ໃນໂອກາດທີ່ ທ່ານ ສົມມາດ ພົນເສນາ ຮອງປະທານສະພາແຫ່ງຊາດ ຕາງໜ້າໃຫ້ຄະນະປະຈໍາສະພາແຫ່ງຊາດ ປະກອບຄໍາເຫັນ ຕໍ່ບົດລາຍງານຂອງລັດຖະບານ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ກາງສະໄໝ 5 ປີ (2021-2025), ທິດທາງແຜນການທ້າຍສະໄໝ ຮອດປີ 2025, ການເຄື່ອນໄຫວວຽກງານປີ 2023 ແລະ ແຜນການ ປະຈໍາປີ 2024 ຊຶ່ງທ່ານໄດ້ໃຫ້ຮູ້ວ່າ: ຄະນະປະຈໍາສະພາແຫ່ງຊາດ ເຫັນດີຕໍ່ທິດທາງແຜນການ ທ້າຍສະໄໝຮອດປີ 2025 ແລະ ແຜນການ ປະຈໍາປີ 2024 ຂອງລັດຖະບານ, ເພື່ອຮັບປະກັນໃຫ້ແກ່ການຈັດຕັ້ງປະຕິບັດດັ່ງກ່າວ ສະເໜີບາງມາດຕະການເພີ່ມເຕີມ ດັ່ງນີ້:1). ສືບຕໍ່ປະຕິບັດ ທິດທາງລວມ, ເປົ້າໝາຍລວມ ແລະ ແຜນວຽກຈຸດສຸມ ຂອງລັດຖະບານ ຕາມທີ່ໄດ້ກໍານົດໄວ້ໃນ ມະຕິກອງປະຊຸມສະພາແຫ່ງຊາດ ໃຫ້ປະກົດຜົນເປັນຈິງ, ມີປະສິດທິພາບ ແລະ ປະສິດທິຜົນ ແລະ ປະຕິບັດຕາມຈິດໃຈຂອງກອງປະຊຸມສູນກາງພັກ ທີ່ຫາກໍປິດລົງໃນອາທິດກ່ອນ;2). ສູ້ຊົນຮັກສາສະຖຽນລະພາບທາງດ້ານການເງິນ-ເງິນຕາ ໂດຍມີການປະສານສົມທົບຢ່າງແໜ້ນແຟ້ນ ລະຫວ່າງ ນະໂຍບາຍການເງິນ, ເງິນຕາ, ການຜະລິດ, ການຄ້າ ແລະ ຈິດຕະສາດດ້ານສັງຄົມ; ຄວບຄຸມອັດຕາເງິນເຟີ້ ສະເລ່ຍ ໃຫ້ຢູ່ໃນລະດັບ 1 ໂຕເລກ, ຄຸ້ມຄອງອັດຕາແລກປ່ຽນ ຢູ່ໃນລະດັບບໍ່ສ້າງແຮງກົດດັນຕໍ່ອັດຕາເງິນເຟີ້; ສູ້ຊົນໃຫ້ປະລິມານເງິນ M2 ຂະຫຍາຍຕົວສອດຄ່ອງກັບລະດັບດຸນຍະພາບການຂະຫຍາຍຕົວຂອງເສດຖະກິດ; ເອົາໃຈໃສ່ເພີ່ມຄັງສໍາຮອງເງິນຕາຕ່າງປະເທດໃຫ້ສາມາດກຸ້ມການນໍາເຂົ້າບໍ່ຫຼຸດ 5 ເດືອນ ແລະ ຄຸ້ມຄອງລາຍຮັບ ເງິນຕາຈາກການສົ່ງອອກ ແລະ ການນໍາເຂົ້າທຶນຈົດທະບຽນຂອງການລົງທຶນຕ່າງປະເທດ ໃຫ້ຜ່ານລະບົບ ທະນາຄານ ໃຫ້ໄດ້ 60% ຂຶ້ນໄປ;3). ສູ້ຊົນໃຫ້ລວມຍອດຜະລິດຕະພັນພາຍໃນ (GDP) ຂະຫຍາຍຕົວເພີ່ມຂຶ້ນ ສະເລ່ຍ 4% ຂຶ້ນໄປຕໍ່ປີ ແລະ ເຮັດໃຫ້ GDP ຕໍ່ຫົວຄົນ ບັນລຸໄດ້ຕາມຄາດຫມາຍ; ຮັບປະກັນໃຫ້ຂະແໜງບໍລິການກວມອັດຕາສ່ວນຫຼາຍໃນໂຄງປະກອບເສດຖະກິດ;4). ສືບຕໍ່ສູ້ຊົນປະຕິບັດຕາມທິດທາງລວມ ແລະ ຄາດໝາຍທີ່ກໍານົດໄວ້ ໃນແຜນພັດທະນາຂະແໜງການເງິນແຫ່ງລັດ ໂດຍໃຫ້ມີການຫັນປ່ຽນ ແລະ ບຸກທະລຸ ໃນຂົງເຂດຈັດເກັບລາຍຮັບ ແລະ ຫັນເປັນທັນສະໄໝຢ່າງແຂງແຮງ, ໂດຍສະເພາະສູ້ຊົນເກັບລາຍຮັບເຂົ້າງົບປະມານໃຫ້ເກີນດຸນ ໃຫ້ໄດ້ 18% ຂອງ GDP ຂຶ້ນໄປ; 5). ຂົງເຂດວັດທະນະທໍາ-ສັງຄົມ ສຸມໃສ່ປັບປຸງຄຸນນະພາບລະບົບການຮຽນ-ການສອນ ໃຫ້ຕອບສະໜອງກັບຄວາມຕ້ອງການຂອງການພັດທະນາເສດຖະກິດ-ສັງຄົມ ສາມາດເຊື່ອມໂຍງ, ແຂ່ງຂັນກັບພາກພື້ນ ແລະ ສາກົນ, ຈັດຕັ້ງປະຕິບັດນະໂຍບາຍ ແລະ ມາດຕະການ ໃນການແກ້ໄຂການຂາດແຄນຄູ ແລະ ຄູສອນ ລວມທັງການແກ້ໄຂການປະລະການຮຽນ ໃຫ້ປະກົດຜົນເປັນຈິງ, ຫັນການສຶກສາເປັນດີຈີຕອນເທື່ອລະກ້າວ; ຈັດຕັ້ງປະຕິບັດວຽກງານສົ່ງເສີມສຸຂະພາບ, ການກັນ ແລະ ແກ້ໄຂການແຜ່ລະບາດຂອງພະຍາດຕິດຕໍ່, ຍົກສູງຄຸນນະພາບການປິ່ນປົວໃຫ້ໄດ້ມາດຕະຖານ ລວມທັງຈັນຍາບັນ ຈັນຍາທໍາຂອງບຸກຄະລາກອນສາທາລະນະສຸກ, ຊຸກຍູ້ສົ່ງເສີມການຄົ້ນຄວ້າການແພດ ແລະ ການຢາພື້ນເມືອງ; ປັບປຸງກອງທຶນປະກັນສຸຂະພາບ ແລະ ກອງທຶນປະກັນສັງຄົມໃຫ້ມີປະສິດທິຜົນ, ຝຶກ ແລະ ພັດທະນາສີມືແຮງງານລະຫວ່າງພາກສ່ວນຕ່າງໆໃຫ້ມີຄວາມກົມກຽວ ແລະ ໄດ້ມາດຕະຖານສາກົນ, ຄຸ້ມຄອງ, ດັດສົມແຮງງານໃຫ້ສົມດຸນ ແລະ ມີຄວາມຍືນຍົງ; ສ້າງຜະລິດຕະພັນການທ່ອງທ່ຽວໃຫ້ມີຄວາມຫຼາກຫຼາຍ ໄດ້ມາດຕະຖານ, ໂຄສະນາ ແລະ ຊຸກຍູ້ສົ່ງເສີມການທ່ອງທ່ຽວ ໃນການເປີດປີທ່ອງທ່ຽວລາວ 2024 ໃຫ້ມີປະສິດທິຜົນ, ເອົາໃຈໃສ່ປະຕິບັດບັນດາຄາດໝາຍດ້ານບົດບາດຍິງ-ຊາຍ ໃຫ້ປະກົດຜົນເປັນຈິງ; 6). ເອົາໃຈໃສ່ການຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມ ໂດຍສະເພາະສືບຕໍ່ສູ້ຊົນໃຫ້ເນື້ອທີ່ປ່າໄມ້ ກວມ 70% ຂອງເນື້ອທີ່ທົ່ວປະເທດ ໃນປີ 2025, ຊຸກຍູ້ສົ່ງເສີມການຟື້ນຟູປ່າໄມ້ ໃຫ້ໄດ້ 1.800.000 ເຮັກຕາ ແລະ ປູກໄມ້ໃຫ້ໄດ້ 200.000 ເຮັກຕາ, ປ້ອງກັນ ແລະ ສະກັດກັ້ນ ການບຸກລຸກທໍາລາຍປ່າໄມ້, ໄຟໄໝ້ປ່າ ແລະ ໄພທໍາມະຊາດ ໃຫ້ທັນການ, ສືບຕໍ່ໂຄງການອອກໃບຕາດິນຕາມຄວາມສາມາດຕົວຈິງຂອງງົບປະມານ;7). ຟື້ນຟູພື້ນຖານໂຄງລ່າງທີ່ຖືກເປ່ເພ ຈາກໄພທໍາມະຊາດ ແລະ ສືບຕໍ່ການກໍ່ສ້າງປັບປຸງເສັ້ນທາງໃຫ້ໄດ້ຄຸນນະພາບ, ຖືກຕ້ອງຕາມມາດຕະຖານເຕັກນິກ ແລະ ໃຫ້ສໍາເລັດຕາມແຜນທີ່ກໍານົດໄວ້, ພ້ອມທັງປັບປຸງລະບົບຂົນສົ່ງຕ່າງໆໃຫ້ມີຄວາມວ່ອງໄວ, ທັນສະໄໝ ສາມາດແຂ່ງຂັນກັບພາກພື້ນ ແລະ ສາກົນ; ເອົາໃຈໃສ່ຜັນຂະຫຍາຍວຽກງານການຫັນເປັນ ທັນສະໄໝໃຫ້ກວ້າງຂວາງໄປຄຽງຄູ່ກັບການຈັດຕັ້ງປະຕິບັດແຜນພັດທະນາເສດຖະກິດດີຈີຕອນໃຫ້ປະກົດຜົນເປັນຈິງ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ;8).ກໍານົດມາດຕະການທີ່ເໝາະສົມ ໃນການສືບຕໍ່ຈັດຕັ້ງປະຕິບັດຄາດໝາຍໃນຂົງເຂດພັດທະນາຊົນນະບົດ, ແກ້ໄຂຄວາມທຸກຍາກ ແລະ ການຄຸ້ມຄອງບໍລິຫານລັດ ໃຫ້ບັນລຸຕາມແຜນການທີ່ວາງໄວ້;9). ທິດທາງການລົງທຶນຂອງລັດ ໃນໄລຍະທ້າຍສະໄໝ ແລະ ແຜນການປີ 2024 ຄວນຈະສຸມໃສ່ແກ້ໄຂໄພພິບັດ, ຟື້ນຟູພື້ນຖານໂຄງລ່າງທີ່ເປ່ເພ, ຈັດສັນ 10% ຂອງງົບປະມານ ໃສ່ການລົງທຶນປ້ອງກັນຕາຝັ່ງເຈື່ອນ, ນໍາໃຊ້ເງິນເກີນແຜນຂອງທ້ອງຖິ່ນ ສຸມໃສ່ແກ້ໄຂໜີ້ສິນ ແລະ ສໍາເລັດໂຄງການທີ່ຍັງສືບຕໍ່ປະຕິບັດ,ສະເໜີໃຫ້ມີການລົງທຶນໃສ່ຂະແໜງສຶກສາ, ສາທາ ແລະ ວັດທະນະທໍາ-ສັງຄົມຕື່ມໃນຂອບເຂດຄືສົກປີ2023, ຈໍາກັດໂຄງການສະເໜີໃໝ່ ແລ້ວໃຫ້ນໍາສະເໜີບັນຊີໂຄງການລົງທຶນຂອງລັດ ຕໍ່ກອງປະຊຸມສະໄໝສາມັນຄັ້ງນີ້ ເພື່ອພິຈາລະນາ ຮັບຮອງ ໃຫ້ທັນຈັດຕັ້ງປະຕິບັດໃນວັນທີ 1 ມັງກອນ 2024.
(ຂ່າວ-ພາບ: ສຸກສະຫວັນ)
(ຂ່າວ-ພາບ: ສຸກສະຫວັນ)
ຄໍາເຫັນ