 |
ໂດຍມີ ທ່ານ ບຸນເສີດ ແກ້ວປະສິດ ຮອງລັດຖະມົນຕີກະຊວງສາທາລະນະສຸກ, ທ່ານ ນາງ ຄຣອງຂະນິດ ຣັກຈະເລີນ ເອກອັກຄະຣາຊະທູດໄທ ປະຈຳ ສປປ ລາວ, ທ່ານ ກີຣະຕິ ຈະເຣີນຊົນວານິດ ປະທານໂຄງການກ້າວຕາມຮອຍພະບໍຣົມມະສາສະດາ, ທ່ານ ສອນໄຊ ລາດຊະວົງ ຜູ້ອໍານວຍການໂຮງໝໍມິດຕະພາບ, ທ່ານ ອະພິຊາດ ອັດຊະວະມົງຄົນກຸນ ຄະນະບໍດີຄະນະແພດສາດສິລິຣາດພະຍາບານ, ພະສົງຈາກວັດປ່າບ້ານຕານ ແລະ ວັດປ່ານາຄຳນ້ອຍ ປະເທດໄທ ພ້ອມດ້ວຍຄົນເຈັບທີ່ໄດ້ຮັບການຜ່າຕັດເຂົ້າຮ່ວມ.
 |
ຕະຫຼອດໄລຍະການຜ່າຕັດ 3 ມື້ (4-6 ພຶດສະພາ 2026) ທີ່ໂຮງໝໍມິດຕະພາບ, ທີມແພດຊ່ຽວຊານໄດ້ທຸ່ມເທສະຕິປັນຍາ ແລະ ຄວາມສາມາດ ເຮັດການຜ່າຕັດປ່ຽນຂໍ້ທຽມໃຫ້ແກ່ຄົນເຈັບທັງໝົດ 53 ກໍລະນີ, ຂໍ້ທຽມທີ່ໄດ້ຮັບການປ່ຽນທັງໝົດ 74 ຂໍ້ (ບາງກໍລະນີຜ່າຕັດສອງຂ້າງພ້ອມກັນ). ຜົນການຜ່າຕັດແມ່ນປະສົບຜົນສຳເລັດຢ່າງຈົບງາມ ໂດຍຄົນເຈັບທຸກຄົນປອດໄພທຸກກໍລະນີ ຊຶ່ງຖືເປັນຜົນສຳເລັດອັນຍິ່ງໃຫຍ່ໃນການຍົກລະດັບຄຸນນະພາບຊີວິດໃຫ້ແກ່ຜູ້ດ້ອຍໂອກາດໃນລາວ ໃຫ້ສາມາດກັບມາຍ່າງໄດ້ຢ່າງເປັນປົກກະຕິ ແລະ ຫຼຸດຜ່ອນຄວາມທຸກທໍລະມານຈາກຄວາມເຈັບປວດທີ່ສະສົມມາຫຼາຍປີ.
 |
ໃນພິທີ, ທ່ານ ບຸນເສີດ ແກ້ວປະສິດ ໄດ້ກ່າວສະແດງຄວາມຍ້ອງຍໍຊົມເຊີຍ ແລະ ຂອບໃຈຢ່າງເລິກເຊິ່ງມາຍັງທຸກພາກສ່ວນ ໂດຍສະເພາະແມ່ນທີມງານແພດໝໍຈາກຄະນະແພດສາດສິລິຣາດພະຍາບານ ທີ່ໄດ້ນຳເອົາເຕັກນິກການຜ່າຕັດທີ່ທັນສະໄໝ ແລະ ຂໍ້ທຽມຄຸນນະພາບສູງມາຊ່ວຍເຫຼືອປະຊາຊົນລາວ, ນີ້ຄືສັນຍາລັກແຫ່ງຄວາມສາມັກຄີ ແລະ ມິດຕະພາບອັນດີງາມລະຫວ່າງ ລາວ ແລະ ໄທ ທີ່ບໍ່ມີພົມແດນ. ໂອກາດດັ່ງກ່າວ ໄດ້ມີການສາທິດການຍ່າງຂອງຄົນເຈັບ ທີ່ໄດ້ຮັບການຜ່າຕັດຈາກໂຄງການໃນໄລ 3 ມື້ທີ່ຜ່ານມາ. ພາບແຫ່ງຄວາມປະທັບໃຈທີ່ຄົນເຈັບສາມາດລຸກຂຶ້ນຍ່າງໄດ້ດ້ວຍຄວາມໝັ້ນໃຈອີກຄັ້ງ ໄດ້ສ້າງຄວາມຕື່ນເຕັ້ນ ແລະ ຄວາມປິຕິຊົມຊື່ນໃຫ້ແກ່ຜູ້ເຂົ້າຮ່ວມ ຊຶ່ງເປັນການຢັ້ງຢືນເຖິງປະສິດທິພາບຂອງການຜ່າຕັດ ແລະ ຄວາມສຳເລັດອັນເປັນຮູບປະທຳຂອງໂຄງການ ກ້າວຕາມຮອຍພຣະບໍຣົມມະສາສະດາ ໃນປີ 2026 ນີ້.
ຂ່າວ: ຕຸໄລເພັດ
ຄໍາເຫັນ