ສຳເລັດຝຶກອົບຮົມສຳລັບພະນັກງານແນວລາວສ້າງຊາດ ຢູ່ ສປ ຈີນ

   

  ການຈັດຝຶກອົບຮົມຄັ້ງນີ້, ເປັນການສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດສັນຍາຮ່ວມມື ລະຫວ່າງ ສູນກາງແນວລາວສ້າງຊາດ ແລະ ສະພາທີ່ປຶກສາການເມືອງທົ່ວປະເທດຈີນ ທີ່ໄດ້ລົງນາມໃນວັນທີ 22 ມັງກອນ 2024; ການຝຶກອົບຮົມດັ່ງກ່າວ ມີເປົ້າໝາຍເພື່ອຍົກສູງຄວາມຮູ້, ຄວາມສາມາດ ແລະ ທັກສະໃນການປະຕິບັດວຽກງານແນວໂຮມ ພ້ອມທັງສືບຕໍ່ເສີມຂະຫຍາຍສາຍພົວພັນມິດຕະພາບ, ຄວາມຮ່ວມມືອັນດີງາມ ແລະ ການແລກປ່ຽນບົດຮຽນລະຫວ່າງ ສປປ ລາວ ແລະ ສປ ຈີນ ບົນພື້ນຖານຈິດໃຈ “4 ດີ” ແລະ ການສ້າງຄູ່ຮ່ວມຊາຕາກຳ ລາວ-ຈີນ ທີ່ມີອະນາຄົດຮ່ວມກັນ.

  ຫຼັກສູດຝຶກອົບຮົມປະກອບດ້ວຍ 11 ຫົວຂໍ້ສຳຄັນ ທີ່ມີເນື້ອໃນດ້ານການເມືອງ, ເສດຖະກິດ, ສັງຄົມ ແລະ ການພັດທະນາສະໄໝໃໝ່ ຂອງ ສປ ຈີນ; ເນື້ອໃນການບັນຍາຍປະກອບມີ: ສະພາບການພັດທະນາແຫ່ງຊາດຂອງຈີນ, ປະສົບການການປະຕິຮູບ ແລະ ເປີດປະເທດ, ການບໍລິຫານລັດ, ລະບົບປະຊາທິປະໄຕແບບປຶກສາຫາລື, ການນຳໃຊ້ເຕັກໂນໂລຊີດີຈິຕອນໃນການພັດທະນາ, ການລຶບລ້າງຄວາມທຸກຍາກ, ການພັດທະນາທັນສະໄໝແບບຈີນ, ພາລະບົດບາດຂອງສະພາປຶກສາການເມືອງປະຊາຊົນຈີນ, ວຽກງານສ້າງຄວາມສາມັກຄີປວງຊົນ, ວຽກງານແນວໂຮມຮາກຖານ ແລະ ການວິເຄາະສະພາບການເມືອງ-ເສດຖະກິດສາກົນ ໃນປັດຈຸບັນ.

  ນອກຈາກການຮຽນຮູ້ພາກທິດສະດີແລ້ວ, ຄະນະຜູ້ຈັດຍັງໄດ້ນຳພາຄະນະສຳມະນາກອນລາວ ເດີນທາງໄປສຶກສາ ແລະ ແລກປ່ຽນປະສົບການຕົວຈິງຢູ່ນະຄອນເສິງຕູ ແຂວງເສສວນ ໂດຍໄດ້ຢ້ຽມຊົມໝູ່ບ້ານຈ້ານຊີ ເພື່ອຮຽນຮູ້ຮູບແບບການພັດທະນາອຸດສາຫະກຳຊົນນະບົດ, ເຂດຊົນລະປະທານຕູ່ຈ່ຽງຢຽນ ທີ່ເປັນມໍລະດົກໂລກດ້ານວິສະວະກຳຊົນລະປະທານ, ສູນອະນຸລັກ ແລະ ຂະຫຍາຍພັນໝີແພນດາ ນະຄອນເສິງຕູ ພ້ອມທັງໄດ້ຢ້ຽມຊົມສູນການຄ້າ ແລະ ໂຄງການພັດທະນາສຳຄັນຕ່າງໆ ຢູ່ແຂວງເສສວນ ແລະ ແຂວງຢູນນານ;

   ຕະຫຼອດໄລຍະ 14 ວັນຂອງການຝຶກອົບຮົມ, ບັນດາສຳມະນາກອນໄດ້ຕັ້ງໃຈສຶກສາຄົ້ນຄວ້າ, ແລກປ່ຽນຄວາມຄິດເຫັນ ແລະ ຖອດຖອນບົດຮຽນຢ່າງເລິກເຊິ່ງ ຈາກປະສົບການການພັດທະນາ ຂອງ ສປ ຈີນ; ຊຸດຝຶກອົບຮົມໄດ້ບັນລຸຜົນສຳເລັດຕາມຈຸດປະສົງ ແລະ ແຜນການທີ່ວາງໄວ້, ຊ່ວຍເພີ່ມພູນຄວາມຮູ້ດ້ານທິດສະດີ ແລະ ປະສົບການພາກປະຕິບັດໃຫ້ແກ່ພະນັກງານແນວລາວສ້າງຊາດ ອັນເປັນພື້ນຖານສຳຄັນໃນການນຳໄປປັບໃຊ້ເຂົ້າໃນວຽກງານຕົວຈິງ ແລະ ປະກອບສ່ວນເຂົ້າໃນການພັດທະນາວຽກງານແນວໂຮມ ຂອງ ສປປ ລາວ ໃຫ້ມີປະສິດທິຜົນ ແລະ ສອດຄ່ອງກັບສະພາບການໃໝ່ ພ້ອມທັງສືບຕໍ່ເສີມສ້າງສາຍພົວພັນມິດຕະພາບ, ຄວາມຮ່ວມມື ແລະ ຄວາມເຂົ້າໃຈອັນດີລະຫວ່າງ ລາວ-ຈີນ ໃຫ້ນັບມື້ນັບແໜ້ນແຟ້ນ ແລະ ເລິກເຊິ່ງຍິ່ງຂຶ້ນ (ຂ່າວ:ສນຊ)