ສຳເລັດການແຂ່ງຂັນກອັຟ ມິດຕະພາບ ສະຫຼອງການເປີດນຳໃຊ້ແອັບພລິເຄຊັນ ລາວກອັຟ

ການແຂ່ງຂັນກິລາກອັຟໃນຄັ້ງນີ້ ແມ່ນຈັດຂຶ້ນເນື່ອງໃນໂອກາດເປີດນຳໃຊ້ແອັບພລິເຄຊັນ ລາວກອັຟ ຫຼື “Laos Golf Application” ຢ່າງເປັນທາງການ ຊຶ່ງແອັບພລິເຄຊັນດັ່ງກ່າວ ແມ່ນຖືກອອກແບບດ້ວຍເອກະລັກຂອງຄົນລາວຢ່າງຊັດເຈນ ແລະ ຖືກພັດທະນາໃຫ້ມີຄຸນສົມບັດທີ່ຈຳເປັນຢ່າງຄົບຖ້ວນ ເພື່ອໃຫ້ນັກກິລາກອັຟນຳໃຊ້ໃນເວລາແຂ່ງຂັນ ຫຼື ຫຼິ້ນກິລາກອັຟ ໂດຍແອັບນີ້ມີຫຼາຍຟັງຊັນທີ່ໜ້າສົນໃຈ, ຖືກອອກແບບຢ່າງປານີດ, ໃຊ້ງ່າຍ ແລະ ຜູ້ອອກແບບໄດ້ນຳປະສົບການຈາກແອັບກອັຟຊັ້ນນຳທີ່ນິຍົມໃນທົ່ວໂລກ ໂດຍສະເພາະແມ່ນໃນສະຫະລັດ ອາເມຣິກາ ແລະ ການາດາ. ນອກຈາກນີ້, ທີມງານຍັງໄດ້ເດີນທາງໄປສຳຫຼວດສະໜາມກອັຟຕ່າງໆໃນນະຄອນຫຼວງວຽງຈັນ, ພົບປະ ແລະ ປຶກສາຫາລືກັບສະຫະພັນກິລາກອັຟຢ່າງລະອຽດທຸກຂັ້ນຕອນ ແລະ ໄດ້ມີການທົດລອງນຳໃຊ້ທັງໃນ ສະຫະລັດ ອາເມຣິກາ, ການາດາ ແລະ ສປປ ລາວ ເຮົາ ເພື່ອປັບປຸງ ແລະ ພັດທະນາໃຫ້ດີຂຶ້ນຢ່າງຕໍ່ເນື່ອງ ຊຶ່ງຈຸດເດັ່ນຂອງແອັບດັ່ງກ່າວ ແມ່ນມີ 3 ຟັງຊັນ ຄື: ຟັງຊັນຄຳນວນ ແລະ ອັບເດດ ແຮນດີແຄັບ (Handicap), ຟັງຊັນ ກັອຟ ຈີພີເອັດ (Golf GPS) ແລະ ຟັງຊັນ ໄລ ສະກໍ (Live Score).

ຜ່ານການແຂ່ງຂັນຜົນປະກົດວ່າ: ລາງວັນຕີໃກ້ຂຸມ (ຂຸມ 3 ພາ 5) ທ່ານ ນະວັດເດດ ແກ້ວວຽງຄຳ; ລາງວັນຕີໄກຂຸມ (ຂຸມ 15 ພາ 4) ທ່ານ ຄິມ ດອງ ກິວ; ຮຸ່ນອາວຸໂສ ອາຍຸ 65 ປີ ຂຶ້ນໄປ ທີ 1 ທ່ານ ນິວອນ ຍອຍສາຍຄຳ, ທີ 2 ທ່ານ ພູເພັດ ພຸດທະບັນດິດ ແລະ ທີ 3 ທ່ານ ກິ່ງມະໂນ ພົມມະຫາຊົນ; ສາຍ A ທີ 1 ຄິມ ຊັງ ຈິກ, ທີ 2 ທ່ານ ມຸນ ແຈ ຍັງ ແລະ ທີ 3 ທ່ານ ລີ ຈິນ ຊອບ; ສາຍ B ທີ 1 ທ່ານ ໄຊຍະເດດ ວົງໄຊ, ທີ 2 ທ່ານ ພູວົງ ອິນທະວົງ ແລະ ທີ 3 ທ່ານ ຈິງ ໂຕນ ແທັງ ທວນ; ສາຍ C ທີ 1 ທ່ານ ໄຊຍະແສງ, ທີ 2 ທ່ານ ຫງວຽນ ຈຸງ ແມັງ ແລະ ທີ 3 ທ່ານ ນາທານ ວູ; ລາຍການ Over All Low Gross ແຊັມຕົກເປັນຂອງ ທ່ານ ກິດສະນຸ ປາກດີມະນີວົງ.

ຂ່າວ-ພາບ: ລູກນ້ຳເຊ ອິນທະດາລິນ