໄວທັນກັບເຫດການທີ່ເກີດຂຶ້ນ ເຮັດໃຫ້ການປ້ອງກັນໃນຂອບເຂດທີ່ຮັບຜິດຊອບມີຄວາມສະຫງົບປອດໄພ.
 |
ສຳລັບການດຳລົງຊີວິດຂອງປະຊາຊົນຢູ່ລຽບຕາມແລວເສັ້ນທາງລົດໄຟ ພື້ນຖານມີຄວາມສະຫງົບ, ປະຊາຊົນບັນດາເຜົ່າສ່ວນຫຼາຍໄດ້ປະກອບສ່ວນເຂົ້າໃນວຽກງານ ປກຊ-ປກສ, ເປັນເຈົ້າການປົກປັກຮັກສາຄວາມສະຫງົບປອດໄພຕາມແລວເສັ້ນທາງລົດໄຟ ລາວ-ຈີນ, ປະຊາຊົນສ່ວນຫຼາຍໄດ້ເຊື່ອມຊຶມເຂົ້າໃຈຢ່າງເລິກເຊິ່ງ ຕໍ່ແນວທາງນະໂຍບາຍຂອງພັກ-ກົດໝາຍຂອງລັດ ໃນການພັດທະນາເສດຖະກິດ-ສັງຄົມໃນໄລຍະໃໝ່, ໄດ້ປຸກລະ ດົມທົ່ວປວງຊົນເຂົ້າຮ່ວມການປ້ອງກັນຢ່າງເປັນຂະບວນກວ້າງຂວາງຟົດຟື້ນ, ອໍານາດການປົກຄອງທ້ອງຖິ່ນ ທີ່ຢູ່ລຽບຕາມແລວເສັ້ນທາງລົດໄຟ ລາວ-ຈີນ ໄດ້ປະກອບສ່ວນຢ່າງຕັ້ງໜ້າຕໍ່ວຽກງານ ປກຊ-ປກສ ຮັກສາຄວາມສະຫງົບໃນຂອບເຂດທ້ອງຖິ່ນຂອງຕົນ.
ຂ່າວ: ຂປລ
ຄໍາເຫັນ