 |
ທ່ານ ສົມຫຼ້າ ຈີນດາຮອດ ຮອງຫົວໜ້າຂະແໜງວັດທະນະທໍາ ພະແນກ ວທ ແຂວງອັດຕະປື ກ່າວວ່າ: ຊຸດອົບຮົມຄັ້ງນີ້, ໄດ້ຈັດຂຶ້ນເປັນເວລາ 12 ວັນ, ມີເດັກນ້ອຍນັກຮຽນເຂົ້າຮ່ວມ 20 ຄົນ ຍິງ 17 ຄົນ, ມີຊ່ຽວຊານຕ່າງປະເທດປະຈຳໂຄງການ 1 ຄົນ ເປັນອໍານວຍການໂຄງການຈາກມູນນິທິມໍຣະດົກລາວ, ໃນໄລຍະຈັດຕັ້ງປະຕິບັດກິດຈະກຳດັ່ງກ່າວຈະມີພະນັກງານລາວ 3 ທ່ານມາສອນດົນຕີ. ໃນນີ້, 2 ທ່ານມາຈາກວິທະ ຍາໄລສິລະປະສຶກສາ ກະຊວງສຶກສາທິການ ແລະ ກິລາ, 1 ທ່ານມາຈາກວິທະຍາໄລສິລະປະແຫ່ງຊາດ ກະຊວງ ວທ. ສໍາລັບກິດຈະກຳການສອນປະກອບມີ: ລຳໂສມ, ເພງ A, B, C, ຟ້ອນຜ້າແພ, ລຳສາລະວັນ, ຟ້ອນເຕັ້ນແຊ, ເພງແດນແຫ່ງອິດສະຫຼະ, ຟ້ອນລາວແສງທຽນ, ເພງອັດຕະປືແດນງາມ, ເພງຫວຽດນາມໂຮ່ຈີມິງ.
 |
ໂອກາດນີ້, ທ່ານ ອ໋ອງຄໍາ ຄູນສະໄໜ ໄດ້ກ່າວວ່າ: ຊຸດອົບຮົມຄັ້ງນີ້, ເປັນເຫດການສໍາຄັນຂອງແຂວງອັດຕະປື ບົ່ງບອກເຖິງຜົນສໍາເລັດໃນການນໍາພາ-ຊີ້ນໍາຂອງພັກ-ລັດ ທີ່ໄດ້ເອົາໃຈໃສ່ໃນການພັດທະນາວຽກງານສິລະປະ-ວັນນະຄະດີ, ຜົນສໍາເລັດໃນການຮຽນ-ການສອນດົນຕີພື້ນເມືອງລາວ ແມ່ນຄວາມມຸ່ງມາດປາດຖະໜາຂອງປະຊາຊົນບັນດາເຜົ່າໃນ 11 ຊົນເຜົ່າຂອງແຂວງ ທີ່ກາຍເປັນສູນລວມຈິດໃຈໃນການສ້າງຄວາມສາມັກຄີໃຫ້ເປັນຈິດໜຶ່ງໃຈດຽວກັນ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ແລະ ການສະ ແດງສິລະປະວັດທະນະທໍາຄັ້ງນີ້, ເພື່ອສະແດງທົບທວນການສອນດົນຕີລາວເດີມ ຟ້ອນນາດຕະສິນ ແລະ ການຮ້ອງເພງເພື່ອຟື້ນຟູ ແລະ ຮັກສາວັດທະນະທໍາລາວໃຫ້ລູກຫຼານໄດ້ຮໍ່າຮຽນ ແລະ ຮັກສາວັດທະນະທຳອັນດີ ງາມຂອງລາວໄວ້ໃຫ້ຄົນຮຸ່ນໃໝ່ໄດ້ຮູ້ຈັກ ແລະ ເປັນເຈົ້າການຮ່ວມກັນຮັກສາ ເສີມຂະຫຍາຍວັດທະນະທໍາລາວ. ນອກຈາກນັ້ນ, ຍັງເປັນການອະນຸລັກຮັກສາ ແລະ ສົ່ງເສີມວັດທະນະທຳຮີດຄອງປະເພນີອັນດີງາມຂອງຊາດ ແລະ ເປັນການໂຄສະນາເຜີຍແຜ່ ແລະ ສົ່ງເສີມວັດທະນະທຳ, ຮີດຄອງປະເພນີອັນດີງາມຂອງປະຊາຊົນບັນ ດາເຜົ່າແຂວງອັດຕະປືໃຫ້ຜູ້ປົກຄອງເດັກ ໄດ້ສົ່ງເສີມລູກຫຼານເຂົ້າຮຽນດົນຕີພື້ນເມືອງລາວ ເພື່ອຮັບໃຊ້ງານສັງຄົມໃນຕໍ່ໜ້າໃຫ້ຫຼາຍຂຶ້ນ. ຂ່າວ: ວັດທະນາ
ຄໍາເຫັນ