ເມື່ອບໍ່ດົນມານີ້, ຄະນະຈັດຕັ້ງແຂວງສະຫວັນນະເຂດ ໄດ້ຈັດກອງປະຊຸມສະຫຼູບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງປະຈໍາປີ 2023 ແລະ ວາງທິດທາແຜນການປີ 2024 ຢູ່ທີ່ສະໂມສອນຂອງໂຮງຮຽນການເມືອງ-ການປົກຄອງແຂວງ ໂດຍການເປັນປະທານຂອງສະຫາຍ ບຸນໂຈມ ອຸບົນປະເສີດ ກໍາມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ສະຫາຍ ບົວສອນ ມະຫາວົງ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງ, ມີຄະນະພັກຮາກຖານຈາກພະແນກການອ້ອມຂ້າງແຂວງ ແລະ ແຂກທີ່ຖືກເຊີນເຂົ້າຮ່ວມ.
ໃນໂອກາດນີ້, ສະຫາຍ ໄກ່ສອນ ອິນທິຈັກ ຮອງຫົວໜ້າຄະນະຈັດຕັ້ງແຂວງ ໄດ້ຜ່ານບົດສະຫຼູບຕີລາຄາການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ປະຈໍາປີ 2023 ຊຶ່ງໃຫ້ຮູ້ວ່າ: ທົ່ວແຂວງສະຫວັນນະເຂດ ມີສະມາຊິກພັກທັງໝົດ 33.392 ສະຫາຍ ຍິງ 9.722 ສະຫາຍ. ໃນນີ້, ມີສະມາ ຊິກພັກສົມບູນ 30.964 ສະຫາຍ ຍິງ 9.007 ສະຫາຍ, ສໍາຮອງ 2.428 ສະຫາຍ, ຍິງ 715 ສະຫາຍ ທຽບໃສ່ປີ 2022 ເພີ່ມຂຶ້ນ 1.119 ສະຫາຍ, ຍິງ 771 ສະຫາຍ ຫຼື ເທົ່າກັບ 3,47%; ປະກອບມີ 1 ອົງຄະນະພັກນະຄອນ,14 ອົງຄະນະພັກເມືອງ,2 ຄະນະພັກ ປກຊ-ປກສ ແຂວງ, ມີການຈັດຕັ້ງຮາກຖານພັກທັງໝົດ 2.115 ຮາກຖານພັກ; ໃນນັ້ນລວມມີ 190 ຄະນະພັກຮາກຖານ, ມີໜ່ວຍພັກທັງໝົດ 1.925 ໜ່ວຍພັກ (ແຍກເປັນໜ່ວຍພັກຮາກຖານ 828 ໜ່ວຍພັກ ແລະ ເປັນໜ່ວຍພັກທີ່ຂຶ້ນກັບຄະນະພັກຮາກຖານ 1.097 ໜ່ວຍພັກ), ໃນຈໍານວນທັງໝົດ ໄດ້ສໍາເລັດກອງປະຊຸມໃຫຍ່ຂັ້ນຕົນແລ້ວ ຈໍານວນ 890 ຮາກຖານ ເທົ່າກັບ 42,08%, ສໍາເລັດດໍາເນີນຊີວິດການເມືອງ 179 ຮາກຖານ ເທົ່າກັບ 8,46%, ເຖິງວາລະແລ້ວ ແຕ່ຍັງບໍ່ທັນດໍາເນີນ 197 ຮາກຖານ ເທົ່າກັບ 9,31% ແລະ ບໍ່ທັນເຖິງວາລະ 849 ຮາກຖານ ເທົ່າກັບ 40,14%. ຄະນະພັກແຕ່ລະຂັ້ນ ໄດ້ເອົາໃຈໃສ່ໃນວຽກງານການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຢ່າງຕັ້ງໜ້າ. ໃນປີຜ່ານມາໄດ້ສັງລວມໜ່ວຍພັກທີ່ສະເໜີມາຈໍານວນ 1.322 ໜ່ວຍພັກ, ຜ່ານການຄົ້ນຄວ້າຂອງຄະນະຮັບຜິດຊອບປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂັ້ນແຂວງ ມີໜ່ວຍພັກທີ່ຄົບມາດຖານ ຈໍານວນ 1.260 ໜ່ວຍ ກວມ 65,45% ຂອງໜ່ວຍພັກທັງໝົດໃນທົ່ວແຂວງ ທຽບໃສ່ປີ 2022 ເພີ່ມຂຶ້ນ ຈໍານວນ 133 ໜ່ວຍພັກ. ໃນປີຜ່ານມາ ໄດ້ສຳເລັດການສ້າງແຜນກໍານົດພະນັກງານນຳພາ-ຄຸ້ມຄອງຂັ້ນແຂວງຄຸ້ມຄອງ ໃນ 14 ເມືອງ-1 ນະຄອນ ແລະ 36 ພະແນກການ-ອົງການທຽບເທົ່າອ້ອມຂ້າງແຂວງ. ສໍາເລັດການສ້າງແຜນກໍານົດພະນັກງານຂັ້ນເມືອງ-ນະຄອນຄຸ້ມຄອງ ຈໍານວນ 324 ຫ້ອງການ-ທຽບເທົ່າຂັ້ນເມືອງ-ນະຄອນ ແລະ ຂັ້ນບ້ານ ສໍາເລັດ ຈໍານວນ 758 ບ້ານ ເທົ່າກັບ 73,37% ຂອງບ້ານທັງໝົດ. ຈາກນັ້ນ, ສະຫາຍ ບົວສອນ ມະຫາວົງ ໄດ້ມີການເຜີຍແຜ່ຄໍາແນະນໍາເລກທີ 13/ຄຈສພ, ລົງວັນທີ 11/1/2024 ກ່ຽວກັບການຈັດຕັ້ງປະຕິບັດມະຕິກົມການເມືອງສູນກາງພັກ ເລກທີ 13/ກມສພ ລົງວັນທີ 9/2/2023 ວ່າດ້ວຍການເລືອກເຟັ້ນແຕ່ງຕັ້ງ, ສັບປ່ຽນໜ້າທີ່ຂອງພະນັກງານນໍາພາ-ຄຸ້ມຄອງ; ເຜີຍແຜ່ຄໍາແນະນໍາເລກທີ 14/ຄຈສພ,ລົງວັນທີ 11/1/2024 ກ່ຽວກັບການຈັດຕັ້ງປະຕິບັດມະຕິກົມການເມືອງສູນກາງພັກ ເລກທີ 21/ກມສພລົງວັນທີ 9/11/2022 ວ່າດ້ວຍການຕີລາຄາພະນັກງານ.
ສະຫາຍ ບຸນໂຈມ ອຸບົນປະເສີດ ໄດ້ເຜີຍແຜ່ບົດຄັດຈ້ອນ ບົດໂອ້ລົມຂອງສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ ຕໍ່ກອງປະຊຸມ.
ພາຍຫຼັງທີ່ຜ່ານເອກະສານຂັ້ນສູນກາງແລ້ວ, ບັນດາຄະນະພັກເມືອງ-ນະຄອນ ແລະ ພະແນກການອ້ອມຂ້າງແຂວງ ກໍໄດ້ປະກອບຄໍາເຫັນແລກປ່ຽນບົດຮຽນຮ່ວມກັນ.
(ຂ່າວ: ສະຫວັນ)
ຄໍາເຫັນ