 |
ທ່ານ ອານົງ ຍອຍສາຍຄຳ ຮອງປະທານສານປະຊາຊົນສູງສຸດ ໄດ້ກ່າວວ່າ: ການຈັດການແຂ່ງຂັນກິລາເປຕັງ ຊີງຂັນລາງວັນປະທານສານປະຊາຊົນສູງສຸດຄັ້ງນີ້ແມ່ນເປັນການສ້າງຂະບວນການໃນການກະກຽມຄວາມພ້ອມການຈັດກອງປະຊຸມໃຫຍ່ສະມາຊິກພັັກ ຂອງອົງຄະນະພັກສານປະຊາຊົນສູງສຸດ ຄັ້ງ V ແລະ ເປັນການຂໍ່ານັບຮັບຕ້ອນວັນສ້າງຕັ້ງສານປະຊາຊົນ ຄົບຮອບ 43 ປີ ທີ່ຈະມາເຖິງໃນມໍ່ໆນີ້; ທັງເປັນການສ້າງຄວາມສາມັກຄີຂອງພະນັກງານ-ລັດຖະກອນ ພາຍໃນສານປະຊາຊົນ ໃຫ້ເປັນຂະບວນການຟົດຟື້ນ ເຮັດໃຫ້ພະນັກງານໄດ້ພົບປະແລກປ່ຽນບົດຮຽນ ແລະ ປະສົບການໃນຂົງເຂດວຽກງານຂອງຕົນ. ການແຂ່ງຂັນກິລາເປຕັງໃນຄັ້ງນີ້ ແມ່ນເປັນການແຂ່ງຂັນທີ່ມີສ່ວນຮ່ວມຂອງສານປະຊາຊົນຢູ່ໃນນະຄອນຫຼວງວຽງຈັນ ແລະ ໄດ້ພ້ອມກັນແຂ່ງຂັນດ້ວຍຄວາມມີໄມຕີຈິດມິດຕະພາບຢ່າງເປັນຂະບວນການຟົດຟື້ນ ແລະ ຜູ້ເຂົ້າຮ່ວມການແຂ່ງຂັນແມ່ນໄດ້ປະຕິບັດຕາມກະຕິກາຢ່າງເຂັ້ມງວດ ມີທັງຜູ້ແພ້ ແລະ ຜູ້ຊະນະ ມັນໄດ້ສະແດງໃຫ້ເຫັນເຖິງຄວາມສາມັກຄີລະຫວ່າງພະນັກງານຂອງສານປະຊາຊົນດ້ວຍກັນ ຈຶ່ງເຮັດໃຫ້ການແຂ່ງຂັນໄດ້ຮັບຜົນສຳເລັດຢ່າງຈົບງາມ.
ຜົນຂອງການແຂ່ງຂັນ ມີດັ່ງນີ້: ປະເພດທີມຊາຍທີ 1 ສານປະຊາຊົນ ເຂດ 3, ທີ 2 ສານປະຊາຊົນ ເຂດ 1 ແລະ ທີ 3 ຄະນະສານ ຄອບຄົວ ສານປະຊາຊົນສູງສຸດ.
ປະເພດທິມຍິງ: ທີ 1 ກົມການເງິນ ສານປະຊາຊົນສູງສຸດ, ທີ 2 ຄະນະສານ ປົກຄອງ ສານປະຊາຊົນສູງສຸດ ແລະ ທີ 3 ກົມກວດກາ ສານປະຊາຊົນສູງສຸດ.
(ຂ່າວ: ຕຸໄລເພັດ)
ຄໍາເຫັນ